பயணங்கள் தரும் அனுபவங்கள் - இன்று

இந்த வாரம் திங்கட்கிழமை ஒரு அனுபவம் அமைந்தது.

மூன்ஷனிலிருந்து மட்ரிட்-ஸ்பெயின் செல்லும் விமானத்தில் பயணிகள் அனைவரும் வந்து அமர்ந்து விட இறுதியில் ஒரு கருப்பின தம்பதியர் அப்பெண்ணின் கையில் ஒரு குழந்தை சகிதம் மூவர் வந்து நுழைந்தனர். இவர்களுக்கு முன்னாலும் பின்னாலும் ஒரு ஆண் போலீஸ் அதிகாரியும் பெண் போலீஸ் அதிகாரியும் கூடவே வந்தனர். அத்தம்பதியர் கையில் துணிப்பைகள் அதில் பல பொருட்கள் வெளியே தெரியும் வகையில்.

விமானத்தில் அமர்ந்திருந்த ஏனைய பயணிகளின் பார்வை என்னையும் உட்பட இவர்கள்  மேல் சில நிமிடங்கள் இருந்தது. பல கேள்விகள் மனதில்.

நிச்சயமாக இவர்கள் தண்டனை பெறச் செல்பவர்கள் இல்லை என்பதை போலீஸார் இவர்களை நடத்திய வகையிலேயே அறிந்து கொள்ள முடிந்தது. கையில் விலங்கில்லை. மரியாதைக் குறையாமல் இருக்கையைக் காட்டி (இறுதி இருக்கை) அதில் அமரச் செய்து ஒவ்வொருவர் பக்கத்திலும் ஒரு போலீஸ் அதிகாரி என அமர்ந்து கொள்ள விமானம் புறப்பட்டது. எனக்கு உறுதியாக  மனதில் பட்டது.. இவர்கள் அகதிகள் தான் என்று. அருகாமையில் சிலர் மெதுவாக ஜெர்மானிய மொழியில் பேசிக் கொண்டிருந்ததில் அவர்களும் என் எண்ணம் போலவே அகதிகளாகத்தான் இருக்கும் என்று பேசிக் கொள்வதும் கேட்டது.

ஐரோப்பாவில் மிக அதிகமாக அகதிகள் தஞ்சம் புகுவது வழக்கத்தில் நடந்து வருவது. பொதுவாக ஐரோப்பா முழுமைக்கும் அகதி அந்தஸ்து கோருபவர்கள் பெரும்பாலும் ஆப்கானிஸ்தான், ரஷ்யா, பாக்கிஸ்தான், ஈராக், செர்பியா, சோமாலியா, ஈரான், நைஜீரியா, கொசொவோ, வங்காளதேசம்,  சிரியா, இலங்கை, அர்மேனியா, ஜோர்ஜியா, துருக்கி, துனிசியா, சீனா, என பட்டியலிடலாம்.

பெரும்பாலும் ஜெர்மனிக்கும் ப்ரான்ஸிற்கும் அகதிகளாக வர விரும்புபவர்கள் என்ணிக்கை அதிகம்.  2011ம் ஆண்டில் மட்டும் ஜெர்மனிக்கு 50,000 பேருக்கு மேல் அகதி அந்தஸ்து கோரி விண்ணப்பித்துள்ளனர் என்பதனை இந்த வலைப்பக்கத்திலிருந்து தெரிந்து கொள்ளலாம்.  http://epp.eurostat.ec.europa.eu/statistics_explained/index.php/Asylum_statistics மேலும் பல இணைய பக்கங்களும் இது தொடர்பான பல தகவல்களை வழங்கலாம்.

அகதி அந்தஸ்து கோரி வருபவர்களின் நிலை அரசியல் காரணங்களுக்காக என அமைவது சகஜம். பொறுத்தமான காரணம் இருப்பின் அகதி அந்தஸ்து பெற்று இவர்கள் இங்கேயே வாழ்க்கையைத் தொடர்கின்றனர். அப்படி ஐரோப்பிய நாடுகளில் புலம்பெயர்ந்த மக்கள் இலங்கைத்தமிழர்கள் உட்பட ஏராளம்.

அரசியல் காரணங்களின் காரணமாக வந்து  போர் இல்லாத நிலையில் சிலர் திருப்பி அவர்கள் சொந்த நாட்டிற்கே அனுப்பபடும் சூழ்நிலையை நான் கேள்விப்பட்டிருக்கின்றேன். என் வீட்டிற்கு அருகாமையில் உள்ள சிண்டல்பிங்கன் நகரில் 2010ம் ஆண்டில் 2 இலங்கைத்தமிழர் குடும்பங்கள் அப்படி குடும்பத்தோடு அனுப்பி வைக்கப்பட்டனர். இவர்கள்  ஏதாவது ஒரு வகையில் இல்லீகலாக ஜெர்மனிக்கு வந்து பின்னர் அகதி அந்தஸ்து கோரி பின்னர் போர் இல்லாத  நிலை என அறிய வரும் போது திருப்பி அனுப்பபப்டுகின்றனர்.  என்னைவிட இலங்கைத்தமிழர் நிலையை நன்கு அறிந்தவர்கள் இது தொடர்பாக தெளிவான தகவல்களைத் தரமுடியும்.

நான் குறிப்பிட்ட இந்த  கறுப்பின தம்பதியர் ஏதாவதொரு ஆப்பிரிக்க நாட்டிலிருந்து ஜெர்மனிக்கு வந்தவர்களாக இருக்க வாய்ப்புண்டு. ஆப்பிரிக்காவிலிருந்து ஸ்பெயினிற்குள் `திருட்டுத்தனமாக` வருவதற்கு சில வழிமுறைகளைக் கையாள்கின்றனர். அந்த வழியில் ஸ்பெயின் வந்து பின்னர் ஜெர்மனிக்கு வந்தவர்களாக இருக்கக் கூடும் என்று நினைத்துக் கொண்டேன்.

பல நாடுகளிலிருந்து அகதி அந்தஸ்து கோரி தஞ்சம் புகுந்த பல்லாயிரம் மக்களுக்கு ஐரொப்பிய நாடுகள் அகதி அந்தஸ்து வழங்கி அவர்கள் வாழ்க்கை இப்புதிய நிலத்தில் தொடர  உதவுகின்றன. ஆனால் பல வேளைகளில் பல்வேறு சட்டப்பூர்வ காரணங்களுக்காக சட்ட நடவடிககை எடுக்கப்பட்டு சிலர் திருப்பி அனுப்பவும் படுகின்றனர்.

அகதி அந்தஸ்து கோரி வருகின்ற மக்களின் நிலை .. அவர்களின் வாழ்க்கையின் போராட்டம் என்பவை ஒரு வரியில் சொல்லி விளக்க முடியாதவை. சோதனைகளும் வேதனைகளும் என்னெவென்று தெரியவேண்டுமென்றால் இவர்கள் கதையை அறிந்து கொள்வது உலகை அறிந்து கொள்வதற்கு உதவும். சில உண்மைக் கதைகள் என் நண்பர்கள் வழியாகவே கேள்விப்பட்டிருக்கின்றேன். வாய்ப்பமையும் போது எழுதுகின்றேன்.

சுபா

சாம்பியன் லீக் 2013 (2)

என் கணிப்பை பொய்யாக்காமல் எஃப்சி பாயார்ன் குழு பார்சலோனாவை 3க்கு 0 என்ற கோல் கணக்கில் நேற்று தோற்கடித்து வெம்ப்ளியில் நடைபெற உள்ள இறுதிப் போட்டிக்கு தயாராகி விட்டது.

இறுதிப் போட்டியில் பொருஸியா டோர்ட்முண்டும்  எஃப்சி பாயார்ன் குழுவும் மோத உள்ளன. இரண்டுமே ஜெர்மானியக் குழுக்கள். இறுதிப் போட்டியில் இரண்டு ஜெர்மன் குழுக்கள் கலந்து கொள்வது இங்கே பெறும் மகிழ்ச்சியைஏற்படுத்தியிருக்கின்றது. 2வது தொலைகாட்சி நிறுவனமான ZDF நேற்று இரவு விளையாட்டு முடிந்து பின்னர் தொடர்ந்து நடக்கவிருக்கும் போட்டி பற்றிய விவரணைகளிலேயே  இரவை கழித்தது. 

நேற்றைய விளையாட்டின் சில சிறப்பு செய்திகள் படங்களுடன்.

எஃப்சி பாயார்ன் குழு முதல் கோல் போட்ட ரோபன். அவரை கட்டிக்கொண்டு சந்தோஷத்தில் மகிழும் குழுவினர்.

எஃப்சி பாயார்ன் குழுவுக்கான இரண்டாவது கோலை தவறுதலாக  உதைத்தவர் பார்சலோனாவின் பீக். இதை யாரால் நம்ப முடியும்? ஆனாலும் நடந்து விட்டது. தலையைக் கவிழ்ந்து கொண்டே பீக் நடந்து சென்றதும் ஏனைய குழுவினர் தலையில் கையை வைத்துக் கொண்டு பார்தத்தும் பார்சலோனா குழுவினருக்கு ஒரு சோகம் தான்.

பார்சலோனாவின் புகழ் மிக்க விளையாட்டாளரான மெஸ்ஸி போட்டியில் முதல் 11 விளையாட்டளர்களில் நேற்று இடம் பெறவில்லை. பின்னால் அமர்ந்திருந்து பார்த்துக் கொண்டிருந்தார். இவர் போட்டியில் நுழைந்திருந்தால் குழுவினருக்கு பாதி பலம் கூடுதலாகக் கிடைத்திருக்கலாம் என காற்பந்து வர்ணனை செய்தவர் அவ்வப்போது சொல்லிக் கொண்டிருந்தார். மெஸ்ஸி நுழைந்திருந்தால் கூடுதல் 1 கோல் போட்டிருக்கலாம். அவ்வளவுதான்....!

மூன்றாவது கோலைப் போட்ட முல்லர். அவரைக் கட்டிக் கொண்டு மகிழ்ச்சியில் துள்ளும் குழுவினர்.

நேற்றைய நிகழ்வின் கதா நாயகன் மனுவெல் நோயர். ஜெர்மனியின் எஃப்சி பாயார்ன் குழு மட்டுமல்லாது ஜெர்மனியின் நேஷனல் டீமின் கோல்கீப்பர். பார்சலோனா குழு வின்எந்த பந்தையும் விடாமல் பிடித்து சாகம் செய்து அசத்திவிட்டார்.

சுபா

சாம்பியன்ஸ் லீக் 2013 (1)

சாம்பியன்ஸ் லீக்  ஐரோப்பாவின் மிகப் பிரசித்தி பெற்ற காற்பந்து போட்டி. ஒவ்வொருஆண்டும் நடைபெறும் இது  தற்சமயம் ஐரோப்பாவின் விளையாட்டுப் பிரியர்கள் தினம் தினம் பேசிக் கொள்ளும் விஷயங்களில் ஒன்று.

சென்ற ஆண்டு ஜெர்மனியின் எப்ஃசி பாயார்ன்  காற்பந்து கிளப்பும் இங்கிலாந்தின் செல்ஸி கிளப்பும் இறுதிப் போட்டியில் மோதி செல்ஸி வெற்றி வாகை சூடிச் சென்றது. பாயார்ன் குழு சோக முகத்துடன் திரும்பியது.

இந்த ஆண்டு போட்டிகள் சென்ற நாட்களில் முடிந்து இன்று மேலும் ஒரு அறை இறுதிப் போட்டி நடைபெற உள்ளது. 

ஜெர்மனியின் மிகப் புகழ்பெற்ற எப்ஃசி பாயார்ன்  க்ளப்பும் பொரூசியா டோர்ட்முன்ட் கிளப்பும் ஸ்பெயினின் மிகப் புகழ்பெற்ற பார்ஸலோனா கிளப்புடனும் ரியால் மட்ரிட் கிளப்புடனும் மோதியதில் ஜெர்ம்னியின் பொரூசியா டோர்ட்முன்ட் க்ளப் இறுதிப் போட்டிக்குத் தயார்படுத்திக் கொண்டு விட்டது. ரியால் மட்ரிட் புள்ளிகள் போதாதனால் இறுதிப் போட்டிக்கு தேர்ந்தெடுக்கப்படவில்லை.

இன்று எப்ஃசி பாயார்ன் க்ளப்பும் பார்ஸலோனா  குழுவும் மோதுகின்றன. இதில் வெற்றி பெற்று செல்பவர் வரும் மே மாதம் 25ம் நாள்  சனிக்கிழமை இங்கிலாந்தின் வெம்ப்ளி ஸ்டேடியத்தில் நடைபெற உள்ள இறுதிப் போட்டியில் போட்டி இடுவர்.

இந்தப் போட்டிகளில் குழுக்களாக பலர் சேர்ந்து தங்கள் குழுவின் வெற்றிக்குப் போராடினாலும் ஒரு சிலர் தனித்துவத்தோடு போராடி பெயர் பெறுவதும் மிகப் பெரிய புகழை அடைத்து விசிறிகள் சூழ்ந்து வருவதும் இங்கே மிகப் பிரபலம்.

அந்த வகையில் தங்க காலணியை பரிசாக வாங்கிய ரியால் மட்ரிட்டின் விளையாட்டளர் ரோனால்டோ விளையாடும் போதெல்லாம் கேமரா அவர் பக்கமே செல்வதும் விசிறிகள் ரொனால்டோ பெயரைக் கூறிக் கத்தி மகிழ்வதும் நேரில் பார்க்கும் போது மிக சுவாரசியமாக இருக்கும். 

சென்ற வாரம் ஏப்ரல் 24 பொருசியா டோர்ட்முண்டிற்கும் ரியால் மட்ரிட்டிற்கும் நடந்த  போட்டியின் போது நான் மட்ரிட்டில் இருந்ததால் தொலைக்காட்சியில் மாலை நண்பர்களுடன் இருந்து ஒரு உணவகத்தில் பார்க்கும் வாய்ப்பு அமைந்தது. ஸ்பேனிஷ் மக்கள் சூழ்ந்திருக்கும் போது நானும் எனது இன்னொரு அலுவலக நண்பர் இருவர் மட்டுமே ஜெர்மானிய பொருசியா டோர்ட்முண்ட் குழுவிற்காக கைதட்டிக் கொண்டிருந்தோம். உள்ளூர் மக்களோடு சேர்ந்து இப்படி விளையாட்டினை ரசிப்பதே ஒரு தனி அனுபவம் தான்.

பொருசியா டோர்ட்முண்ட் கடந்த 4 ஆண்டுகளில் மிகத் துரிதமாக முன்னேறி ஜெர்மனியின் புண்டஸ்லீகா விளையாட்டுக் கோப்பையை கடந்த 2 ஆண்டுகள் வரிசையாக தக்க வைத்துக் கொண்ட ஒரு க்ளப். இதில் மிக இளமையான விளையாட்டளர்களான மரியோ கோட்ஸ, மார்க்கோ ரோய்ஸ். மார்க் ஹும்மல் போன்றவர்கள் இருந்தாலும் இந்த க்ளப்பின் பெயரைச் சொன்னாலே நினைவில் வருபவர் இக்குழுவின் பயிற்சியாளர்தான்.

பயிற்சியாளர் யூர்கன் க்ளோப். இன்றைய நிலையில் அடிக்கடி உள்ளூரில் பேசப்படும் விளையாட்டாளர் பெயர் பட்டியலில் இவர் பெயர் நிச்சயம் இருக்கும்.

எப்ஃசி பாயார்ன் - என்னுடைய பேவரட் குழு.  இதில் ஜெர்மனியின் முக்கிய விளையாட்டாளர்களான ஷ்வையிண்டைகர், மூல்லர், மரியோ கோமேஸ், லாம் என சிறந்த விளையாட்டளர்களின் பட்டாளம் அமைந்த அணி.

இன்று சற்று நேரத்தில் இக்குழுவுடன் பார்ஸலோனா குழு செமி பைனலில் மோத உள்ளது. இதில் வெற்றி எப்ஃசி பாயார்ன் குழுவுக்குத்தான் இருக்கும் என்பது என் கணிப்பு.

அப்படி நடந்தால் இரண்டு ஜெர்மன் குழுக்கள் இவ்வாண்டு சாம்பியன்ஸ் லீக் போட்டியில் பங்கெடுத்துக் கொள்ளும். வெம்ப்ளியில் இந்த விளையாட்டை நேரில் பார்க்க ஒரு டிக்கெட்டும் பாக்கி இருக்காது என்பது நிச்சயம்.

சுபா

ஜெர்மானிய சமையல்... எப்படியிருக்கும்..? - 4 (Kartoffelsalat)

இந்த இழையை நான் மறந்து போயிருந்தேன். இன்று ஒரு ஜெர்மானிய உணவு செய்ய நினைத்ததால் மீண்டும் இந்தப் பதிவு ஞாபகம் வரவே இங்கே ஒரு ஜெர்மானியஉணவு செய்முறையைப் பகிர்ந்து கொள்ளலாம் என நினைக்கின்றேன். அதற்கு முன் இந்தச் சமையலின் சிறப்புக்களையும் கொஞ்சம் சொல்லி வைப்பது தகுமல்லவா..

ஆசிய உணவு வகைகளில் எப்படி அரிசி மிக முக்கியப் பங்கு வகிக்கின்றதோ அதே போல ஐரோப்பிய உணவு வகைகளில் அதிலும் குறிப்பாக ஜெர்மனியில் கோதுமையும் உருளைக்கிழங்கும் மிக முக்கிய உணவுகளாக அமைந்திருக்கின்றன.

16ம் நூற்றாண்டில் ஸ்பேஷினிஷ்காரார்கள் தெற்கு அமெரிக்காவை அதிலும் பெரு நாட்டிற்குச் சென்று அங்கே தமது ஆளுமையை ஆரம்பித்த போது கண்டெடுத்த   விஷயங்களில் உருளைக்கிழங்கு முக்கிய ஒன்றாக அமைகின்றது. உருளைக் கிழங்கின் சுவையில் மயங்கிப் போன ஸ்பேனிஷ் மக்கள் பெருவை விட்டு க்கிளம்பு போது கொண்டு வந்த  உருளைக் கிழங்கை ஸ்பெயினின் தெற்குப் பகுதியில் நட்டு வைத்து வளர்க்க ஆரம்பித்தனர். முதலில் ஸ்பெயினில் பரவலாக உணவில் இடம்பெற்ற உருளைக் கிழங்கு மிக விரைவில் ஐரோப்பா முழுமைக்கும் முக்கிய உணவாக மாறி உணவில் ஆளுமையைப் பிடித்துக் கொண்டது.

அதற்கு முன்னால் ஜெர்மனியைப் பொறுத்த வரை இறைச்சி உணவை அதிகமாக உண்ணும் பழக்கம் கொண்டவர்களாக இருந்த இம்மக்கள் தங்கள் உணவில் உருளைக்கிழங்கையும் படிப்படியாக இணைத்துக் கொண்டு வெவ்வேறு வகையில் இதனை சமைக்க ஆரம்பித்தனர்.

உருளைக் கிழங்கை அவித்தும், பொறித்தும், மாவாக ஆக்கியும், சூப்பாக செய்தும், பல்வேறு வடிவங்கள் கொடுத்து தங்கள் உணவுகளில் ஜெர்மானியர்கள் பயன்படுத்தி வருகின்றனர். அந்த  வகையில் இங்கே மிக முக்கியமாக வருடத்தின் எல்லா காலங்களிலும் ஜெர்மானிய உணவில் இடம் பெறும் ஒன்று கார்ட்டோபல் சாலாட். (Kartoffelsalat)

இதனை வெவ்வேறு வகைகளில் தயாரிக்கலாம். ஜெர்மனியின் மானிலங்களைப்  பொறுத்த வாரியாக என்ற வகையில் இந்தச் சமையல் முறை மாறுகின்றது. நான் இருக்கும் ஷ்வாபன்லாண்டில் தயாரிக்கும் முறை என் மாமனார் இருக்கும் ரைன்லான் பால்ஸ் இடத்திலிருந்து வேறு பட்டது. பாயார்னின் வேறு விதமாகவும் எசனில் வேறு மாதிரியாகவும் என இது வடிவம் எடுக்கின்றது.

உதாரணத்திற்கு இங்குள்ள படத்தைப் பாருங்கள். எத்தனை வடிவங்களில் இவை வேறு படுகின்றன என்று இப்படங்கள் காட்டும்.

சரி நான் இன்று தயாரித்த கர்ட்டோபல் சாலாட் செய்முறையைப் பகிர்ந்து கொள்கின்றேன். இதற்குப் பெயர் மெடிட்டரானன் கார்ட்டோபல் சாலாட்.

செய்முறை

• உருளைக்கிழங்கு - 8
• கருப்பு ஆலீவ் - 10 (சிறிதாக நறுக்கியவை)
• மஸ்டட்ர்ட் க்ரீம் - 2 கரண்டி
• பெரிய காப்ஸிகன் சிவப்பு மிளகாய் - பாதி (பொடியாக நறுக்கியது)
• ஆலிவ் எண்ணெய் - 2 கரண்டி
• வெள்ளரிக்காய் - சிறியது (சிறிதாக நறுக்கியது)
• உலர்ந்த  தக்காளி - சிறிதாக நறுக்கியது
• வெங்காயத் தாள்
• உப்பு - தேவையான அளவு
• வினிகர் - 3 கரண்டி

உருளைக்கிழங்கை நன்கு கழுவி தோல் நீக்கி அதனை அவித்து எடுத்துக் க் கொள்ளவும். நீரில்லாத வகையில் ஸ்டீம் செய்து அவிப்பது நன்று.

கருப்பு ஆலீவ் கொட்டைகளை நறுக்கிக் கொள்ளவும். மிளாகாய், தக்காளி, வெங்காயம், வெள்ளரிக்காய், உலர்ந்த தக்காளி இவை அனைத்தையும் விரும்பும் வடிவில் சிறிதாக நறுக்கிக் கொள்ளவும்.

வேகவைத்த உருளைக் கிழங்கை சூடாக இருக்கும் போதே ஒரு பெரிய பாத்திரத்தில் சிறிதி சிறிதாக நறுக்கிக் கொள்ளவும்.

ஒரு சிறிய பாத்திரத்தில் மஸ்டர் க்ரீம், உப்பு, வினிகர் ஆலீவ் எண்ணெய் அனைத்தையும் சேர்த்து நன்கு கலக்கவும். இந்தக் கலவையை இப்போது வெட்டி வைத்துள்ள உருளைக்கிழங்கில் கொஞ்சம் கொஞ்சமாக சேர்த்து உருளைக் கிழங்கு உடைந்து விடா வகையில்  கிளறவும்.

பின்னர் வெட்டி வைத்துள்ள காய்கறிகளை இந்தக் கலவையில் சேர்க்கவும். இப்போது இந்தக் கலவையை மூடி 30 நிமிடங்கள் வைத்து உப்பு சரி பார்க்கவும். உப்பு குறைந்திருந்தால் அதனைச் சேர்க்கவும்.

இதனை தனியாக சாப்பிடுவது என்பது பொதுவாக இல்லை. ரொட்டியுடனோ, வருத்த காய்கறிகளுடனோ, இறைச்சி, மீன் வகைகளுடனோ சேர்த்து சாப்பிடுவதே வழக்கம்.

கோடை காலங்களில் க்ரில் பார்ட்டிகள் அனைத்திலும் தவறாமல் இடம் பெறும் ஒரு உணவு இது. செய்து பாருங்களேன்.


சுபா

பயணங்கள் தரும் அனுபவங்கள் - இன்று

விமானத்தில் பயணிக்கும் போது எப்போதுமே நான் மிஞ்சியிருக்கும் அலுவலக வேலைகளைக் கணினியில் தொடர்வதே வேலையாகிப் போகும் போது அருகில் நடக்கும் விஷயங்களை அவ்வளவாக கவனிப்பதில்லை; என்னை அவர்கள் ஏதாவது ஒரு வகையில் கவன ஈர்ப்பு செய்தால் தவிர. இன்று தற்செயலாக எனக்கு மறுபக்கத்தில் அமர்ந்திருந்த  ஒரு பயணியிடம் என் பார்வை சென்றது. அழகிய நீல நிறத்தில் கையில் ஒரு நூல்..புத்தகத்தின் பெயர் re-think - how to think differently.

எனது பயண அனுபவத்தில் பொதுவாகவே வியாழக்கிழமை, வெள்ளிக்கிழமை  மதியம்/மாலை மட்ரிட்டிலிருந்து மூனிக் அல்லது சூரிச் வரும் பயணிகள் ஏறக்குறைய 80-90 விழுக்காட்டினர் அலுவலக் காரியமாகப் பயணிப்பவர்களாகத்தான் இருக்கும். ஆக கையில் அலுவலகக் கணினிகளோடு வேலையைத் தொடர்பவர்கள்.. என்னைப் போல.. பலர். இந்த மனிதரும்  அலுவலகப் பயணம் செய்வது போலத்தான் உடையில் காட்சியளித்தார். re-think -  how to think differently என்று நினைத்து தனது சிந்தனையில் மாற்றம் செய்ய நினைத்திருப்பார் போலிருக்கின்றது :-)

கொஞ்ச நேரம் வாசித்துக் கொண்டிருந்தவர் பின்னர் தூங்க ஆரம்பித்து விட்டார். பயணம் முழுதும் ஏறக்குறைய தூக்கம் தான். நூலில் சில பக்கங்கள் கூட வாசித்திருக்க மாட்டார் என நினைக்கின்றேன். பாவம் மாற்றி வித்தியாசமாக சிந்திப்பது அவ்வளவு அலுப்பைக் கொடுத்திருக்கும் போல.:-)

விமானப் பயணங்களில் பெரும்பாலும் iPad, kindle,  வைத்து நூல்கள் வாசிப்போரே அதிகம். இது பயணத்தை ஒரு வகையில் எளிதாக்குகின்றது.

இன்னொருவரையும் தற்செயலாகப் பார்த்தபோது சூடோக்கு புதிரை செய்து கொண்டிருந்தார்.

பயணம் எடுக்கும் நேரத்தை ஏதோ ஒரு வகையில் செலவழிக்க ஒவ்வொருவரும் ஏதாவது ஒரு காரியத்தை செய்து கொண்டிருக்கின்றோம்; அவரவருக்கு ஏற்ற, விரும்பும் வகையில். நமக்கு நமது தேர்வு சரியாக அமைந்து நமது செயல்பாடுகள் நமது தேவையைப் பூர்த்தி செய்கின்றதா என்பது தானே முக்கியமாகின்றது!.

சுபா

சைக்கிள் நகரம்

பெரிய நகரங்களில் சைக்கிள் பயன்பாடு சாத்தியப்படுமா என்பவர்களுக்கு ஏன் முடியாது என வியக்க வைக்கும் நகரம் ஆம்ஸ்டெர்டாம். நெதர்லாந்தின் தலைநகரம் எனபதோடு இந்த நாட்டின் மிகப் பெரிய ஒரு நகரமாகவும் இது இருக்கின்றது.

மூன்று நாட்களுக்கு முன்னர் திங்கட்கிழமை அலுவல் நிமித்தம் ஆம்ஸ்டெர்டாம் சென்றிருந்தேன். என் காரிலேயே பயணம். எனது இல்லத்திலிருந்து 630 கிமீ வட மேற்கு நோக்கிச் செல்ல வேண்டும். பணி கொட்டிக் கொண்டிருந்ததால் 7 மணி நேர பயணமாகியது. ஆம்ஸ்டர்டாமில் வெயில் 9 டிகிரி வரை சீதோஷ்ணமும் பயங்கரக் காற்றும் ஒரு வகை வித்தியாசமான அனுபவத்தைக் கொடுத்தது. இரண்டு நாட்களும் அலுவலகத்தில் மீட்டிங்கில் மூழ்கிப் போனாலும் மாலையில் ஆம்ஸ்டெர்டாம் நகரைச் சற்று சுற்றி வரவும் இரவு உணவுக்குச் செல்லவும் வாய்ப்பமைந்ததில் ஆம்ஸ்டெர்டாம் நகர் மத்தியில் சில மணி நேரங்களை செலவிட முடிந்தது.

இது எனக்கு ஆடர்டாமிற்கான இரண்டாவது பயணம். எனது முதல் பயணத்திலும் நகரம் முழுக்க சைக்கிள் பயணிகள் அங்கும் இங்குமாக வாகனங்களுக்கும் பஸ்களுக்கும் மத்தியில் பயணிப்பதைப் பார்த்து  ரசித்திருக்கின்றேன். இம்முறை நானே வானமும் ஓட்ட வேண்டிய நிலை என்பதால் மிக மிக கவனமாகவே வாகனத்தை ஓட்டிச் செல்ல வேண்டியதாயிற்று.

எங்கிருந்து வருவார்கள் என எதிர்பார்க்கவே முடியாத வகையில் முன்னும் பின்னும் அங்கும் இங்குமெனெ எங்கும் சைக்கிள் பயணிகள். ஈசல்கள், ஈக்கள் போல பறந்து வரும் அவர்கள் வாகனத்தில் செல்வோருக்கு மட்டுமல்ல சாலையில் நடந்து செல்பவர்களுக்கும் சவால்தான்.

சீஸ் கடைக்கு முன்னர் சைக்கிள்

ஆனால் இவையெல்லாம் அவ்வப்போது வந்து செல்பவர்க்ளுக்குத்தான் பிரச்சனை என்பதும் உள்ளூர் மக்கள் சைக்கிள் பயணத்திற்கும் சைக்கிள் பயணிகளுக்கும் பழகியவர்கள் என்பதும் நன்கு தெரிகிறது.

நகரின் எந்த மூலையைப் பார்த்தாலும் சைக்கிள்கள் வைக்கப்பட்டிருப்பதைக் காணமுடிகின்றது. இங்கே அலுவலகத்திற்கு வருபவர்கள் சைக்கிளில் வருவதை ட்ஸ்டேட்டஸ் குறைவாகக் கருதும் நிலையில்லை. மாணவர்கள் இளைஞர்கள் என குறிப்பிட்டதொரு வரையறை என இல்லாமல் எல்லோருமே, எல்லா வயதுக்காரர்களும் சைக்கிள்களில் பயணிக்கின்றனர்.

மலைகள் இன்றி சம தரையாக இருக்கும் நிலை சைக்கிள் பயணிகளுக்கு பயணத்தை அலுப்பில்லாமல் சுலபமாக்குகின்றது. பெரிய நகரத்திற்குள் வாகனத்தை எடுத்துச் சென்று பார்க்கிங் செய்து அதற்குப் பணம் கட்டிப் போக வேண்டுமே என்ற நிலையும் இல்லை. ஆக எல்லா வகையிலும் சுலபமான ஒரு வாகணமாக சைக்கிள் இங்கே அமைந்திருக்கின்றது.

அடுத்த முறை ஆம்ஸ்டெர்டாம் செல்ல நேரும் போது இங்கே வாடகைக்கு சைக்கிள் எடுத்துக் கொண்டு ஓட்டிச் சென்று வர வேண்டும் என்று அங்கிருந்த வேளையில் நினைத்துக் கொண்டேன்.

மேலும் ஆம்ஸ்டெர்டாமின் சில படங்கள்...

windmill

சாலையில் பயணம்

இலை உதிர்த்து நிற்கும் மரங்கள்

நகருக்குள் ட்ராம், பஸ் பொதுப் போக்குவரத்து

Rijks Museum

புகைப்படம் எடுத்துக் கொள்ளும் இளைஞர்கள்

Rijks Museum சுவர் ஓவியம் ஒன்று  - 15ம் நூற்றாண்டு 

நகருக்குள் நதிகளுக்கிடையே பழமையான கட்டிடங்கள்

நிஜமான உடும்பு இல்லை..:-)

டூலிப் மலர்கள் மலரத் தொடங்கி விட்டன

சீஸ் கட்டிகள் - கௌடா வகை

வெவ்வேறு சுவைகளில் மஃப்பின் வகைகள்

அன்புடன்
சுபா

இப்படி ஒரு சோதனையா ..?

இன்று மீண்டும் மட்ரிட்டுக்குப் பயணம். பொதுவாக எனது திங்கட்கிழமை பயணம் என்பது ஸ்டுட்கார்ட்டிலிருந்து சூரிச் அல்லது மூன்ஷன் பின்னர் அங்கிருந்து மட்ரிட் என்பதாக அமையும். ஆனால் இன்றைய பயணம் ஸ்டிட்கார்ட்டிலிருந்து ஜெர்மனியின் வடக்கு மானிலமான ஹம்பெர்க் சென்று பின்னர் அங்கிருந்து மட்ரிட் வருவதாக அமைந்திருந்தது. எதிர்பாராத ஒரு சம்பவம் இன்று வித்தியாசமான மறக்க முடியாத ஒரு அனுபவமாக அமைந்து போனது.

ஸ்டுட்கார்ட்டில் பனி தூறிக் கொண்டிருந்தாலும் பயணம் பிரச்சனையில்லாமலேயே அமைந்தது. ஹாம்பெர்க்கிலிருந்து மட்ரிட் புறப்பட ஆயத்தமாகி  விமானத்தில் ஏறி இருக்கையிலும் வந்து அமர்ந்தாகி விட்டது. என் அருகில் ஒரு ஜெர்மனியில் வசிக்கும் ஷ்பானிஷ் பெண்மணியும் இருக்க இருவரும் கொஞ்சம் பேசிக் கொண்டோம்.

விமானம் புறப்பட்டு ஏறக்குறை 15 நிமிடத்தில் விமானத்தின் நிலை சரியாக இல்லாதமையைப் பயணிகள் உணர்ந்தோம்.இங்கேயும் அங்கேயும் கப்பல் கடல் அலையில் அசைவது போல என வேகமாக அசைய ஆரம்பித்து விட்டது விமானம். ஏறக்குறைய 25வது நிமிடத்தில் கேப்டன் அறிவிப்பு தருகின்றார். அதாவது விமானத்தின் கீழ்பகுதியில் பயணிகள் பைகள் வைக்கும் கார்கோ செக்‌ஷன் கதவு திறந்து கொண்டு விட்டதாகவும் அதனை இயக்கி மூட முடியாத நிலையில் இருப்பதால் விமானத்தில் காற்றின் அழுத்தம் ஏறி விட்டதாகவும் அதனால் உடனே ஹாம்பெர்க் விமான நிலையத்திற்கே திரும்பியாக வேண்டிய சூழல் இருப்பதாகவும் அறிவிப்பு வந்தது.

பயணிகளுக்கு ஆறுதல் சொல்ல வந்த வெண்மை நிறத்து விமானப் பணிப்பெண்னின் முகம் மேலும்  வெளுத்துப் போய் காட்சியளித்தது.. இது என்ன சோதனை என எனக்கு மனம் வருந்தத் தொடங்கி விட்டது, வருந்தி என்ன செய்வது? பிரச்சனையிருக்காது. கீழே சரியாக தரையிறக்கி விடுவார் விமானி என்ற நம்பிக்கை மனதில் இருந்ததால் என் கணினியில் தொடர்ந்து அலுவலக வேலைகளை கவனித்துக் கொண்டிருந்தேன். வேலையில் அழுந்திப் போனால் இந்தக் கவலை மறந்து விடும் என்ற நினைப்பில்.

ஆனால் என் அருகில் இருந்த பெண்மணிக்கு மிகுந்த கோபம். வருத்தம். ஏன் முதலிலேயே சோதித்திருக்கலாமே. இப்படி செய்கின்றார்களே என வருந்தி திட்டிக் கொண்டிருந்தவர் கொஞ்ச நேரத்தில் என் கைகளைப்ப் பிடித்துக் கொண்டு எனக்கு மிக பயமாக இருக்கின்றது. வயிறைப் பிசைகின்றது. என்று சோகமாக பேச ஆரம்பிக்க எனக்கும் அவரது பயம் தொற்றிக் கொள்ள ஆரம்பித்து விட்டது.

சரி ஹாம்பெர்க் செல்ல நிச்சயம் குறைந்தது 20 நிமிடங்களாவது ஆகும் என்பதால் பேசிக் கொண்டே வருவோமே என கணினியை மூடிவிட்டு பேச ஆரம்பித்தோம். அவர் பணி அவர் கணவன் என எங்கள் பேச்சு ஆரம்பித்தது. ஜெர்மானிய கணவர் அவருக்கு. ஜெர்மானிய ஆண்களைப் பற்றிய பொதுக் குணங்கள் பற்றி பேச்சு என திசை திரும்பியது எங்கள் உரையாடல். தனது கணவரின்  ”குண நலன்களை”  விரிவாக உதாரணங்களுடன் விவரித்து சுவாரசியமாக  சொல்லிக் கொண்டே வந்தார். சுவாரசியமாகப் பேசிக் கொண்டே வந்ததில் நேரம் போனது தெரியவில்லை. ஒரு வழியாக ஹாம்பெர்க் விமான நிலையத்தில் ஒரு no man's land பகுதியில் வந்து விமானத்தை மிக மிக மிக பத்திரமாக இறக்கினார் விமானி.

சோதனை தந்த விமானம்

அடுத்து ஒரு அறிவிப்பு விமான கேப்டனிடமிருந்து வந்தது.. டெக்னீஷியன்கள் வந்து பார்த்து செல்லும் வரை பொறுமையாக இருக்கும் உங்கள் புரிந்துணர்வுக்கு நன்றி என்று.

என் பக்கத்து சீட் பெண்மனிக்கு கடும் போகம். “நாம் எங்கேயாவது சொன்னோமா.. புரிந்துணர்வோடு அமைதியாக இருப்போம் என்று. என்ன அவர்களே தீர்மானித்துக் கொள்கின்றார்களே? “ என்று சொல்ல எனக்கு சிரிப்பு தாங்க வில்லை. ஒரு வழியாக டெக்னீஷியன்கள் பார்த்து இதனை சரி செய்ய முடியாது என்று சொல்லி எங்களை விமான நிலைய பஸ்ஸில் ஏற்றி திரும்ப விமான நிலயத்திற்கு அனுப்பி வைத்து விட்டனர்.

1  மணி நேரத்திற்குப் பின்னர் செய்தி வந்தது. Lufthansa  நிறுவனத்தின் மற்றொரு விமானத்தை ஏற்பாடு செய்து முதல் விமானத்தில் ஏற்றிய பைகளையெல்லாம் இறக்கி இந்தப் புதிய விமானத்தில் ஏற்றி எங்களையும் ஏற்றிக் கொண்டு புறப்பட்டது இந்தப் புதிய விமானம்.

மீண்டும் அதில் பயனித்து ஒரு வழியாக மட்ரிட் வந்து சேர்ந்தேன். அந்தப் பெண்மணியும் அன்பொழுக விடைபெற்றுக் கொண்டு சென்றார்.

எப்படியெல்லாம் அனுபவம் நமக்குக் கிடைக்கின்றது என நினைத்துக் கொண்டே டெக்ஸியில் வந்து அமர்ந்தேன்.

சுபா