ஜெர்மனி நினைவலைகள்...!

ஜெர்மனியின் புதிய அதிபர்

2012-02-25T06:15:00.002-08:00

புதிய அதிபர் தேர்வாகிவிட்டார் சென்ற ஞாயிற்றுக் கிழமையே. செய்தி பகிர்ந்து கொள்ள எனக்குத் தான் அவகாசம் இல்லாமல் போய்விட்டது. 2010ம் ஆண்டு அதிபர் தேர்தலில் அதிபர் தேர்தலில் எஸ்பிடி, க்ரூணன் கட்சிகளின் ஏகபோக ஆதரவுடன் இருந்த யோஆகிம் காவுக் இப்போது எல்லா கட்சிகளின் பேராதரவையும் பெற்று எந்தப் போட்டியுமின்றி அதிபராகத் தேர்ந்தெடுக்கப்பட்டுள்ளார்.

டாக்ஸியில் இவர் ஒரு இடத்திற்கு பயணம் செய்து கொண்டிருந்தாராம். சான்ஸலர் அங்கேலா மேர்க்கல் அவர்களிடமிருந்து தொலைபேசி வந்ததாம். ஆளும் சிடியுவும், எப்டிபியும் உங்களை முன் மொழிகின்றோம். அதோடு எஸ்பிடி, க்ரூணன் கட்சிகளின் ஆதரவும் உள்ளது. ஒரு மனதான ஒரு முடிவு. என்ன சொல்கின்றீர்கள் என்று கேட்டாராம். திகைத்துப் போனவர் உடனே சரி என்று சொல்லி விட்டாராம்.

தொலைபேசியில் பேசி முடித்ததும் டாக்ஸி ஓட்டுனரிடம் சொன்னாரம் தொலைபேசி யாரிடமிருந்து வந்தது என்ன விஷயம் என்று. அதோடு நேராக போக வேண்டிய இடத்தை மாற்றி நாடாளுமன்றக் கட்டடம் போகச் சொன்னாராம்.

டாக்ஸி காரருக்கு ஒரே சந்தோஷம். சாதாரணக் குடிமகனை ஏற்றிக் கொண்டு போன நாம் நாட்டின் அதிபரை இறக்கி விடப் போகின்றோம் நாடாளுமன்ற வாசலில் என்று. தொலைகாட்சி செய்தியில் பேசிய டாக்ஸி ஓட்டுனர் மலைத்துப் போன அதே தோரணையில் பேசினார்.

ஜெர்மனியின் புதிய அதிபரைப் பற்றி தெரிந்து கொள்ள http://en.wikipedia.org/wiki/Joachim_Gauck

@திரு. நரசய்யா - உங்களுக்காக ஒரு செய்தி.. .Joachim Gauck was born into a family of sailors in Rostock, the son of Joachim Gauck, Sr. (born 1907), and Olga Gauck (née Warremann, born 1910). His father was an experienced ship's captain and distinguished naval officer (Captain at Sea), who after World War II worked as an inspector at the Neptun Werft shipbuilding company

இவரைப் பற்றி பிறகு ஒரு தனி பதிவு எழுதுகிறேன்.

சுபா

ஜெர்மனியில் சில சுவாரசியமான நிகழ்வுகள்

2012-02-18T06:10:00.001-08:00

இந்த வாரம் இங்கே மக்கள் பேசிக் கொள்ள சில முக்கிய விஷயங்கள் தொடர்ந்து நடந்துள்ளன. நமக்கும் பேச விஷயம் தேவைப்படுகிறது.. .அவ்வப்போது எதிர்பார்ப்பை அதிகரிக்கும் சில விஷயங்கள் நடந்தால் தேனே பொழுதும் சுவாரஸ்யமாகக் கழிகின்றது.. இல்லையா..

ஜெர்மன் அதிபரின் பதவி விலகல்

நேற்று காலை திடீரென்று ஜெர்மனியின் அதிபர் தாம் பதவி விலகுவதாக அறிவித்தார். கிறிஸ்டியான் உல்வ்.. ஆளும் ஆங்கேலா மேர்க்கலின் சிடியு கட்சியின் ஆதரவில் தேர்ந்தெடுக்கப்பட்டவர். சாமர்த்தியமான, இளமையான, நல்ல பேச்சுத் திறமை உள்ள, அரசியல் அனுபவமும் உள்ளவர், ஒன்றரை வருட காலம் அதிபராகப் பதவி வகித்தவர். ஜெர்மனியில் ரோமன் கத்தோலிக்க மதத்தைச் சேர்ந்த முதல் அதிபர் என்பதும் இவருக்குள்ள தனிச்சிறப்பு. சட்டம் படித்த பட்டதாரி. 1975 முதல் அரசியலில் இருந்து வருபவர்.

இவ்வளவு அனுபவம் உள்ள ஒரு அதிபர் எதனால் பதவி விலக வேண்டும்.. அவரது தனிப்பட்ட சில நடவடிக்கைகள் தான் காரணமாக இருக்கின்றன.. இவர் சில ஆண்டுகளுக்கு முன்னர் வாங்கிய ஒரு வீட்டிற்கு ஏதோ ஒரு வகையில் வந்த பணம் தான் முதல் பிரச்சனைக்குக் காரணமாக ஆனது. தொடர்ந்து இவரது விடுமுறை பயணங்களில் இவர் தேர்ந்தெடுக்கும் விலையுயர்ந்த உல்லாசச் செலவுகள்.. இப்படி கடந்த 2 மாதமாக உள்ளூர் பத்திரிக்கைகள் செய்தியாளர்கள் இவரது புனிதத்தை கேள்வி மேல் கேள்வியாகக் கேட்டு இவரை தூங்க விடாமல் செய்து நேற்று காலை அவரே பதவி விலகுவதாகச் சொல்லி விலகிவிட்டார். இப்போது சேன்ஸலர் மேலும் ஒரு தகுதி வாய்ந்த அதிபரை முன் மொழிய வேண்டிய நிலை உள்ளது. இப்போது இது இங்கே ஒடு ஹாட் நியூஸ்.

யூரோ விஷன் பாடல் போட்டி

யூரோ விஷன் ஐரோப்பா முழுமைக்கும் இசைக் கலைனர்களை கட்டிப் போட்டு வைத்திருக்கும் ஒரு பாடல் போட்டி நிகழ்ச்சி. 1956லிருந்து ஒவ்வொரு வருடமும் நடைபெற்றுக் கொண்டிருக்கும் இந்தப்போட்டிகளில் ஐரோப்பிய கண்டத்தின் பல நாடுகள் ஒவ்வொரு வருடமும் போட்டியில் கலந்து கொள்ளும். 2010ல் ஜெர்மனியின் லேனா செட்டலைட் என்னும் மனம் மயங்க வைக்கும் பாடலை வழங்கி ஜெர்மனிக்கு முதல் பரிசை வாங்கிக் கொடுத்ததால் சென்ற ஆண்டு போட்டி இங்கே நடைபெற்றது. அந்தப் போட்டியில் வென்ற அஸீர்பைஜான் இந்த ஆண்டு போட்டியை நடத்தும் நாடு. அதற்கு ஹெர்மனியிலிருந்து செல்லவிருக்கும் பாடகரையும் பாடலையும் தேர்ந்தெடுக்கும் போட்டி நிகழ்வுகள் கடந்த ஐந்தாறு வாரங்களாக நடந்து கடந்த வியாழனன்று போட்டியாளர் ரோமன் தேர்ந்தெடுக்கப்பட்டார். Standing Still என்ற தலைப்பிலான் பாடல்.. மிக நனறாக வந்திருக்கின்றது. போட்டியில் வெற்றி பெறத் தகுதியான பாடலா என்பது தெரியவில்லை. ஆனாலும் ரோமானின் பாடும் அழகும் குரலும் பாடல் வரிகளும் பார்ப்பவர்கள் மனதை இப்போது கொள்ளையடித்துக் கொண்டிருக்கின்றது.இந்த 21 வயது இளைஞர்.. மெக்கானிக்கல் எஞ்சினியரிங் படிப்பவர்.. இங்கே பல இளம் பெண்களின் ஆண்களின் கனவு ராஜாவாக நிச்சயம் அடுத்த சில மாதங்களுக்கு ரோமான் உலா வருவார் என்பது நிச்சயம். http://www.thelocal.de/society/20120217-40805.html

2010ம் ஆண்டு லேனாவின் வெற்றி பெற்ற பாடல் யூடியூபில் இங்கே http://www.youtube.com/watch?v=UmOeISUYXuI

கார்னிவல்

கொல்ன்.. கலாச்சார மையம் என அழைக்கப்படும் இந்த நகரில் இந்த ஆண்டும் கோலாகலமாக கார்னிவல் ஆரம்பித்து விட்டது. வியாழக்கிழமை மாலையே பலர் அலுவலகத்தில் விடுமுறை சொல்லி விட்டு சென்று விட்டார்கள். பலர் செவ்வாய் கிழமை வரை கார்னிவல் மகிழ்ச்சியிலேயே திளைத்திருப்பர்.

நாளை மாலை அருகில் இருக்கும் ஒரு நகரத்தில் நீண்ட அணிவகுப்பு நடைபெற இருக்கின்றது. நானும் சென்று வர எண்ணியிருக்கின்றேன். மிகப் பிரமாதமான ஒரு அணிவகுப்பு அது . நிச்சயமாகப் படங்களையும் பகிர்ந்து கொள்கிறேன்.

கார்னிவல் இங்கே எப்படி கொண்டாடப்படுகின்றது என்று தெரிந்து கொள்ள ஆர்வம் உள்ளவர்களுக்கு இங்கே http://www.journeymart.com/holidays-ideas/festivals/cologne-carnival-germany.aspx சில செய்திகள் உள்ளன.

சுபா

நுர்ன்பெர்க் கிறிஸ்மஸ் மார்க்கெட்

2011-12-16T10:39:00.000-08:00

Schutzangel (uardian angel) - பாதுகாக்கும் தேவதை

வரிசை வரிசையாக கடைகள். அவற்றில் ஒவ்வொரு வரிசையிலும் ஒரு லேப்கூகன் இனிப்பு வகைகள் விற்கும் கடை ஒன்று என்ற வகையில்.. வருகை தரும் எல்லோருக்கும் நிச்சயம் லேப் கூகன் கிடைக்கும்.

Die Weihnachtskripe - கிறிஸ்மஸ் கொண்டாட்டத்திற்கு முன்னராகவே இவ்வகையான ஒரு காட்சியை நகரமையத்தில் அமைத்திருப்பார்கள். பெரும்பாலான கத்தோலிக்க தேவாலயங்களில் கிறிஸ்மஸ் நாளில் இதனைக் காணலாம். (கிறிஸ்மஸ் சமையத்தில் ப்ரோட்டெஸ்டன் தேவாலயங்களில் சென்று இதுவரை பார்த்ததில்லை. அங்கும் இருக்கலாம்)
பைபிளில் உள்ள ஏசு நாதர் பிறக்கும் கதையை விளக்கும் காட்சியாக இது அமைந்திருக்கும்.

Die Weihnachtskripe

Kinderweihnachtsmarkt - குழந்தைகளைக் கவர்வதற்காகவே இப்பகுதி சிறப்பாக ஏற்பாடு செய்யப்பட்டிருந்தது. ஏராளமான விளையாட்டு சாதனங்கள்.. இனிப்பு வகைகள்.. குழந்தைகள் குதூகலத்துடன் சந்தையில் பங்கு கொள்ளும் வாய்ப்பு.

பாருங்கள். சாண்டா போன்று உடை அணிந்து கொண்டு சாலையில் இசை விருந்தளிக்கும் ஒரு கலைஞர். அவருடைய நாய்குட்டியும் கிறிஸ்மஸ் கொண்டாடுகினறதோ..!

க்ளூ வைன் வேண்டுமா.. இங்கே செல்க!

சாண்டாக்கள் பரிசு மூட்டைகளோடு அலங்கார விளக்குகளின் வழியாக ஏறிச் செல்கிறார்களா.. என்னை மிகவும் கவரும் வடிவங்கள் இவை..

நுர்ன்பெர்க் சாஸெஜ் .. இங்கே சூடாகக் கிடைக்கும்.. சாசேஜ் பிரியர்களுக்கு.

நகர மையத்தில் விளக்குகளின் அழகில்..நுர்ன்பெர்க் நகரம்!

இங்கேயும் லேப்கூகன் கிடைக்கும்.. வாங்கிக்கலாம் வாருங்கள்.

எவ்வளவு அழகாக இந்தக் கூடாரம் அலங்கரிக்கபப்ட்டிருக்கிறது பாருங்களேன். இந்தக் கூடாரத்தில் எல்லோரும் குளிரை மறக்க சூடான க்ளூ வைன் வாங்கி அருந்தலாம்.

குதிரை சவாரி கூட இங்கே உண்டு. என்னுடைய கேமராவின் வெளிச்சம்.. குதிரைகளின் கண்களைக் கூசச் செய்து விட்டதோ.. :-)

இரண்டு கோபுரங்களுடன் தெரிவது லோரென்ஸ் கிர்ஷ (Nürnberg Lorenzkirche) தேவாலயம்

கிறிஸ்மஸ் சந்தை.. விளக்கு அலங்காரத்துடன்..

மெழுகுவர்த்திகள்.. எலி, நத்தை வடிவங்களில்..!

மெழுகுவர்த்திகள்.. யானை பூனை வடிவங்களில்..!

அலங்கார பொம்மைகள்..பல விதம்!

அலங்கார பொம்மைகள்..பல விதம்!

அலங்கார பொம்மைகள்..பல விதம்!

நிலவொளியில் நுர்ன்பெர்க்..!

கலைநயம் மிக்க Frauenkirche (பெண்கள் தேவாலயம்)
இதன் முன்னே அழகிய நீர்தொட்டி ஒன்றும் அமைந்திருக்கின்றது. இது நுர்ன்பெர்க் நகரி்ல் சுற்றுப் பயணிகளைக் கவரும் முக்கிய இடங்களில் முதன்மையானது.

நிலவொளியில் நுர்ன்பெர்க்..!

Frauenkirche முன்புறம் அமைந்துள்ள Schöner Brunnen.

நுர்ன்பெர்க் லேப்கூகன் (Lebkuchen)

2011-12-15T10:37:00.000-08:00

ஜெர்மனியில் பாயான் மாநிலத்தின் ஒரு முக்கிய நகரம் நுர்ன்பெர்க். கடந்த சில மாதங்கள் அங்கே பணி நிமித்தமாக வாசம் செய்யும் நிலை எனக்கு. நுர்ன்பெர்க் கிறிஸ்மஸ் மார்க்கெட் மிகப் பிரசித்தி பெற்ற ஒன்று. உலகின் பல மூலைகளிலிருந்து இங்கே இந்தச் சந்தையைப் பாக்க வருபவர்கள் பலர். நகரில் ஏறக்குறைய எல்லா தங்கும் விடுதிகளும் முழுதும் புக் செய்யபப்ட்டு விட்டன சுற்றுலா பயணிகளால். நான் தொடர்ந்து புக் செய்து வைத்திருந்ததால் எனக்கு பிரச்சனை இல்லாமல் போனது தங்கிக் கொள்ள.
சரி ..கிறிஸ்மஸ் சந்தைக்கு வருவோமே..

ஐரோப்பாவின் 10 சிறந்த கிற்ஸ்மஸ் சந்தைகளில் இதுவும் ஒன்று. http://www.travelintelligence.com/travel-writing/europe-s-top-10-christmas-markets பார்க்க!

இந்த கிறிஸ்மஸ் சந்தையின் அழகிய காட்சிகளின் புகைப்படங்களை நாளை பகிர்ந்து கொள்கிறேன்.

இந்த சந்தைக்கு சிறப்பு சேர்க்கும் மிக முக்கிய அம்சமான லேப்கூகன் (Lebkuchen) படங்கள் மட்டும் இன்று பதிகின்றேன்.

வாங்கி வைத்து தட்டில் வைக்கப்பட்ட லேப் கூகன்.

லேப் கூகன் ... சந்தையில் விற்பனைக்கு வைக்கப்பட்டுள்ளன.

லேப் கூகன் விற்பனை செய்யும் கூடாரம்.. அலங்கரிக்கபப்ட்டிருக்கும் விதம் கண்களைக் கவர்ந்தது.

சரி லேப்கூகன் எப்படி செய்கிறார்கள் என தெரிந்து கொள்ள விரும்புபவர்களுக்கு :http://germanfood.about.com/od/baking/r/nuernberger_lebkuchen.htm

நாளை முடிந்தால் சந்தையின் படங்களுடன் வருகிறேன்.

சுபா

எஸ்லிங்கனில் கிறிஸ்மஸ் மார்க்கெட்

2011-12-09T13:00:00.000-08:00

கிறிஸ்மஸ் மார்க்கெட் ஸ்டுட்கார்ட் அதன் சுற்று வட்டாரத்தில் அமைந்துள்ள பல சிறு நகரங்களிலும் கிராமங்களிலும் தினமும் நடைபெற்றுக் கொண்டிருந்தாலும் இந்தச் சுற்று வட்டாரத்தில் புகழ்பெற்ற ஒரு கிற்ஸ்மஸ் மார்க்கெட் என்று சொன்னால் அது எஸ்லிங்கன் நகரத்தின் Mittelaltermarkt (Medieval Market) ஐ த்தான் சொல்ல வேண்டும்.

எல்லோருக்கும் பழக்கமான தற்கால கிறிஸ்மஸ் மார்க்கெட் முன் புறம் அமைந்திருக்க அதனைச் தாண்டி சற்று உள்ளே நுழைந்தால் வருபவர்களை வரவேற்கும் இந்தப் பழங்கால மக்களின் சந்தை. இதில் என்ன சிறப்பு என்றால் இந்தப் பகுதியில் கடைகள் அமைத்திருப்போர் அனைவருமே பழங்கால மக்களின் ஆடைகளில் வீரகள் போலவும், படை வீரர்கள் போலவும் கிராமத்து பெண்கள் போலவும் உடை அணிந்து கடைகளில் விற்பனையில் ஈடுபட்டிருப்பதும் சுற்றிலும் உலாவருவதும் தான். இடைக்கிடையே பழங்கால மக்களின் உடைகளில் ஊர்வலமும் நடைபெறும்.

இந்த ஆண்டும் இங்கே சென்று வர மறக்கவில்லை. கிறிஸ்மஸ் மார்க்கெட் என்றலே என்னைக் கவர்வது எஸ்லிங்கன் கிறிஸ்மஸ் மார்க்கெட் தான்.

இங்கே கண்களுக்கும் விருந்து கிடைக்கும்; வயிற்றுக்கும் விருந்து கிடைக்கும். சூடான ரொட்டி, சீஸ் வெங்காயம் கலந்த Flamkuchen, இனிப்பு வகைகள், க்ளூ வைன் ஆகியவை எண்ணைக் கவர்ந்த உணவு வகைகள். உணவை ருசித்துக் கொண்டே சந்தையைச் சுற்றிப் பார்ப்பதும் ஒரு சுவையான அனுபவம் தானே.

சரி .. இந்த எஸ்லிங்கன் கிறிஸ்மஸ் மார்க்கெட்டில் எடுத்த சில புகைப்படங்களை உங்களுடன் பகிர்ந்து கொள்கிறேன். வாருங்கள்.. பார்த்து ரசிப்போம்!

உள்ளத்தைக் கொள்ளைக் கொள்ளும் எஸ்லிங்கன் நகரத்தின் எழில்!

கிறிஸ்மஸ் சந்தைக்குள் செல்வோமா ?

ஆ.. என்ன இது காட்டுப் பன்றிகள் கூறையின் மேலே.. ??

ஆஹா.. இவை இறைச்சி வகை உணவுகள் விற்கப்படும் கடையல்லவா.? வாருங்கள் வாருங்கள் என இறைச்சிப் பொருட்களை விரும்பும் வாடிக்கையாளர்களை அழைக்கும் காட்டுப் பன்றிகள்.

Mittelaltermarkt (பழங்கால மக்களின் சந்தை)க்குள் சென்று இங்கு என்ன இருக்கின்றது என பார்ப்போமா ?

ஆஹா.. நீண்ட குச்சியில் சுற்றப்பட்ட கோதுமை மாவு ரொட்டிகள். விட்டு வைப்பேனா.. நானும் என் கணவரும் நண்பர்களும் ஆளுக்கு ஒன்றை வாங்கி சுவைததோம். மெண்மையான ரொட்டி.. தக்காளி கலந்து தயாரிக்கிறார்கள். சுவை.. அபாரம்.

ரொட்டி தயாரிப்பு முறை.. சமையல் கலையில் ஆர்வமுள்ளோர் பார்த்துக் கொள்ளுங்கள்.

என்ன அது.. தலைகளாகத் தொங்குகின்றனவே.. தவறு செய்பவர்களின் தலைகளை இப்படித்தான் வெட்டி காயவைத்து தொங்க வைப்பார்களா.. கொடுமையாக இருக்கின்றதே..!

மிருகங்களின் தோல் ஏனைய பொருட்களைக் கொண்டு செய்யப்பட்ட பொருட்கள். முன்னர் ஆதிவாசிகளுக்கு மிருகங்களின் தோல், மயிர், கொம்புகள் பற்கள் ஆகியவை எவ்வளவு முக்கியமானவையாக இருந்திருக்கின்றன..!

ஆஹா.. இங்கே Flammkuchen கிடைக்கும். வாருங்களேன் வாங்கிச் சாப்பிடலாம்.

என்ன கணமான இரும்புச் சங்கிலி கவசம்.. இதை போட்டுக் கொண்டு ஆதிவாசி மக்களின் உடையில் க்ளூ வைன் அருந்துகிறார் இந்த இளைஞர்.

இங்கே க்ளூ வைன் கிடைக்கும். பட்டை தூள், சீனி கலந்த வைன் கொதித்துக் கொண்டிருக்கின்றது.

இதோ ஆரம்பித்து விட்டது அணிவகுப்பு..இசைக்கருவிகளை வாசித்துக் கொண்டு வருகின்றனர் இந்த வீரர்கள்.

இவரைப் பார்த்தாலே குழந்தைகள் பயந்து விடுவார்களே..!

இவள் யார் ..மோகினியா..அல்லது பயங்கரப் பேயா..??

ஜெர்மானியர்களைக் கவர்ந்த ப்ராட் வுர்ஸ்ட். மிகுந்த ஈடுபாட்டுடன் சமையல்காரர்கள் இவற்றைத் தயாரிக்கிறார்கள்.

முன்னரெல்லாம் எங்கே கேக் பிஸ்கட் வகைகள் கிடைக்கும்? பழங்களிலும் காய்கள் விதைகளில் தானே இனிப்பு வகைகளையும் தயாரித்து வைப்பார்கள். அந்த அனுபவத்தை இங்கே பெறலாம்.

இங்கே லெபனான் வகை ஃபலாஃபல் இந்திய பெயருடனும் ஒரு புதிய வகையில் கலக்கலாய் தயாரிக்கப்பட்டு விற்பனை செய்தார்கள். இதனை விட்டு வைப்போமா..? மாங்காய் சட்னி சாஸ், தயிர் கலந்து ஒன்றினை வாங்கிச் சாப்பிட்டோம். சுவை கொஞ்சம் பரவாயில்லை. கூடாரம் இருக்கும் அழகு போல உணவு அவ்வளவு சுவை இல்லை.

இரவின் இருட்டில் மங்கலான வெளிச்சத்தில் கூடாரங்களின் அழகு!

மெழுகுவர்த்தியில் எத்தனையோ வகை உண்டு. சிவபெருமான் உருவத்திலும் ஒரு மெழுகு வர்ததி நடுவே!

இங்கே பழங்கால வகை குளியல் எடுக்கலாம். காவலுக்கு ஒருவர் வாசலில் அமர்ந்திருக்கின்றார். வாசமான மூலிகைகள் கலந்து சூடான வெந்நீர் கொதித்துக் கொண்டிருக்கின்றது. இந்தக் குளிருக்கு சூடான குளியல் இதம் தானே!

காட்டுக்குள் வாழ்வதென்றால் வில் ஏந்தி அம்பு விடவும் தெரிந்திருக்க வேண்டும் என்று சொல்கிறாரே இந்த மனிதர்?

இங்கே கவசங்கள் விற்பனைக்குக் கிடைக்கின்றன. சண்டையிலிருந்து உங்களைத் தற்காத்துக் கொள்ள வேண்டுமா.. வாங்கிக் கொள்ளுங்கள்.

இரவின் ஒளியில் கூடாரங்கள்..!

மேஜிக் ப்ரூம் இங்கே வாங்கிக் கொள்ளலாம்.

கோஸ்பல் குழுவினர்.. சந்தையில் இசை விருந்து வைக்கின்றனர்.

அட்வெண்ட் முதல் ஞாயிறு

2011-11-27T14:32:00.000-08:00

கிறிஸ்மஸ் பண்டிகை இங்கு களை கட்டத் தொடங்கி விட்டது. கடந்த வியாழன் ஜெர்மனியின் நாடெங்கிலும் பல நகர்களிலும் சிறு கிராமங்களிலும் Weinachtsmarkt எனச் சொல்லப்படும் கிறிஸ்மஸ் சந்தை தொடங்கி விட்டது. சிறு கூடாரங்கள் அமைத்து அதில் கிறிஸ்மஸ் அலங்காரங்களைப் பல வடிவங்களில் செய்து விற்பனைக்குப் பொருட்களை வைத்து விற்பது வழக்கம்.

குறிப்பாக இவ்வித சந்தைகளில் விதம் விதமான மெழுகு வர்த்திகள், தேனீர் கலவைகள், வாசனை சோப்பு, வீட்டு அலங்காரப் பொருட்கள், கிறிஸ்மஸ் சிறப்பு இனிப்புப் பண்டங்கள் ஆகியவை கிடைக்கும். சூடான க்ளூ வைன் அருந்துவது இந்த கிறிஸ்மஸ் சந்தைக்கு வந்து செல்வோர் அனைவரின் விருப்பமும் கூட.

இங்கு கிடைக்கும் மெழுகுவர்த்திகள் பல்வேறு வகையில் தயாரிக்கப்பட்டிருப்பதைக் காணலாம். குறிப்பாக தேனில் கலந்து செய்யப்பட்ட மெழுகுவர்த்திகள் , பழங்கள் கலந்து தயாரிக்கப்பட்ட மெழுகுவர்த்திகள், பூக்கள் கலந்து தயாரிக்கப்பட்டவை, மூலிகை இலைகள் கலந்து தயாரிக்கப்பட்டவை என விதம் விதமாக் கண்களைக் கவரும் வகையில் இவை கிடைக்கும்.

தேனீர் கலவைகளில் பலவகைகளைக் வைத்திருப்பார்கள். ஆரஞ்சுடன் கலந்த தேனீர், பல்வேறு மூலிகைகள் கலந்தவை, உலர்ந்த பழங்கள் சேர்க்கப்பட்டவை, என இவற்றிலும் வித்தியாசங்களைக் காணலாம். நான் இம்முறை கிற்ஸ்மஸ் தேனீர் எனப்படும் மூலிகைகள் கலந்த தேனீர் கலவை வாங்கியிருக்கிறேன்..

அதோடு பிரத்தியேகமாக இந்த கிற்ஸ்மஸ் சந்தைகளில் வகை வகையான தேன்களையும் விற்பனைக்கு வைத்திருப்பார்கள், காட்டு மரங்களின் பூக்களிலிருந்து கிடைக்கும் தேன், லவென்டர் பூக்களிலிருந்து கிடைக்கும் தேன் என இவற்றிலும் பலவற்றை சாப்பிட்டுப் பார்த்து நமக்குப் பிடிக்கும் தேனை வாங்கிக் கொள்ளலாம். இம்முறை கிற்ஸ்மஸ் மரத்தின் ஒருவித பூவிலிருந்து எடுக்கப்படும் தேன் ஒன்றினை வாங்கியிருக்கின்றேன். மென்மையான, அதே சமயம் வித்தியாசமான இனிப்புச் சுவை கொண்ட தேன் இது.

அலங்கரிக்கப்பட்ட ஒவ்வொரு கூடாரங்களையும் பார்ப்பது மகிழ்ச்சியான ஒரு விஷயம். மிக அழகாக நேர்த்தியாக வடிவமைக்கப்பட்டு இருக்கும் இவற்றின் கூறை பகுதி தான் கண்கவர் காட்சியாக அமைந்து விடும்.

இந்தக் கூடாரங்கள் கிறிஸ்மஸ் நாளிற்கு இரண்டு நாள் வரை வைத்திருப்பார்கள். ஏறக்குறைய 27 அல்லது 28 நாட்கள் இக்கூடரங்களின் சொந்தக்காரர்கள் அதே இடத்தில் தங்கள் விற்பனையை நடத்திக் கொண்டிருப்பார்கள்.

கிற்ஸ்மஸ் பண்டிகையைக் கொண்டாடும் அனைத்து நண்பர்களுக்கும் என் முதல் அட்வெண்ட் ஞாயிறு வாழ்த்துக்கள்.

அன்புடன்
சுபா

ஆமைகள் வீட்டில் வளர்ப்புப் பிராணியாக...!

2011-11-19T09:05:00.000-08:00

பூனைகள், நாய்கள், முயல்கள், பறவைகள், மீன்கள் .. இவை பலருக்கு வளர்ப்புப் பிராணிகளாக அமைந்து விடுகின்றன. ஜெர்மனியில் குதிரைகள், கழுதைகள், ஆடுகள், மாடுகள், பன்றிகள் சேவல், வாத்துக்கள், போன்றவை பெருமளவில் தொழில் நிமித்தம் வளர்க்கப்பட்டாலும் இவைகளையும் செல்லப்பிராணிகளாகக் கருதி அன்பு காட்டும் பலர் இருக்கின்றனர். கடந்த சில வாரங்களுக்கு முன்னர் எனது உறவினரின் வீட்டிற்குச் சென்றிருந்த போது அவர்களின் செல்லப்பிராணியான ஆமைகள் பற்றிச் சொல்லிக் கொண்டிருந்தார்கள். அவர்களின் வீட்டிலேயே இரண்டு பெரிய ஆமைகள் இருக்கின்றன. அந்த ஆமைகள் ஏப்ரல் மாத வாக்கில் இட்ட முட்டைகளில் பல பொரிக்காமல் போனதில் அவர்களுக்கு மிகுந்த மன வருத்தம். தப்பிப் பிழைத்து 5 ஆமைக் குஞ்சுகள் உயிரோடு இருக்கின்றன. இவற்றில் மூன்றை வேறொரு நண்பருக்குக் கொடுத்து விட்டு 2 குட்டி ஆமைகளையும் பெரிய ஆமைகளையும் மட்டும் வைத்திருக்கின்றார்கள்.

நான் சென்ற சமயம் குளிர் காலத்தின் ஆரம்பம் என்பதால் ஆமைகளை ஒரு பெட்டியில் தங்க/தூங்க வைத்திருக்கின்றார்கள். அப்பெட்டியில் முதலில் நல்ல கடற்கரை மணலை போட்டு அதன் மேல் காய்ந்த சருகுகளைப் பரப்பி விடுகின்றார்கள். அதன் மேல் பெரிய ஆமையை வைத்து அதற்கு மேலே காய்ந்த சருகுகளைப் போட்டு மூடி விடுகின்றார்கள். ஒரு பெரிய ஆமைக்கு ஒரு பெரிய பெட்டி தேவைப்படுகின்றது. பெரிய ஆமையின் ஓட்டின் அளவு ஏறக்குறைய 30 செ.மீ. நீளமாக 25 செ.மீ. அகலமாக இருக்கலாம் .

ஆமைக்குஞ்சுகள் இரண்டுக்கும் ஒரு பெட்டி அமைத்திருக்கின்றார்கள்.

பெட்டிக்குள் இருக்கும் பெரிய ஆமை நீண்ட உறக்கத்தில் இருப்பதால் அதனை நான் புகைப்படம் எடுக்கவில்லை. குட்டி ஆமைகள் பெட்டிக்குள்ளே அங்கும் இங்கும் ஓடிக் கொண்டிருந்தன. அவற்றை வெளியே தூக்கி வந்து சற்று வெயிலில் வைத்து நகர வைத்து பார்த்தோம்.

மிக அழகான விலங்குகள் தாம் ஆமைகள்.

இங்கே ஆமைகளை வீட்டில் வளர்ப்பதற்கு உள்ளூர் நகராட்சி மையத்தில் அனுமதி பெற வேண்டியுள்ளது. ஒவ்வொரு ஆமைக்கும் அதனை வளர்ப்பதற்காக ஒரு சான்றிதழ் பெற வேண்டியுள்ளது. புதிதாகப் பிறந்த இந்த இரண்டுக்கும் சான்றிதழ்கள் தயாரித்து விட்டனர். பதியும் போது கட்டணமும் கட்ட வேண்டிய அவசியம் உள்ளது.

கோடைக் காலத்தில் இந்த ஆமைகளைச் சாதாரணமாகச் செடிகள் இருக்கும் இடத்தில் வைத்து வேலி போட்டு விடுகின்றனர். இதனால் ஆமைகள் வெளியே போகாமல் இருக்க உதவுகின்றது. கேரட் தக்காளி போன்ற காய்கறிகளைச் சாப்பிட்டுக் கொண்டு இந்தப் பகுதியிலேயே இவை சுற்றிக் கொண்டிருக்குமாம். குளிர்காலம் முழுவதும் பெட்டிக்குள்ளேயே உறங்குவதுதான் இவற்றின் வேலை. 6 மாதம் வெளி உலகம் ஆறுமாதம் நீண்ட உறக்கம் என இந்த ஆமைகள் இங்கே வாழ்கின்றன.

அன்புடன்
சுபா

இலையுதிர் காலத்து கோலங்கள்

2011-11-06T09:34:00.000-08:00

நான் வசிக்கும் ஜெர்மனியின் தெற்குப் பகுதி நகரமான லியோன்பெர்க்கில் இலையுதிர்காலம் தொடங்கி விட்டது. இது சிறிய நகரமென்றாலும் காட்டுப் பகுதியை ஒட்டிய ஒரு நகரம் என்றே சொல்லலாம். கோடைகாலத்தில் பச்சை பசேலென காட்சியளிக்கும் காடுகள் இலையுதிர் காலத்தில் இலைகளின் நிறம் மஞ்சளாக, இளம் சிவப்பாக கருஞ்சிவப்பாக உருமாறி பின் பழுப்பு நிறமாகி தன்னை மரத்திலிருந்து விடுவித்துக் கொண்டு உதிரிந்து விடுகின்றன.

லியோன்பெர்க்கின் இலையுதிர் காலத்து அழகை என் கேமராவில் இன்று பிடித்து வைத்தேன். பாருங்களேன்.

உதிர்ந்து கிடக்கும் இலைகள்

நிறம் மாறிக்கொண்டிருக்கும் ஆப்பிள் மரங்கள்

கிறிஸ்மஸ் விழாவுக்கு தயாராகும் கிறிஸ்மஸ் மரங்கள்

உதிர்ந்த சருகுகள் குருவிக்கு வீ(கூ)டு

உடைந்த கிளைக்ளில் பச்சை பாசி

தென்னிந்திய சினிமா கலைஞர்களின் நிகழ்ச்சி

2011-10-31T12:41:00.000-07:00

ஐரோப்பாவில் என்றாவது ஒருமுறை தென்னிந்திய சினிமா கலஞர்களின் நிகழ்வுகள் நடப்பது வழக்கம். அப்படியே ஏற்பாடு செய்து நடந்தாலும் பெறும்பாலும் லண்டன், சுவிஸர்லாந்தில் பெர்ன் நகரிலோ அல்லது ப்ரான்ஸில் பாரிஸிலோ நடைபெறுவது உண்டு. ஒரு மாற்றமாக ஸ்டுட்கார்ட் நகரில் நேற்று ஒரு இசை நிகழ்ச்சி ஏற்பாடாகியிருந்தது. சனிக்கிழமை எனக்கு மின்னஞ்சலில் வந்திருந்த தகவலை வைத்து தொலைபேசியில் அழைத்து விசாரித்ததில் நிகழ்ச்சி நடைபெறுவது உண்மைதான் என்று உறுதியானதும் எனக்கும் ஒரு டிக்கெட் பதிவு செய்து கொண்டேன்.

லக்‌ஷ்மன் ஸ்ருதி இசைக் குழுவினர் பிரபல தமிழ் சினிமா பாடகர்கள் ஷைந்தவி, மாலதி, க்ரிஷ், ஹரிசரன் ஆகியோருடன் வந்திருந்து நிகழ்ச்சியை நடத்தினர்.

தொலைபேசியில் அழைத்து விசாரித்த போது மாலை 4 மணிக்கு நிகழ்வு என்று தெரிந்து சரியாக நான்கு மணிக்குச் சென்று விட்டேன். நான் எதிர்பார்த்ததற்கும் மாறாக ஒரு துருக்கியர்கள் திருமண மண்டபம் போன்ற ஒன்றில் இந்த நிகழ்வு ஏற்பாடாகியிருந்தது. ஏறக்குறை 4:30 மணிக்குத்தான் கதவை திறந்து உள்ளே அனுமதித்தனர். உள்ளே அனுமதிக்கப்பட்டாலும் மேடையில் கலைஞர்களின் இசைக் கருவிகள் ஒழுங்கு செய்ய அதிக நேரம் எடுத்துக் கொண்டதால் மாலை 6:20க்குத் தான் நிகழ்ச்சியைத் தொடங்கினர். அதில் பல தொழில் நுட்பச் சிக்கல்கள். ஏற்பாட்டில் நிகழ்ந்த சிற்சில பிரச்சனைகள் சரியான நேரத்திற்கு நிகழ்ச்சியை ஆரம்பிப்பதில் பிரச்சனையை ஏற்படுத்தி விட்டது.

நிகழ்ச்சியை ஆரம்பிக்க சிங்கையிலிருந்து வந்திருந்த ஒரு நடனக்குழுவினரின் நாட்டிய நிகழ்ச்சி நடை பெற்றது. நடனம் ஏமாற்றமாகவே அமைந்து விட்டது. பாடகர்களில் முதல்பாடலை ஆரம்பித்து வைத்தார் ஷைந்தவி. மிக அருமையான குரலில் இனிமையாக குறையொன்றுமில்லை என்ற கீர்த்தனையுடன் நிகழ்ச்சி தொடங்கியது. இதனைத் தொடர்ந்து பாடகி மாலதி ஒரு பாடல் பாட பாடகர் ஹரிசரன் வந்து ஒரு சினிமா பாடலை பாடினார். அதற்குப் பிறகு பாடகர் க்ரிஷ் டி.ஆர்.ராஜேந்திரனின் சலங்கையிட்டாள் ஒரு மாது எனும் பாடலை பாடி மகிழ்வித்தார். இவருக்கு மிக நல்ல தமிழ் உச்சரிப்பு. ஏனைய சினிமா பிரபலங்கள் போல் இல்லாமல் தயங்காமல் மிகச் சரளமாகத் தமிழ் பேசுகின்றார். அத்துடன் மேடையை விட்டுடிறங்கி வந்து பொது மக்களில் சிலரையும் பாட வைத்து கலாட்டா செய்து வந்திருந்தவர்களை மகிழ்ச்சி படுத்தினார்.

திரு.லக்‌ஷ்மணன் நல்ல மிமிக்ரி கலைஞர் என்பதை தெரிந்து கொள்ள முடிந்தது. மிக நல்ல திறமையுடயவர். எல்லோரும் ரசித்து சிரிக்கும்படி மிமிக்ரி செய்து காட்டினார்.

அத்தனை பிரச்சனைகளையும் மேடையில் இருந்து சமாளித்துக் கொண்டே நிகழ்ச்சியை முடிந்தவரை நல்ல முறையில் கொண்டு செல்ல ப்ரயத்தனம் செய்து கொண்டிருந்தார். இடையிடையே மைக் செட் ஏற்பாடு செய்யும் ஊழியர் குறுக்கிட்டு தனது வேலையைச் செய்து கொண்டிருந்தாலும் பொறுமையுடன் அதனையும் சுவாரஸியமாக மாற்றி நிகழ்ச்சியைக் கொண்டு சென்றார். அதறகு எனது பாராட்டுக்கள்.

இந்த பாடகர்களோடு சிறுமி அமுதா, குமாரி.பிரியா ஆகியோரும் மிக அருமயான பாடல்களை வழங்கினர்.

நேரம் அதிகமாகிவிட்டதால் நான் இரவு 9 மணிக்கு புறப்பட்டு விட்டேன். நிச்சயம் மேலும் 2 மணி நேரங்கள் நிகழ்ச்சி நடைபெற்றிருக்கும் என்றே நினைக்கிறேன்.

அடுத்த முறை இம்மாதிரி நிகழ்வுகளை செய்ய வருபவவர்கள் ஒரு நாள் முன்னரே வந்து தயாரிப்பு ஏற்பாடுகளையும் சரியாக இருக்கின்றதா எனக் கவனித்துக் கொள்வது கலைஞர்கள் எந்த தடங்கலும் பிரச்சனையும் இல்லாமல் நிகழ்ச்சிகளை நடத்த உதவும். இதனை மனதில் கொண்டு செயல்பட்டால் தரமான இந்த இசைக் கலைஞர்கள் தங்கள் படைப்புக்களை திருப்தியாகச் செய்து முடித்து மன மகிழ்ச்சியுடன் திரும்பலாம்.

படங்கள்...

சிங்கை நடனக் குழுவினர்

இசைக்குழுவினர்

செல்வி.அமுதா

பாடகர் க்ரிஷ் மற்றும் திரு.லக்‌ஷ்மன்

பாடகர் ஹரிசரன்

பாடகி ப்ரியா

அன்புடன்
சுபா

ஷோன்புஹ் காட்டுக்குள் ..Schönbuch Wald

2011-10-08T23:46:00.001-07:00

காடுகளில் நடந்து காட்டு மரங்களையும் செடிகளையும் வன விலங்குகளையும் பறவைகளையும் பார்ப்பது என்பது நான் சில ஆண்டுகளாக வளர்த்துக் கொண்ட ஒரு பொழுது போக்கு. ஓய்வு நாள் அமைந்து விட்டால் இவ்வகையில் ஏற்பாடு செய்து நண்பர்களுடன் செல்வது வழக்கமாகி விட்டது. கடந்த 3ம் தேதி இங்கே நாடு முழுவதும் விடுமுறை நாள். எந்த வருடமும் இல்லாத வித்தியாசமாக இந்த வருடம் அக்டோபர் மாதத்திலேயே 26 டிகிரி வெயில். ஆக அருமையான நடைப்பயணத்திற்கு தகுந்த நாள் இது என்று முடிவு செய்து நான் என் கணவர் மற்றும் எங்கள் நண்வர்கள் வெர்னரும் நிக்கோலாவும் ஒரு நாள் நடைப்பயணத்தை ஏற்பாடு செய்து சென்று வந்தோம். வெர்னரும் நிக்கோலாவும் தம்பதியர். என் கணவரின் பொழுது போக்கு இசைக்குழுவிலும் இவர்கள் இருவருமே பாடகர்கள். வெர்னர் போலீஸ் அதிகாரி. நிக்கோலா பள்ளி ஆசிரியையாக உள்ளார். இந்த முறை நாங்கள் செல்ல தேர்ந்தெடுத்த இடம் ஷோன்புஹ் காட்டுப் பகுதி (Schönbuch Wald). இது சுற்றுச் சூழல் பாதுகாப்பு மையத்தால் பாடுகாக்கப்படும் ஒரு பகுதி.

வாகனங்கள் செல்ல இங்கே அனுமதி இல்லை. சைக்கிள் அனுமதிக்கப்படுகின்றது. இங்கே ஆங்காங்கே சிறு குடிசைகள் அமைத்திருப்பதால் சிலர் குடும்பத்துடன் அல்லது நண்பர்களுடன் வந்து பிக்னிக் செய்வதற்கு ஏதுவாக அமைந்துள்ளது. எங்கள் பயணம் ஷோன்புஹ் காட்டுப் பகுதியின் தெற்கில் Schloß Roseck ( ரோஸேக் கோட்டை) யில் ஆரம்பித்து வடக்குப் பகுதி எல்லை வரைசென்று மீண்டும் ஆரம்பித்த இடத்திற்கே வருவது என்று ஏற்பாடு செய்திருந்தோம். ஆனால் இடையில் நல்ல பசி ஏற்பட்டதாலும் பாதையில் எந்த உணவுக்கடைகளும் இல்லாத நிலை என்பதாலும் பாதியிலேயே முடித்துக் கொண்டு கீழ் நோக்கி பயணத்தை ஆரம்பித்த இடத்திற்கே வந்து சேர்ந்து மாலை உணவு சாப்பிட்டு திரும்பினோம்.

Schloß Roseck அரச குடும்பத்தினரின் கோட்டையாக தற்சமயம அரசாங்கத்தால் பராமரிக்கபப்டும் ஒரு முதியோர் இல்லமாக இருக்கின்றது. இந்த கோட்டைப் பகுதியைக் கடந்து 5 கிலோ மீட்டர் தூரம் நடந்தால் பாதுகாக்கப்பட்டுள்ள வனப்பகுதியை வந்தடையலாம். மிகப் பெரிய நிலப்பரப்பு. இதனை முழுதும் சுற்றிப் பார்க்க 3 நாட்கள் தேவைப்படலாம். இந்த பகுதிக்குச் செல்ல மைத்துள்ல பாடை களில் ஆப்பிள் மரங்கள். இப்போது பழங்கள் தயாராகியிருக்கும் சமையம் என்பதால் வழில் ஆப்பிள் மரங்களையும் கனிகளையும் ரசித்துக் கொண்டே சென்றோம்.

காலை 11 மணிக்கு ஆரம்பித்து மாலை 5 மணி வரையில் ஏறக்குறை 25 - 28 கிலோமீட்டர் தூரம் அமைந்த நடைப்பயணம். இதமான வெயில், நல்ல காற்று, கண்களையும் உள்ளத்தையும் கொள்ளைக் கொள்ளும் இயற்கை அழகு, ஆங்காங்கே தென்படும் சிறு குடில்கள், வனத்தில் கிரீச் க்ரீச் என ஒலிக்கும் பறவைகளின் ஒலி, ஆங்காங்கே தலையை எட்டிப் பார்க்கும் சின்ன சின்ன பூக்கள், காளான்கள், காற்றில் அசைந்து ஆடும் புற்கள்.. இவை மனதை லேசாக்கும் மருந்தாக அமைந்தன.

அதிலும் நண்பர்களுடன் இணைந்து செல்வது என்பதும் சுவாரசியம் தானே. பல கதைகளைப் பேசிக் கொண்டே செல்வது தூரத்தை அறியாத வண்ணம் பயணத்தை இலகுவாக்கி விடுகின்றது.

இந்த ஷோன்புஹ் காட்டுப் பகுதியைப் பற்றிய தகவல்களை http://www.naturpark-schoenbuch.de/naturpark/index.shtml வலைப்பக்கத்தில் அறிந்து கொள்ளலாம். அனைத்தும் டோய்ச் மொழியில் இருந்தாலும் இங்குள்ள இரண்டு விழியங்கள் மிக நன்றாக இந்தப் பாதுகாக்கப்படும் வனப்பகுதியை விளக்குவனவாக அமைந்துள்ளன. அதிலும் ஒன்று இங்குள்ள விலங்குகள், பறவைகள் பற்றிய நல்ல விளக்கமாக அமைந்துள்ளன.

அக்டோபர் 7ம் தேதிவரை இங்கு இலை உதிர்காலம் வரவில்லை. இந்த ஆண்டு நீண்ட கோடைக்காலத்தை அளித்த இயற்கைக்கு நன்றி.

மேலும் சில படங்கள்:

அன்புடன்
சுபா

ஈஸ்டர் பண்டிகை ஏற்பாடுகள்

2011-04-16T14:08:00.000-07:00

வருகின்ற வெள்ளிக்கிழமை உலகம் முழுதும் உள்ள கிறிஸ்துவ சமயத்தைப் பேணும் நண்பர்கள் புனித வெள்ளி கொண்டாட உள்ளனர். இங்கு ஜெர்மனியில் இதனை ஒட்டி எப்போதும் வெள்ளிக்கிழமையும் அதனை அடுத்து அவரும் திங்கள் கிழமையும் நாடு முழுவதும் பொது விடுமுறையாகக் கொண்டாடப்படுகின்றது.

புனித வெள்ளிக்குத் தேவாலயத்திற்குச் சென்று மக்கள் வழிபடுவது ஒரு புறமிருக்க அந்த நான்கு நாட்கள் குடும்பத்தினர் ஒன்று கூடி மகிழ்ச்சியுடன் இருக்கும் ஒரு விழாவாக கொண்டாடப்படுவதையே இங்கு நான் பார்க்கின்றேன். பொதுவாகவே கிற்ஸ்மஸ் போல இங்கே ஏறக்குறைய மூன்று வாரங்களுக்கு முன்னரே சிறிய அங்காடிக் கடைகள் போடப்பட்டு பரிசுப்பொருட்கள் விற்பனைக்கு வைக்கப்பட்டிருப்பதை நாம் காண முடியும். குடும்பத்தில் உள்ள அனைவருக்கும் பரிசுப் பொருட்களைச் சேகரிப்பது இக்கால கட்டத்தில் மிக முக்கியமான ஒரு விஷயம்.

குழந்தைகள் என்று எடுத்துக் கொண்டால் அவர்களுக்கு இந்த நான்கு நாட்களுமே கொண்டாட்டமாகத்தான் இருக்கும். பல வர்ணங்களில் அலங்கரிக்கப்பட்ட முட்டைகளை கடைகளில் காட்சிக்கும் விற்பனைக்கும் வைத்திருப்பதைக் காணலாம். உணவு விடுதிகளில் சாப்பிட்டு விட்டு புறப்படும் போது தட்டில் ஒரு வர்ணம் பூசிய அவித்த முட்டையை வைத்துத் தருவார்கள். இதுவும் ஒரு வழக்கம். அதிலும் குறிப்பாக ஜெர்மானிய மற்றும் கிரேக்க பழமையான உணவகங்களில் இந்த நடைமுறை வழக்கில் இருப்பதை நான் அனுபவப்பூர்வமாகப் பார்த்திருக்கின்றேன்.

ஞாயிற்றுக் கிழமை தான் கொண்டாட்டம் மிகுந்த நாள். அன்று வர்ணம் பூசிய முட்டைகளைச் செடிகளுக்கும் புதர்களுக்குள்ளும் மறைத்து வைத்து விடுவார்கள் பெற்றோர்கள். இந்த முட்டைகளை ஈஸ்டர் முயல்கள் ஒளித்து வைத்துள்ளன என்று சொல்லி அவற்றை கண்டுபிடிக்கச் சொல்வர் பெற்றோர். குழந்தைகள் இந்த முட்டைகளை தேடி கண்டு பிடித்துக் கொண்டு வர வேண்டும். முட்டை வேட்டை என்பது இந்த பண்டிகையின் போது மிக முக்கியமாக அதிலும் குழந்தைகள் இருக்கின்ற குடும்பங்களில் தவிர்க்க முடியாத ஒரு அங்கம். புனித வெள்ளி அன்று பெரும்பாலான கிறிஸ்துவர்கள் அதிலும் பழமையான கலாச்சாரத்தை உறுதியாகப் பின்பற்றுபவர்கள் மதிய உணவில் மீன் சாப்பிடுவதை வழக்கமாகக் கொண்டிருக்கின்றனர். விதம் விதமான மீன் சமையல் உணவு அன்று உணவங்களில் பிரத்தியேகமாக தயாரிக்கப்படும்.

Frohe Ostern (ஃப்ரோ ஓஸ்டர்ன்) Happy Ester என்று நாம் சந்திக்கும் ஒவ்வொருவருக்கும் இந்த நாளில் மக்கள் வாழ்த்துப் பரிமாறிக் கொள்வர். வெள்ளியிலிருந்து திங்கள் மாலை வரை இந்த வாழ்த்துப் பரிமாற்றம் இருக்கும். தேவாலயங்களில் சனிக்கிழமை மாலை பெரிய அளவில் அதிலும் கத்தோலிக்க தேவாலயங்களில் மிகச்சிறப்பாக ஏற்பாடு செய்யப்பட்ட பூஜைகள் (mass prayer) ஞாயிற்றுக் கிழமை காலை வரை நடைபெறும். Ostersonntag - ஈஸ்டர் ஞாயிறு அன்று குடும்பத்தினர் அனைவரும் ஒன்று கூடி மதிய உணவு சேர்ந்து உண்பது சிறப்பான ஒரு வழக்கம். Osterhase (ஈஸ்டர் முயல்) இந்த பண்டிகையில் சிறப்பு அங்கமாக இருக்கின்றது. அதே போல ஈஸ்டர் மரமும் ஒரு சிறப்பு அங்கமே. ஈஸ்டர் மரம் என்பது ஏதாவது ஒரு மரத்திலோ அல்லது செடியிலோ வர்ணம் பூசி அலங்கரிக்கப்பட்ட முட்டைகளைக் கட்டி தொங்கவிட்டு வைப்பது. ஆக இந்த இரண்டு அங்கங்களும் குழந்தைகளின் மன மகிழ்ச்சிக்காக செய்யப்படுபவையாகக் கருதப்பட்டாலும் ஏறக்குறைய எல்லா இல்லங்களிலும் இந்த நாளின் போது செயற்கை (ப்ளாஸ்டிக்) முட்டைகள் கட்டி அலங்கரிக்கப்பட மரங்களைக் காண்பது சகஜம்.

இன்று மதியம் எங்கள் தெருவில் உள்ள அங்காடிக்கடைக்குச் சென்றபோது அங்கு ஈஸ்டர் பண்டிகையை முன்னிட்டு செய்யபப்ட்டிருந்த அலங்காரக் காட்சிகள் சிலவற்றை புகைப்படங்கள் எடுத்தேன். அவை இங்கே.

முயல் ஈஸ்டர் முட்டைக்கு வர்ணம் பூசும் இரு ஈஸ்டர் முயல்கள்

ஈஸ்டர் வாழ்த்து சொல்லும் முட்டையை தயாரித்து விட்டன இந்த ஈஸ்டர் முயல்கள்

முட்டைகளை அலங்கரிக்கும் ஈஸ்டர் முயல்

ஈஸ்டர் முயல் (முழுதும் சாப்பிடக்கூடியது)

ஈஸ்டர் முயல்கள் பலகாரங்கள் தயாரிக்கின்றன..

ஈஸ்டர் மரங்களை அலங்கரிக்கும் ஈஸ்டர் முயல்கள்

ஈஸ்டர் பண்டிகைக்காகப் பிரத்தியேகமாக இனிப்பு பண்டங்கள், சாக்லேட்டுகள்

குழந்தைகளை மகிழ்விக்க பொம்மை விளையாட்டு கதை சொல்லும் பொம்மை...!

ஜெர்மனியில் மூடப்படும் அணு மின்சக்தி உற்பத்தி ஆலைகள்

2011-03-18T07:46:00.000-07:00

இன்றைய காலை நிலவரப்படி 2 அணு மின்சக்தி உற்பத்தி ஆலைகள் ஜெர்மனியில் இன்று மூடப்படுகின்றன. அவை பிலிப்ஸ்பெர்ர்க்கில் உள்ள அணு மின்சக்தி ஆலை ஒன்றும் நெக்கார்வெஸ்ட்ஹைம் நகரில் உள்ள ஆலை ஒன்றுமாகும். ஜப்பானில் நிகழ்ந்த பேரிடரின் அடிப்படையில் இந்த முடிவு கடந்த சில தினங்களில் எடுக்கப்பட்டுள்ளது. ஏற்கனவே பல முறை அமைதி போராட்டங்கள் அணு சக்தி கழிவு அகற்றும் முறை, மற்றும் இவ்வாலைகள் தொடர்பில் நடந்து வருவதும் குறிப்பிடத்தக்கது.

பிலிப்ஸ்பெர்ர்க்கில் உள்ள அணு மின்சக்தி ஆலை

குறிப்பு: பிலிப்ஸ்பெர்ர்க் நகரில் தான் முன்னாள் டென்னிஸ் வீராங்கனை ஸ்டெபி க்ராவ் வசிக்கின்றார்

நெக்கார்வெஸ்ட்ஹைம் நகரில் உள்ள அணு மின்சக்தி ஆலை

ஜெர்ம்னியில் உள்ள மொத்தம் 17 அணு மின்சக்தி உற்பத்தி ஆலைகளில் 7 மிகப் பழையவை. மேலே குறிப்பிடப்பட்ட இரண்டுமே இந்த ஏழில் அடங்கும். 2017ம் ஆண்டிற்குப் பின் ஜெர்மனிக்கு அணு மின்சக்தி உற்பத்தி ஆலைகள் தேவையிருக்காது என்று குறிப்பிடப்படுகின்றது.

குளிர்காலப் பனி மழை தொடங்கி விட்டது..!

2010-11-27T01:56:00.000-08:00

நேற்று அதிகாலையே பனி மழை பெய்யத்தொடங்கியதால் எங்கும் பாற்கடல் போன்ற பனி. நேற்று நாள் முழுக்க கொட்டியதில் இன்றும் பனி கரையாமல் இருக்கின்றது. சில படங்கள் இங்கே இணைத்திருக்கின்றேன் .. இன்று காலை என் சிறு தோட்டத்தில் எடுக்கப்பட்டவை.

செடிகள் பச்சை நிறத்தை மறைத்து வெள்ளை ஆடை உடுத்தியிருக்கின்றன..

புத்தருக்கும் பனியின் புண்ணியத்தில் புதிய சிகை அலங்காரம்..:-)

குருவிகளின் வீட்டையும் பனி அலங்கரித்திருக்கும் காட்சி..!

அன்புடன்
சுபா

இன்றைய தேதியில் ஜெர்மனியில் நிகழ்ந்த 2 முக்கிய சரித்திர நிகழ்வுகள்

2010-11-09T12:22:00.000-08:00

யூத இனத்தவர்களை ஜெர்மனியிலிருந்து வெளியேற்ற மிகத் தீவிரமான முயற்சிகள் எடுக்கப்பட்டிருந்த காலகட்டமான 2ம் உலக யுத்த நேரத்தில் வரலாற்று முக்கியத்துவம் வாய்ந்த Crystal Night நிகழ்வு 9,10, தேதி நவம்பர் மாதம் 1938ல் நிகழ்ந்தது. இந்த Crystal Night ஜெர்மனி முழுமைக்குமாக ஏறக்குரை 7500 யூதர்களின் வனிகத் தலங்கள் எரித்து சாம்பலாக்கப்பட்டன. ஏறக்குறைய 400 சினாகோக் (யூத தேவாலயங்கள்) எரித்து அழிக்கப்பட்டன. இதே நாளில் 20,000க்கும் மேற்பட்ட யூதர்கள் concentration camps களில் அடைக்கப்பட்டனர்.

1989ம் வருடம் இந்த 9ம் திகதியில் கிழக்கு ஜெர்மனி அரசாங்கம் மேற்கு பெர்லினுக்கும் பொதுவாக மேற்கு ஜெர்மனிக்கும் செல்ல அனுமது அளித்து இரும்புக் கதவுகளை திறந்த நாள். இன்றைய ஜெர்மன் தலைமுறை மக்களுக்கு இது வரலாற்று முக்கியத்துவம் நிறைந்த ஒரு நாள்.

இந்த இரண்டு நிகழ்வுகளையும் நினைவு கூறும் பல நிகழ்வுகள் ஜெர்மனி முழுதும் இன்றைக்கு ஏற்பாடாகியிருக்கின்றன. மேலும் வாய்ப்பு கிடைக்கும் போது இந்த வரலாற்று நிகழ்வுகளைப் பற்றி தொடர்ந்து எழுதுகின்றேன்.

அன்புடன்
சுபா

தீப ஒளித் திருநாள் 2010

2010-11-08T12:24:00.000-08:00

தீபாவளி நவம் 5ம் தேதி. இதற்கு அடுத்த நாளான 6ம் தேதி இங்கு ஸ்டுட்கார்ட் நகரில் தீப ஒளித் திரு நாள். என்ன ..ஸ்டுட்கார்ட்டில் தீபாவளியா என அதிசயிக்க வேண்டாம். இது Lichterfest என்றழைக்கப்படும் ஒரு விழா. அதிர்ஷ்டவசமாக நம் தீபாவளியும் ஸ்டுட்கார்ட் தீபத் திரு விழாவும் ஒன்றை அடுத்து ஒன்றாக இங்கு நிகழ்ந்தன.

ஸ்டுட்கார்ட்டில் பொதுவாகவே எப்போதும் மாலை 8 மணிக்கெல்லாம் கடைகள் மூடப்பட்டு விடும். ஆனானல் இந்த தினத்தில் நள்ளிரவு பன்னிரெண்டு வரை கடைகள் திறந்திருந்தன. மக்கள் கூட்டம் அதிகரித்து மாபெரும் திரு விழா போல காட்சியளித்தது ஸ்டுட்கார் நகரின் மையச் சாலையான கூனிக் ஸ்ட்ராஸா. (அரச சாலை)

இந்த நிகழ்ச்சியின் முக்கிய அம்சங்களாக இருந்தவை இரண்டு விஷயங்கள்.
1.பல இசைக் குழுக்கள் இந்த நிகழ்வில் ஆங்காங்கே பங்கெடுத்துக் கொண்டன.
2.சாலை எங்கும் வைக்கப்பட்டிருந்த விளக்குகளின் அலங்காரம்

சாலையின் பல இடங்களில் தீபம் போன்ற வடிவத்தில் மின்சார விளக்குகள் வைக்கப்படிருந்தன. இளைஞர்களுக்கு மட்டுமல்லாமல் எல்லா வயதினரையும் கவரும் ஒரு விழாவாக இந்த நிகழ்வு ஏற்பாடாயிருந்தது தான் சிறப்பு.

ஆங்காங்கே கேளிக்கை நிகழ்ச்சிகள். கடைகள் குறிப்பாக மிகப் பெரிய துணிக்கடைகள், புத்தகக் கடைகள், எல்லாம் மக்கள் வெள்ளம் நிரம்பி வழிந்து கொண்டிருந்தன.

அன்று மாலை பல்வேறு கலை நிகழ்ச்சிகள் ஆங்காங்கே ஏற்பாடாகியிருந்தன என்று குறிப்பிட்டேன் அல்லவா.

அதில் எனது கணவரின் நண்பர்கள் சிலர் சேர்ந்து நடத்தும் பொழுது போக்கு இசைக் குழுவின் நிகழ்ச்சிகள் இரண்டு இடங்களில் ஒரே நாளில் ஏற்பாடாகியிருந்தன.

கார்ஸ்டாட் எனப்படும் வர்த்தக நிறுவனத்திலும் அதற்குப் பின்னர் காவ் ஓஃவ் என்ற வர்த்தக நிலையத்திலும் இரண்டு 30 நிமிட கலை நிகழ்ச்சியை இவர்கள் குழுபவினர் படைத்தனர்.

பீட்டர் ட்ரெம்மல்

Jazz, Blues, Soul வகை இசைக் குழு இவர்களுடையது. 70,80, 90களில் வந்த பாடல்கள் பெரும்பாலும் இந்தக் குழுவினரது தேர்வு. எனது கணவர் இக்குழுவில் எலக்ட்ரிக் கிட்டார் வாசிப்பவர்.

இவர்கள் குழுக்கள் மட்டுமல்லாது பல குழுக்கள் அன்று ஆங்காங்கே வாசித்துக் கொண்டிருந்தன. பினாங்கில் தைப்பூசத்தின் போது பக்கத்துக்கு பக்கம் பந்தல்களில் பாடல்கள் ஓட்டிக் கொண்டிருக்குமே.. அந்த ஞாபகம் தான் எனக்கு வந்தது இந்த மூலைக்கு மூலை கச்சேரியை பார்ப்பதற்கு.

பனிக் காலத்தின் குளிர் தொடங்கி விட்டாலும் கேளிக்கைகளின் எண்ணிக்கை குறைவதில்லை இங்கு. விரைவில் ஜெர்மனியில் பிரபலமான weihnachtsmarkt தொடங்கி விடும். கிருஸ்மஸ் திருநாளை முன்னிட்டு டிசம்பர் முதல் வாரமே இந்தச் சந்தை தொடங்கி விடும்.. அந்த செய்திகளுடன் மீண்டும் வருகின்றேன்.

அன்புடன்
சுபா

டிட்ஸிங்கன் சோள லேபிரிந்த் (Ditzingen Mais Labyrinth)

2010-09-18T10:50:00.000-07:00

கோடை காலம் முடிந்து இப்போது ஜெர்மனியில் இலையுதிர் காலம் தொடங்கி விட்டது. தற்சமயம் வாரத்தில் மூன்று நாட்களாவது மழை. சீதோஷ்ணம் 15 டிகிரி என்ற வகையில் குறைந்து விட்டது. குளிர் காலத்தை நோக்கிச் செல்லும் அறிகுறிகள் தென்பட ஆரம்பித்து விட்டன. மதியம் அதிக பட்சம் சில நாட்கள் 19 டிகிரி ஆனால் மாலையில் 5 டிகிரி வரை செல்லும் நிலைமைதான் தற்சமயம். இலையுதிர் காலத்தில் கோடை திருவிழா பற்றி சொல்வது பொருந்தது. இருப்பினும் கோடையில் நான் சென்று வந்த மேலும் 2 திருவிழாக்களைப் பற்றிய செய்திகளைப் பகிர்ந்து கொள்ளலாம் என நினைக்கின்றேன்.

ஆகஸ்டு முதல் வாரத்தில் சில நாட்கள் விடுமுறையிலிருந்த சமையம் நானும் என் கணவரும் சில நாட்கள் அருகாமையில் உள்ள நகரங்களுக்கு சைக்கிள் பயணம் மேற்கொண்டோம். பக்கத்திலேயே உள்ள கிராமங்களை அறிந்து கொள்ளவும் இயற்கை அழகை ரசிக்கவும் சைக்கிள் பயணம் நல்ல வழி. அந்த வகையில் நான் இருக்கும் நகரமான லியோன்பெர்க் நகரில் புராதனமான Mühlen Weg என்று சொல்லப்படக்கூடிய தானியங்கள் அரைக்கும் ஆலைகளைச் சுற்றி பயணம் சென்று வர திட்டமிட்டோம். இந்த தானியங்கள் அரைக்கும் ஆலை சுற்றி சைக்கிள் பயணம் என்பது Glems ஆறு செல்லும் பாதையை ஒட்டி அமைந்திருக்கும் ஒரு சைக்கிள் பயணம். இது லியோன்பெர்க் நகரத்திற்குச் சிறப்புச் சேர்க்கும் ஒன்றும் கூட. இந்த ஆலைகளில் பெரும்பாலானவை 12ம் 13ம் நூற்றாண்டிலிருந்து சேவையில் இருப்பவை.

இந்த பயணத்தை முழுமையாக முடிக்க அதன் பாதையில் உள்ள 19 ஆலைகளையும் ஒவ்வொன்றாகக் கடந்து செல்ல வேண்டும். 47 கிமீ தூரம் சைக்கிள் பயணம் இது. முதல் ஆலை இருப்பது எனது இல்லத்திற்கு மிக அருகில். க்லெம்ஸ் நதி ஓடும் பகுதியில் தான் எனது இல்லமும் இருப்பதால் முதல் தானியம் அரைக்கும் ஆலையிலிருந்தே பயணத்தைத் துவக்கினோம். இணையத்தில் கிடைக்கும் வரைபடத்தைத் தயார் செய்து கொண்டு புறப்பட்டோம். ஆறு ஆலைகளை கடந்த பின்னர் ஏழாவது ஆலையை விட்டு செல்லும் போது வேறு பாதையை நாங்கள் எடுத்து விட்டதால் டிட்ஸிங்கன் கிராமத்தின் மையப்பகுதிக்கு வந்து விட்டோம். வரும் வழியில் டிட்ஸிங்கன் சோளக்காட்டில் திருவிழா என்ற செய்தியைப் பார்த்து சைக்கிளை அங்கே செலுத்தினோம்.

சோளக்காட்டிற்கு முன்னர் கூடாரங்கள் அமைத்து உணவு விற்பனை செய்யப்பட்டுக்கொண்டிருந்தது. பக்கத்தில் சிறிய கூடாரம். மாலையில் கலை நிகழ்ச்சிக்கும் ஏற்பாடாகியிருந்தது. குழந்தைகள் விளையாடுவதற்காக சருகுக் கட்டுக்களைப் போட்டு வைத்திருந்தார்கள். குழந்தைகள் அங்குமிங்கும் ஓடி விளையாடிக் கொண்டிருந்தனர். டிட்ஸிங்கன் மக்களுக்கு அன்றைய மதிய/மாலை பொழுதுக்கு ஒரு நல்ல நிகழ்ச்சியாக அது அமைந்திருந்தது.

ஒரு காபியும் கேக்கும் வாங்கிச் சாப்பிட்டு விட்டு 3 யூரோ கட்டணம் செலுத்தி நுழைவுச் சீட்டைப் பெற்றுக் கொண்டு சோளக்காட்டின் லேபிரிந்திற்குள் சென்றோம். லேபிரிந்தைத் திட்டமிட்டு அமைத்திருந்தனர். உள்ளே நுழையும் போது லேபிரிந்தில் தேடி விடை கண்டுபிடிக்க வேண்டியதற்காக 4 கேள்விகள் அடங்கிய ஒரு கேள்வித்தாளை தந்திருந்தனர்.

இந்த ஆண்டின் லேபிரிந்தின் வடிவமைப்பு மீன், கடல் வாழ் உயிரினங்கள் என்ற வகையில் அமைக்கப்ட்டிருந்தது. அதை இப்படத்தில் காணலாம்.

சோளக்காட்டின் இடையே நல்ல வழி அமைத்திருந்தனர். உள்ளே நுழையும் போது மாட்டிக் கொள்வோம் என்று நினைக்கவில்லை. ஆனால் சற்று நேரத்தில் எங்கே இருக்கின்றோம் எனத் தெரியாமல் அங்குமிங்கும் சுற்ற ஆரம்பித்து விட்டோம். எப்படியோ சுற்றித் திரிந்து ஒரு வழியாக 3 கேள்விகளுக்கு விடையைக் கண்டுபிடித்து எழுதிக் கொண்டோம். அங்கேயும் சிலர் ஒருவருக்கொருவர் உதவிக் கொண்டு அடுத்து செல்வதற்கான வழியைப் பற்றிய செய்தியையும் பரிமாறிக்கொண்டனர். ஒரு அப்பா தனது மகளைக் காணாது தேடிக் கொண்டிருந்தார். சிலர் அங்குமிங்கும் நடந்து விடுபட்டுப்போன குடும்ப உறுப்பினர்களைத் தேடித்திரிந்து கொண்டிருந்தனர்.

சுற்றி சுற்றி வந்து நான்காவது கேள்விக்கான விடையையும் கண்டு பிடித்து விட்டோம். அதற்குப் பின்னர் வெளியே வந்தால் போதும் என்ற நிலையில் பாதையைத் தேடி கண்டுபிடித்து வெளியே வந்தோம். ஆகஸ்டு மாதமாதலால் சோளம் காய்த்து அறுவடைக்குத் தயாராகிக்கொண்டிருக்கும் சமையம் அது. ஆக சோளத்தைத் தாங்கி நிற்கும் செடிகளுக்கிடையே நடந்து செல்வது மிக மிக ரம்மியமாக இருந்தது. சோளச் செடியின் பூ சாமரம் வடிவில் பஞ்சு போன்ற மெல்லிய சிறு பூக்களாக காட்சியளித்தது.

இயற்கையின் அழகுக்கு ஈடு ஏது?

நீண்ட தூர சைக்கிள் பயணத்தை திட்டமிட்டு சென்றதால் கேமராவை கையோடு எடுத்துச் செல்லவில்லை. அதனால் இணையத்தில் கிடைத்த படங்களையே இணைத்திருக்கின்றேன். வருடா வருடம் நடக்கும் ஒரு திருவிழா இது என்பதால் இணையத்தில் பல செய்திகளும் படங்களும் பலர் சேர்த்திருக்கின்றனர். அவர்கள் புண்ணியத்தில் சில படங்களை இங்கு இணைத்திருக்கின்றேன்.:-)

இது கடந்த ஆண்டு லேபிரிந்தின் வடிவம்.

டிட்ஸிங்கனில் சோளக்காட்டில் மாட்டிக்கொண்டதில் சைக்கிள் பயணம் தடைபட்டு விட்ட வருத்தம் இருந்ததால் இரண்டு நாட்களுக்குப் பின்னர் அந்த பயணத்தை இருவரும் மேர்கொண்டோம். இம்முறை முழுமையாக 19 புராதன தானிய ஆலைகளையும் பார்த்து க்லெம்ஸ் நதிக்கரையின் குளிர்ச்சியை ரசித்து ஏறக்குறைய 60 கிமீ சைக்கிள் பயணத்தை மேற்கொண்டு வந்தோம். அதனைப் புகைப்படங்களோடு வெளியிட்டு எழுத விருப்பம் உள்ளது. நேரம் கிடைக்கும் போது அந்தக் கட்டுரையைப் பகிர்ந்து கொள்கிறேன்.

அன்புடன்
சுபா

கோடையில் ஸ்டுட்கார்ட் - 4: எஸ்லிங்கன் வெங்காயத் திருவிழா

2010-08-30T10:32:00.000-07:00

இது என்ன வெங்காயத் திருவிழா என நிச்சயம் உங்களுக்கு கேட்கத் தோன்றும். இதற்கு இங்கு ஒரு கதை இருக்கின்றது. ஒரு பூதம் ஒன்று கிராமத்து மக்களுக்குத் தொல்லை கொடுத்துக் கொண்டிருந்ததாம். சந்தையில் வெங்காயம் விற்கும் பெண் ஒருத்தி அந்த பூதத்தைப் பிடித்து வெங்காயத்திற்குள் வைத்து விட்டாளாம். பூதம் தொலைந்த அந்த சந்தோஷத்தைக் கொண்டாட வேண்டாமா? அதற்குத் தான் வெங்காயத் திருவிழா.

இந்த வெங்காயத் திருவிழா ஜெர்மனியில் வேறு எங்கும் நடை பெறுவதாக தெரியவில்லை. எனக்குத் தெரிந்த வரையில் இது நடைபெறுவது எஸ்லிங்கன் நகரத்தில் மட்டும் தான்.

எஸ்லிங்கன் நகரம் ஸ்டுட்கார்ட் நகர மையத்திலிருந்து ஏறக்குறைய 15 கிமீ தூரத்தில் உள்ளது. எனது முதுகலை பட்ட ஆய்வை நான் இங்குள்ள பல்கலைக்கழகத்தில் தான் மேற்கொண்டேன். பல்கலைக்கழக நகரம் என்றும் இதனைக் கூறலாம். இந்த சிறிய நகரின் சற்றே மலைப்பாங்கான சூழல் இங்கு மிகச் சிறப்பான வகையில் திராட்சை பயிர் வளர்ச்சிக்குத் துணை புரிகின்றது. 'பாடன் உர்டென்பெர்க்' மானிலத்தின் பிரசித்தி பெற்ற Trollinger வகை வைன் இங்கு விளைவது தான்.

நெக்கார் நதி கடந்து செல்லும் நகரம் இது. எழில் மிகுந்த இந்த சிற்றூரின் மையப்பகுதியில் நடந்து செல்லும் போது இங்குள்ள Fachwerkhaus (half-timbered house) வகை வீடுகளை பார்த்து ரசிக்கலாம். Fachwerkhaus வீடுகள் என்றால் என்ன என்பதை பார்க்க கீழே உள்ள படத்தைப் பாருங்கள்.

பல வர்ணங்களில் குறிப்பிடத்தக்க வடிவங்களில் இவ்வகை கட்டிடங்கள் அமைந்திருக்கும்.

இந்த வகை வீடுகளைப் பற்றியே தனியாக ஒரு கட்டுரை எழுத வேண்டும். அவ்வளவு வேறுபாடுகளும் வகைகளும் இவ்வகை கட்டிடக்கலையில் உண்டு!

திருவிழா நகரின் மையத்தில் fussgängerzone (pedestrian zone) உள்ள இடைத்தில் ஏறபாடாகியிருந்தது. உள்ளே நுழைந்ததுமே பல கூடாரங்களைக் காண முடிந்தது. அதாவது ஒவ்வொரு விற்பனையாளரும் தாங்கள் விற்பனை செய்யும் உணவு வகைகளுக்குக் கூடாரம் அமைத்து பொதுமக்கள் அமர்ந்து சாப்பிடும் வகையில் மேசைகளையும் இருக்கைகளையும் அமைத்திருந்தார்கள்.

இங்கு முக்கிய உணவாக அமைந்திருந்தது Zwiebelkuchen என அழைக்கப்படும் வெங்காய கேக். இது எப்படி இருக்கும் என பார்க்க வேண்டுமா? இதோ.

சுவை கேட்கவே வேண்டாம். மிக ருசியாக இருக்கும். இதனை எப்படி செய்வது என தெரிந்து கொள்ள விரும்புபவர்கள் இங்கே செல்லுங்கள். செய்முறை நன்றாக வழங்கப்பட்டுள்ளது.

Zwiebelkuchen -உடன் மேலும் இந்த (schwabenland) ஷ்வாபன் நகரத்திற்கே உரிய சீஸில் வருத்த காளான், மவுல்டாஷன், ஷ்னுப் நூடல், டம்ப் நூடல் என பல. அதோடு விதம் விதமான வைன் வகைகளும் விற்பனைக்கு இருந்தன.

குறிப்பு: மவுல் டாஷன் என்பதை நேரடியாக மொழிபெயர்த்தால் வாய்+பொட்டலம் எனக் கூறலாம். வித்தியாசமான பெயராக இருக்கின்றது அல்லவா? இந்த மவுல் டாஷனில் சைவ மவுல்டாஷனும் உண்டு. கீரை சேர்த்து சமோசா போல தயாரிக்கபப்ட்டிருக்கும். அனேகமாக எல்லா மளிகைக் கடைகளிலும் இது கிடைக்கும்.

ஆகஸ்டு முடிந்து செப்டம்பர், அக்டோபர் மாதம் என்றாலே திராட்சைகள் பெரும்பாலும் தயாராகிவிடும் காலம். இதனை வரவேற்க இவ்வகை விழாக்கள் கொண்டாடப்படுகின்றன. Zwiebelkuchen னை வைன் உடன் சேர்த்து சாப்பிடுவது இங்கு ஒரு கலாச்சாரம். இதனை நான் பல்கலைக்கழகத்தில் படிக்கும் காலத்திலே அறிந்து கொண்டேன். பல்கலைக்கழக் நிகழ்ச்சிகளில் மாணவர்களுக்கு விரிவுரையாளர்கள் அளித்த விருந்துகளில் Zwiebelkuchen உடன் சிவப்பு வைனும் வைப்பது மிக முக்கியமான வழக்கம்.

எஸ்லிங்கன் நகரில் ஒரு வித்தியாசமான அழகான கோட்டை ஒன்றும் உள்ளது. அதனை பற்றி இன்னொருமுறை வாய்ப்பு அமையும் போது எழுதுகிறேன்.

இவ்வகை திருவிழாக்களில் குழந்தைகளுக்கும் பொழுது போக்கு அம்சங்கள் இருக்கும். இங்கே பாருங்கள். இந்தப் படத்தில் பெட்டியின் கைப்பிடியை இந்த மனிதர் சுற்றிக் கொண்டிருக்கின்றார். இப்படி சுற்றும் போது குருவிகளின் ஓசை போன்ற ஒலி கேட்கும். குழந்தைகளைக் கவர இவ்வகை முயற்சி.

இவ்வகை விழாக்களில் இசைக்கும் குறைவிருக்காது. Volksmusik எனப்படும் கிராமிய இசை ஆங்காங்கே!

சுவையான உணவு; இனிய சூழல், சூடான 36 டிகிரி வெயில்; இது போதாதா இந்த விழா ஒரு சிறந்த விழா என்று சொல்வதற்கு. :-)

அடுத்து வேறொரு வித்தியாசமான விழாவுடன் வருகிறேன்!

கோடையில் ஸ்டுட்கார்ட் - 3: ஸ்டுட்கார்ட் கோடை திருவிழா

2010-08-14T12:00:00.000-07:00

ஸ்டுட்கார்ட் கோடை கொண்டாட்டங்களிலேயே மிக முக்கியத்துவம் பெற்றது Sommer Fest என்றழைக்கப்படும் ஸ்டுட்கார்ட் கோடை திருவிழா தான். இதனை கடந்த 4 ஆண்டுகளாகத் தவறாமல் சென்று பார்த்து வருகின்றேன். நான்கு நாட்களுக்கு நடக்கும் திருவிழா இது. ஒரு லட்சத்துக்கும் மேற்பட்ட மக்கள் இந்த நிகழ்வில் கலந்து கொள்கின்றனர்.

எனது கணிப்பில் பாடன் உர்ட்டென்பெர்க் மானிலத்திலேயே மிக அழகான ஒரு திருவிழா இது என்று நான் சொல்வேன். கூனிக் ஸ்ட்ராஸ மற்றும் ஸ்டுட்கார்ட் அரண்மனை, மியூஸியம் சுற்றுப்புரம் அனைத்தையும் உளளடக்கி இந்த விழா நடைபெறும்.

கூம்பு போன்ற வெள்ளை நிறத்து குடில்கள் அமைத்திருப்பார்கள். அதில் உணவு விற்பனை, குளிர்பானங்கள் விறபனை போன்றவற்றோடு சிறிய அளவிலான இசை நிகழ்ச்சிகளும் நடைபெறும். ஏறக்குறைய ஏழெட்டு பெரிய மேடைகளில் ஸ்டுட்கார்ட் நகர பிரசித்தி பெற்ற இசைக்குழுக்களின் வாத்திய இசை மாறி மாறி நிகழ்ந்து கொண்டே இருக்கும் இந்த நான்கு நாட்களும்.

பல்வேறு வகை உனவுகள்: குறிப்பாக வறுத்த காளான், ப்லாம் கூகன், இத்தாலிய நூடல் வகை உணவுகள், வகை வகையான உருளைக்கிழங்கு உணவு வகைகள் (ஜெர்மனியில் உருளைக்கிழங்கு தானே முக்கிய உணவு) , ஆப்பிரிகக் உணவுகள், ஜெர்மன் உணவு வகைகள், சீன, தாய்லாந்து உணவுகள் என பல்வேறு வகை உணவு வகைகள் இங்கு கிடைக்கும்.

ஒவ்வொரு வருடமும் நான் தவறாமல் வாங்கிச் சாப்பிடுவது crepes. இது பான் கேக் போன்று தோசைக்கல்லில் சுடவைத்து அதில் க்ரீம் சாக்கலேட் தடவி கொஞ்சம் வருத்த பாதம் போட்டு சூடாகத் தருவது. இதனை ஒரு முறை சாப்பிட்டு பழகி விட்டால் விட மனம் வராது. அவ்வளவு சுவையான இனிப்பு பதார்த்தம்.

இந்த முறை 5-8 ஆகஸ்டு, வியாழன் தொடங்கி ஞாயிறு வரை நிகழ்ச்சிகள் நடந்தன. மழை தூரல் இருந்தாலும் கூட்டம் குறையவில்லை.

அரண்மனையின் ஓப்பரா கட்டிடத்திற்கு முன்னர் அமைந்துள்ள செயற்கை குளம் இந்த நாளில் மிக அழகாக காட்சியளிக்கும். குளத்தில் இடைக்கிடையே நட்டு வைத்த சோலார் விளக்குகள் இரவில் பல வர்ணங்களில் ஜொலித்து வந்திருப்போர் மனதை கொள்ளைக் கொள்ளச் செய்தன. குளக்கரையில் அமர்ந்து வாத்துக்கள் அங்கும் இங்குமாக நீந்திச் செல்வதைப் பார்த்து ரசித்துக் கொண்டே இருக்கலாம்.

கேளிக்கை, இசை, உணவு, நண்பர்கள் சந்திப்பு என பல வகையில் மகிழ்ச்சி தரும் இந்தத் திருவிழா ஸ்டுட்கார்ட் நகருக்கும் சிறப்பு சேர்க்கும் ஒன்றே!

அன்புடன்
சுபா

கோடையில் ஸ்டுட்கார்ட் - 2: கார்ல்ஸ்ரூஹ மக்கள் தினக் கொண்டாட்டம்

2010-08-12T11:55:00.000-07:00

கார்ல்ஸ்ரூஹ (Karlsruhe) நகரம் நான் வசிக்கும் லியோன்பெர்க் பகுதியிலிருந்து ஏறக்குறை வடக்கு நோக்கி 45 கிமீ தூரத்தில் உள்ளது. சென்ற வாரம் எங்கள் உறவினரை பார்த்து விட்டு வரும் வழியில் இங்குள்ள ஒரு அரண்மனையை பார்த்து வரலாம் எனச் சென்றிருந்தோம்.

அரண்மனைக்கு பக்கத்தில் "பழங்கால மக்கள் திருவிழா" ஒன்று மிகப் பெரிய அளவில் நடைபெற்றுக் கொண்டிருந்தது. அரண்மனையைப் பார்க்க வேண்டும் என நினைத்திருந்ததால் அந்தப் பழங்கால மக்கள் திருவிழாவிற்குச் செல்லவில்லை.

அதற்கு பதிலாக கார்ல்ஸ்ரூஹ நகராண்மைக் கழகம் ஏற்பாடு செய்திருந்த மக்கள் தினம் (Volksfest) நகரின் மையப் பகுதியில் அரண்மனைக்கு எதிர்புரத்தில் நிகழ்ந்து கொண்டிருந்தது. அரண்மனையைச் சுற்றிப் பார்த்து விட்டு இந்த மக்கள் தின விழாவில் கலந்து கொண்டோம்.

இந்த மக்கள் தின கொண்டாட்டம் என்பது அந்த நகரத்து சற்று பழமையான கலைகளை ஞாபகப்படுத்தும் வகையில் நிகழ்த்தப்படும் நிகழ்ச்சிகள். இவ்வகை நிகழ்ச்சிகளில் பெரும்பாலும் ஒரே வகையான ஜெர்மனியின் பாரம்பரிய உணவுகளான Bratwürst (sausages), Pommes (french fries), கால்ஸ்ரூஹ நகரத்திற்கே சிறப்பான பியர் அதோடு கோடையில் மக்கள் விரும்பும் ஐஸ்க்ரீம், வேறு சில தின்பண்டங்களும் விற்பனைக்கு இருந்தன.

முக்கியமாக எல்லா கொண்டாட்டங்களிலும் இசை நிகழ்ச்சிகள் நடப்பது உறுதி. நாங்கள் சென்ற சமயத்தில் கால்ஸ்ரூஹ பாரம்பரிய இசைக்குழுவினர் (musikkapelle) இசை நிகழ்ச்சியை நிகழ்த்திக் கொண்டிருந்தனர்.

இந்த நிகழ்ச்சியைப் பார்க்க வந்திந்ருந்த பொது மக்கள் சாதாரண உடைகளோடு ஒரு சிலர் 19ம் நூற்றாண்டு, 20 நூற்றாண்டு ஆரம்ப கால உடைகளை ஞாபகம் கூறும் வகையில் உடையணிந்தும் வந்திருந்தனர். இவ்வகை நிகழ்ச்சிகளில்தான் இந்த பழமையான ஆடைகளைக் கிராமிய ஆடைகளைக் காண முடியும்.

(நின்று கொண்டிருக்கும் பெண்கள் கிராமிய உடை அணிந்திருக்கின்றார்கள்)

மேலே படத்தில் உள்ள அரண்மணை 1749-81ல் கட்டப்பட்டது. ஜெர்மனியில் உள்ள மிகப் புதிய நகரங்களில் கார்ல்ஸ்ரூஹவும் ஒன்று. இந்த நகரம் 1915 வாக்கில் உருவானது. அரசர் கார்ல் வில்ஹெல்ம் அவர்களது விருப்பத்தின் பேரில் இந்த அரண்மனை உருவாக்கப்பட்டது. அரண்மனைக்கு சற்று தள்ளி கார்ல்ஸ்ரூஹ நகர மையத்தில் அரசரின்´உடல் தகனம் செய்யபப்ட்டு ஒரு பிரமிட் வடிவிலான நினைவு மண்டபமும் வைக்கப்பட்டுள்ளது.

இந்தப் பகுதியில் உள்ள வீடியோ கிளிப் ஒன்றினைப் பாருங்கள். குழந்தைகளைக் கவரும் இனிமையான இசையையும் அதனை இசைக்கும் கலைஞரையும் இங்கு காணலாம்.

அன்புடன்
சுபா

கோடையில் ஸ்டுட்கார்ட் - 1

2010-08-11T11:40:00.000-07:00

நண்பர்களே,

கோடை கால கொண்டாட்டம், விழாக்கள் என்பது ஆண்டுக்கு ஆண்டு ஸ்டுட்கார்ட் நகரைச் சுற்றிலும் பெருகிக் கொண்டே வருகின்றன. மே தொடங்கி செப்டம்பர் வரை பல்வேறு விழாக்கள் ஜெர்மனி முழுமைக்கும் நடை பெறுவது வழக்கம். இங்கு நடை பெறும் விழாக்கள் பெரும்பாலும் கேளிக்கை விழாக்களாக அமைந்து பல்வேறு உள் நாட்டு மக்களோடு அயல் நாட்டினரும் கலந்து கொள்ள சிறப்பாக இங்கு வந்து செல்லும் நிலையும் இப்போது உள்ளது.

2006ம் ஆண்டு உலகக் காற்பந்து போட்டி உள் நாட்டு மக்களிடையே பெறும் மாற்றததை ஏற்படுத்தியது என்பதை யாரும் மறுக்க முடியாது. பல்வேறு இடங்களில் காற்பந்து போட்டியைக் காண என்று கூடிய ஆயிரக்கணக்கான மக்கள் கூட்டம் ஜெர்மனி முழுதும் ஆச்சரியத்தை ஏற்படுத்தியது உண்மை. பெறும்பாலும் பரவலாக விழா கொண்டாட்டங்களில் அதிகம் ஈடுபாடு காட்டாத ஜெர்மானிய மக்கள் மத்தியில் இப்போது குறிப்பிடத்தக்க மாற்றத்தைக் காண முடிகின்றது. அதிலும் இளம் தலைமுறையினரிடையே கேளிக்கை விழாக்கள் Straßen Fest என சொல்லப்படும் சாலை திருவிழாக்கள் போன்றவற்றில் அதிக ஈடுபாடும் ஆர்வமும் ஏற்பட்டுள்ளதால் ஒவ்வொரு சிறு கிராமும் தங்கள் கிராமத்தின் சாலை திருவிழாக்களை ஏற்பாடு செய்து மக்கள் வார இறுதி நாட்களை இக்கோடையில் மகிழ்ச்சியுடன் கழிக்க ஏற்பாடு செய்து வருகின்றனர். இந்த வாரம் எங்கு செல்வது, எந்த விழாவைப் பார்ப்பது என்பதே பட்டியலிட்டு பார்க்க வேண்டிய அளவுக்கு ஏராளமான திருவிழாக்கள்.

சாலை திரு விழாக்கள், கோடை கால திருவிழாக்கள் என்னும் போது அவற்றில் சில குறிப்பிடத்தக்க நோக்கத்தோடு இவ்வகை விழாக்கள் நடைபெறும் வகையில் ஏற்பாடுகள் செய்யப்படுகின்றன. உதாரணமாக
-பழங்கால மக்கள் திருவிழா (Mittelalterfest)
-சாலை திருவிழா (Straßen Fest)
-மூலிகை செடிகள் சந்தை (kräuter ausstellung)
-மீன் சந்தை - (Fischmarkt)
-வைன் திருவிழா (Weinfest)

என வகை வகையான திருவிழாக்கள் நடைபெறுகின்றன. இவ்வகை திருவிழாக்களைப் பற்றி நினைவு கூறும் போது October Fest பற்றியும் சொல்லியாக வேண்டும். சில லட்சம் மக்கள் கூடும் ஒரு உலகளாவிய திருவிழாவாக, பியர் விரும்பிகளின் கொண்டாட்ட விழாவாக இது அமைந்திருக்கின்றது. இதனைப் பற்றி பின்னர் விவரிக்கின்றேன்.

கடந்த சில வார இறுதி நாட்களில் சில சாலை திருவிழாக்களில் கலந்து கொண்டேன். ஒரு சில விழாக்களுக்கு புகைப் பட கருவியுடன் சென்றதால் புகைப்படங்களை எடுத்துள்ளேன். அவற்றோடு இணையத்தில் உள்ள தகவல்களையும் படங்களையும் இணைத்து இங்கு நடைபெறும் திருவிழாக்களைப் பற்றி பகிர்ந்து கொள்கிறேன். ஜெர்மனியில் வாழ்கின்ற மக்களின் வாழ்க்கை முறையில் திருவிழாக்களின் பங்கினை அறிய ஆர்வம் உள்ள மின்தமிழ் வாசகர்களுக்கு இத்தகவல்கள் உதவலாம்.

அன்புடன்
சுபா

பறங்கிக்காய் கண்காட்சி

2007-11-10T05:37:00.000-08:00

கண்காட்சிகள் பலவிதம். இங்கு ஜெர்மனியில் லுட்விக்ஸ்புர்க் நகரில் கடந்த 2 மாதங்களாக பொதுமக்கள் பார்வைக்காக ஏற்பாடாகியிருந்த பறங்கிக்காய் கண்காட்சி கண்ணுக்கு விருந்தாக அமைந்திருந்தது. 31 ஆகஸ்டு தொடங்கி 4 நவம்பர் வரை இந்த கண்டகாட்சி நடைபெற்றது. உலகின் எல்லா கண்டங்களிலும் காணப்படும் மிருகங்களின் சாயலில் பறங்கிக்காய்களைக் கொண்டு மிருகங்களின் வடிவங்கள் அமைக்கப்பட்டிருந்தன. இந்த கண்காட்சி லுட்விக்ஸ்புர்க் அரண்மனையின் மலர் பூங்காவின் ஒரு பகுதியில் அமைக்கட்டிருந்தது. 500,000க்கும் மேற்பட்ட பறங்கிக்காய்கள் இந்த கண்காட்சியில் பயண்படுத்தப்ப்பட்டிருந்தன. அத்தோடு உலகின் பல மூலைகளிலிருந்து தருவிக்கப்பட்ட 400 வித்தியாமான் பறங்கிகள் பெயரிடப்பட்டு கண்காட்சியில் பார்வைக்கு வைக்கப்படிருந்தன.

இந்த கண்காட்சியின் போது மிகப் பெரிய கணமான பறங்கிக்க்காய்களுக்கான போட்டியும் சேர்ந்தே நடைபெறுவது வழக்கம். இந்த ஆண்டின் கணமான பறங்கிக்க்காய்க்கான பரிசை பெல்ஜியம் தட்டிச் சென்றுள்ளது. இந்த பறங்கிக்காயின் எடை 583 kg.

கண்காட்சியின் மத்தியில் கூடாரம் அமைத்து பறங்கிக்காய்களைக் கொண்டு சமைத்த உணவு வகைகளையும் விற்பனைக்கு வைந்த்திருந்தனர். பறங்கிக்காய் சூப், பரங்கிக்காய் பர்கர், பறங்கிக்காய் கேக் என பல வகைகள். கண்காட்சிக்கு வருபவர்கள் வாக்கிச் செவதற்காக பறங்கிக்காய்களைக் குவித்து வைத்திருந்தனர். இந்த பறங்கிக்காய்களில் பொதுவாக இரண்டு வகை உண்டு. ஒன்று சமையலுக்கு பயன்படுவது. மற்றொன்று வெறும் அழகுக்காக வளர்க்கப்படுவது. ஆக, வாங்கும் போது எந்த வகை பறங்கிக்காய் வாங்குகிறோம் எனத் தெரிந்து வாங்குவது முக்கியம்.

இந்த கண்காட்சிக்குச் சென்ற போது எடுத்த புகைப் படங்களை எனது வலைப்பக்கத்தில் சேர்த்திருக்கிறேன். அவற்றை இங்கே காணலாம்.

இந்த நிகழ்ச்சியைப் பற்றி மேலும் அறிந்து கொள்ள:

http://www.theworldly.org/ArticlesPages/Articles2005/November05Articles/GermanPumpkin.html
http://www.blueba.de/Veranstaltungen/Kuerbis/kuerbis.html

பால் மரக் காட்டினிலே!

2005-04-23T04:32:00.000-07:00

நீண்ட இடைவெளிக்குப் பிற்கு இடையில் சில நாள் ஓய்வு கிடைத்தது. கடந்த முறை இண்டியாவர்த்தா இணையத்தளத்தின் வழி வாங்கியிருந்த புத்தகங்களில் சிலவற்றை படிக்கும் வாய்ப்பாக எனக்கு அமைந்தது. பால்மரக்காட்டினிலே - அகிலன் எழுதிய ஒரு நாவல். மலேசிய தோட்டப்புர வாழ்க்கை பின்னனியை அடிப்படையாகக் கொண்டு அமைந்த ஒரு நாவல் இது.

கதை முழுவதையும் படித்து முடித்த போது மலேசிய தோட்டப்புர மக்களின் வாழ்க்கையைக் கண்களால் பார்ப்பது போலவே இருந்தது. பல இடங்களில் தென்படும் மலாய் மொழி கலந்த மலேசியத்தமிழின் பிரயோகம், இந்த தோட்டத்திலேயே இருந்து கதை கேட்பது போன்ற எண்ணத்தை வரவழைக்கின்றது. கதைக்குக் கருவாக அவர் எடுத்திருக்கும் தோட்டத் துண்டாடல் பிரச்சனை என்பது மலேசிய தோட்டத்தொழிலாளர்களை மிக மோசமாக பாதித்த ஒரு வரலாற்று நிகழ்வு. இதனை கதையாகக் கொண்டு இவர் வடித்திருக்கும் பாங்கு நெஞ்சைத் தொடுகின்றது என்றே சொல்லலாம்.

மலேசியாவில் பிறந்து வளர்ந்திருந்தாலும் பினாங்குத்தீவிலேயே பிறந்து வளர்ந்த எனக்கு தோட்டப்புற வாழ்க்கை பரிட்சயமற்ற ஒன்று என்றே சொல்ல வேண்டும். இளம் வயதில் மலேசிய இந்து சங்கத்தின் சார்பிலும், பினாங்கு பயனீட்டாளர் சங்க சார்பிலும் வார இறுதி நாட்களில் தோட்டப்புறங்களில் சமூக சேவைக்காக சென்ற நாட்களில் பினாங்குக்கு அருகாமையில் உள்ள சில தோட்டங்களுக்கு அவ்வப்போது சென்ற அனுபவம் எனக்கு உண்டு. ஆனால் அவர்களின் அன்றாட வாழ்க்கையை இதுவரை நான் ஆழமாக கண்கானித்ததில்லை. இந்த நாவல் அந்த அனுபவத்தை அழகாக வழங்கியிருக்கின்றது.

நாவலில் வருகின்ற கதாபாத்திரங்களில் பாலன், கணேசன், கண்ணம்மா, தலைமை ஆசிரியர் சண்முகம், முருகன், வேலம்மாள், ராதா, முத்து, செல்லம்மா ஆகிய அனைத்து காதாபாத்திரங்களும் நாவலை படித்து முடித்த பின்னரும் யோசிக்க வைக்கும் கதாபாத்திரங்கள். கிராம இளைஞன் பாலன் மனதில் தோன்றும் சமூக பிரக்ஞை மனதைத் தொடுகின்றது. வாழ்க்கையையே தோட்டப்புற மக்களின் நலனுக்காக அர்ப்பணிக்கும் அவனது கதாபாத்திரம் எனது மலேசிய நாட்டில் நான் சந்தித்த சிலரை எனக்கு மீண்டும் ஞாபகத்திற்குக் கொண்டு வராமலில்லை. நாடு சுதந்திரம் அடைந்த பிறகும் கூட மலேசியாவிற்குத் தமிழகத்திலிருந்து குடியேறிய மக்களின் வாழ்க்கை பல வகையில் இன்னல்களுக்கு ஆட்பட்டிருந்தது என்பதே உண்மை. 80களின் ஆரம்பத்தில் மலேசிய தேசிய பலகலைக்கழக பேராசிரியர் (தமிழர்) ஒருவரின் முயற்சியில் வெளிக்கொணரப்பட்ட செலாயாங் தமிழ் மக்களின் வாழ்க்கை பிரச்சனை இதற்கு ஒரு எடுத்துக்காட்டு. படிப்படியாக நாடு முன்னேறிய போதிலும் இன்றளவும் கூட தமிழ் மக்கள் செம்பனை மற்றும் ரப்பர் மரத்தோட்டங்களில் (காடுகளில்) வாழும் வாழ்க்கை மனதை கசிய வைக்கும் ஒன்று. மக்களின் அறியாமை போக்கப்படும் போது தான் மாற்றம் ஏற்படும் என்பதை இந்த நாவல் நன்றாகக் காட்டுகின்றது.

ஒருவர் பிறர் நலனுக்காக யோசித்து பாடு படும் போது அவர்களை தாழ்வாக விமர்சனம் செய்து மனதை நோகடிப்பது மற்றும் தனது சுய நலனுக்காக தனது இனத்திற்கு மாறாக செயல்படுவது போன்ற விஷயங்களெல்லாம் இந்த நாவலில் காட்டபப்டுகின்றன. இது இன்றளவும் மாறாமலிருக்கும் ஒன்று. மலேசிய தமிழ் சமூக அமைப்புக்களில் பணியாற்றிக் கொண்டிருக்கும் எனது நண்பர்களோடு பேசும் போதெல்லாம் இப்படிப்பட்ட சில நபர்களின் செயல்களைப் பற்றியும் நாங்கள் பேசி அலசுவதுண்டு. இது தமிழ் மக்களுக்கு ஏற்பட்டிருக்கும் ஒரு சாபக்கேடு என்று அடிக்கடி பத்திரிக்கையில் பணியாற்றும் ஒரு நண்பர் குறிப்பிடுவார்.

இந்த நாவலின் முதல் பதிப்பு 1977ல் வெளிவந்துள்ளது. தாகம் வெளியீடாக வந்திருக்கும் இந்த நாவலை பலர் ஏற்கனவே படித்திருக்கக் கூடும். மலேசிய தோட்டப்புற தமிழர்களின் வாழ்க்கை முறையை அறிந்து கொள்ள விரும்புபவர்கள் கட்டாயம் படிக்க வேண்டிய ஒரு நாவல்.

குறிப்பு: மலேசிய தோட்டத் தொழிலாளர்கள் பிரச்சனைகளை அலசும் ஒரு வலைப்பக்கத்திற்குச் செல்ல http://www.geocities.com/sounvx/plantation_workers.htm

கர்நாடக இசைக்கச்சேரி

2005-04-16T03:11:00.000-07:00

ஏப்ரல் மாதம் தொடங்கியதிலிருந்து இங்கு ஜெர்மனியில் கர்நாடக இசை வெள்ளம் ஓடிக்கொண்டிருக்கின்றது. ஏப்ரல் இரண்டாம் திகதி ப்ராங்பர்ட் நகரத்தில் ஒரு நாள் முழுவதும் இடைவிடாது தியாகராஜ கீர்த்தனைகள் பாடப்பட்டு மிகச்சிறப்பாக தியாகராத ஆராதனை நடந்தது. இந்த நிகழ்ச்சிக்காக பிரத்தியேகமாக வந்திருந்த இசை வித்துவான்களிள் திரு.அசோக் ரமணியும் ஒருவர். இந்த நிகழ்ச்சிக்காக இங்கு வந்திருந்தவர் ஐரோப்பாவில் முக்கிய சில நகரங்களில் இசை கச்சேரி நடத்திக் கொண்டிருக்கின்றார். அந்த வகையில் புது வருடத்தை இசையோடு வரவேற்பதற்காக அவரது கச்சேரியை இங்கு ஸ்டுட்கார்ட் சித்தி விநாயகர் ஆலத்தில் நிர்வாகத்தினர் ஏற்பாடு செய்திருந்தனர்.

திரு.அசோக் ரமணி கர்நாடக இசை உலகிற்கு தமிழ் கீர்த்தனைகளை வழங்கிய முக்கியமான ஒருவராகிய பாபநாசம் சிவன் அவர்களின் பேரன். இவர் கர்நாடக இசையோடு மிருதங்க இசைக்கருவியை வாசிக்கவும் கற்றவர். வாய்ப்பாட்டிலும் மிருதங்கத்திலும் தமது 15வது வயதிலேயே அரங்கேற்றம் செய்து புகழ் பெற்றவர். இவரது இசை நிகழ்ச்சி நேற்று வெள்ளிக்கிழமை இரவு 8:30 அளவில் தொடங்கி இடைவிடாது 10:30 மணி வரையில் நிகழ்ந்தது.

ஸ்டுட்கார்ட் நகரைப் பொருத்தவரை இம்மாதிரியான இசை நிகழ்வுகள் நடைபெருவது அபூர்வம் என்றே சொல்லலாம். வருடத்திற்கு அதிகபட்ஷம் 2 முறை தமிழகத்திலிருந்து யாராவது இங்கு வந்து தலையைக் காட்டினால் உண்டு. இல்லையென்றால் தமிழ் தொலைக்காட்சி வழியாகத்தான் கர்நாடக இசையை ரசிக்கமுடியும். அந்த வகையில் இந்தக் குறையையும் போக்குவதாக அமைந்தது இந்த நிகழ்வு.

பிரபாவதி குமரன், திரு.தமிழ்குமரன், திரு.அசோக் ரமணி, சுபா, திரு.யோக புத்ரா, அபிராமி

கச்சேரியின் முக்கியமான அம்சம், எல்லா பாடல்களுமே தமிழ் கீர்த்தனைகள். மனதை கொள்ளை கொண்டன இந்த தமிழ் கீதங்கள். பலருக்கும் தெரிந்த என்ன தவம் செய்தனை யசோதா, கந்தா வா, தீராத விளையாட்டுப் பிள்ளை, அலைபாயுதே கண்ணா, அகிலாண்டேஸ்வரியே என்ற பாடல்களோடு மேலும் பல தமிழ் கீர்த்தனைகளும் அடங்கியிருந்தன. இவருக்குப் பக்க வாத்தியமாக ஜெர்மனி டோ ர்ட்முண்ட் நகரைச் சேர்ந்த மிருதங்க வித்வான் பிரணவநாதன், வயலின் பிரணவன் மற்றும் கஞ்சிராவிற்கு ஒரு ஜெர்மானியரான ப்ராங்போர்ட்டைச் சேர்ந்த ஹெர்பெர்ட் லாங் ஆகியோர் அமைந்திருந்தனர்.

கடந்த ஆண்டை விட இந்த ஆண்டு இசை நிகழ்ச்சி நடைபெற்றுக் கொண்டிருக்கும் போது ஒன்றினை கவனிக்க முடிந்தது. முன்பெல்லாம் சிறுவர்கள் இங்கும் அங்கும் ஓடிக்கொண்டும், பேசிக் கொண்டும் இருப்பார்கள். ஆனால் இந்த நிகழ்ச்சியின் போது பல சிறுவர்கள் சத்தம் போடாமல், அங்கும் இங்கும் ஓடாமல் பாட்டுக்குத் தாளம் போட்டு தலை அசைத்து ரசித்துக் கொண்டிருந்தனர். ஆலயத்தில் தொடர்ந்து இசை பயின்று வரும் இந்தச் சிறுவர்கள் இப்போது இசையை ரசிக்கத் தாமாகவே பழகி விட்டனர். இதைப் பார்க்கும் போது மனதிற்கு பெறும் மகிழ்ச்சியாக இருக்கின்றது. இம்மாதிரியான கச்சேரிகள் இங்கு தொடர்ந்து நடைபெற வேண்டும். இதனால் இங்கு வாழும் தமிழர்களும் இசையோடு ஒன்றி வாழும் வாய்ப்பு நிச்சயம் வளரும்.

மாரியாத்தா..!

2005-03-05T04:13:00.000-08:00

அலுவலகத்தில் நேற்று ஒரு பெண்ணை சந்திக்க நேர்ந்ததது. அவளது பெயர் மாரியாத்தா. தமிழ் பெயராக இருக்கிறதே தமிழ் பெண்ணோ என்று நினைத்து விட வேண்டாம். மேற்கத்திய பெண்தான் இவள். இவள் பெயர் என்னை இவளைப் பற்றி கொஞ்சமாவது தெரிந்து கொள்ளவேண்டும் என்று தூண்டியது. சும்மா இருக்காமல், அவளிடமே விசாரிக்க ஆரம்பித்து விட்டேன்.

அவள் ரோமானியப் பெண். ரோமானிய நாட்டிலிருந்து வந்து இப்போது இங்கு எனது அலுவலகத்திலேயே ஒரு பிரிவில் வேலை செய்து கொண்டிருக்கின்றாள். அவள் பெயர் தமிழ் பெயர் போலவே இருக்கின்றது என்று சொன்னேன். அவளுக்கும் ஆச்சரியம். எழுதும் போது Mariatta என்று எழுதுகிறாள். உச்சரிக்கும் போது 'மரியட்டா' என்றில்லாமல் "மாரியாத்தா'' என்று தான் உச்சரிக்க வேண்டுமாம்.

தமிழில் மாரியம்மா, மாரி, மாரியாத்தா என்றெல்லாம் இந்தப் பெயர் இருப்பதைக் கேள்விப்பட்டிருக்கின்றேன். அதே போல மலாய் இனத்திலும், மரியம், மரியா என்றும் ஆங்கிலத்தில் மேரி என்றும் ஜெர்மானிய பெண்களிடையே மரிலூயிஸா, மரியானா, மரியா என்றும் இருக்கின்றது. ஆனால் ரோமானிய மொழியிலும் இதே பெயர் தமிழ் பெயர் போலவே இருப்பதைக் கேட்க ஆச்சரியமாகத்தான் இருக்கின்றது.

தமிழ் மொழியைப் பொறுத்தவரை இப்போதெல்லாம் இந்தப் பெயர் பிரபலமான ஒன்றல்ல. மாரியாத்தா என்றவுடனேயே நமது மனகண்ணில் மாரியம்மன் தான் தோன்றுவாள். மலேசியாவில் ரப்பர் மரத்தோட்டங்களிலும் செம்பனை மரத்தோட்டங்கள் உள்ள இடங்களிலும் சிறிய சிறிய கோயில்கள் (மரத்தடி கோயில்கள்) ஏராளம் இருக்கும். பெரும்பாலும் வீரபத்திரன், மாரியம்மன் தான் வழிபடு தெய்வங்கள். அதிலும் மாரியம்மன் கோயிலென்றால் அதற்கு வருவோரும் அதிகம். திருவிழாக்களின் போது ஆட்டை பலிகொடுத்து பெரிய அளவில் விருந்து சமைத்து கிராமத்தில் இருக்கும் தமிழர்களெல்லாம் ஒன்று கூடி விழா கொண்டாடும் நிலை இன்னமும் மலேசிய கிராமங்களில் உள்ளது. கிராமங்களில் சில இடங்களில் இந்த தெய்வத்தை நினைத்து, தங்களுக்கு பிறக்கின்ற குழந்தைகளுக்கு ஒரு சிலர் மாரியம்மா என்ற பெயரை வைக்கின்றனர். ஆனால் இது குறைந்து கொண்டுதான் வருகின்றது. ஜெர்மனியைப் பொறுத்தவரை நிலமை அப்படியல்ல. மரியா, மரியானா என்பவை ஜெர்மானியர்களிடையே இப்போதும் பிரபலமான பெண்களுக்கான பெயர்கள் தான்.

அலுவலகத்தில் மாரியாத்தாவை பார்க்கும் போதெல்லாம் மாரியம்மனை நினைக்காமல் இருக்கமுடியுமா?

ஆஷாடபூதி.... ????

2005-02-27T05:21:00.000-08:00

சில நாட்களுக்கு முன்னர் இந்த மாத (Feb) திசைகள் இதழில் திரு.நரசய்யா எழுதியிருந்த மூச்சை நிறுத்திவிடு என்ற தலைப்பிலான சிறுகதையைப் படித்தேன். கடந்த சில நாட்களாக எனது மனதில் இந்தக் கதையைப் பற்றிய சிந்தனைகளே ஓடிக்கொண்டிருக்கின்றன. ஒரு உண்மை சம்பவத்தை கதையாக வடித்திருக்கின்றார் திரு.நரசய்யா. அருமையான கதை! கதையை விமர்சிப்பது இந்த பதிவின் நோக்கமல்ல. இதனை ஒட்டி என் மனதில் தோன்றிய எண்ணங்களைத்தான் இங்கு பதிவாக்க விரும்புகிறேன்.

மனதில் தோன்றுகிற எல்லா எண்ணங்களையும் நம்மால் உண்மையிலேயே எந்த பாகுபாடும் இல்லாமல் ப஡ர்க்க முடிகின்றதா என்பதுதான் கேள்வி. மனிதர்களாக பிறந்த அனைவருமே சலனங்களுக்கும் சபலங்களுக்கும் ஆட்பட்டவர்களே. ஆனால் அந்த சலனத்தையும் சபலத்தையும் நம்மால் உற்றுப் பார்த்து நானும் தவறு செய்யும் ஒரு மனிதர்தான் என்று நம்மால் சொல்லிக் கொண்டு இந்த நிலையிலிருந்து வெளியேறி நம் அழுக்குப் படிந்த மனத்தின் ஒரு பகுதியை சுத்தம் செய்ய துணிவு இருக்கின்றதா என்பதும் ஒரு கேள்வி. பொதுவாகவே நமது மக்களிடையே மேற்கத்தியர்கள் என்றால் இரண்டு விதமான பொதுப்படையான எண்ணம் தான் இருக்கின்றது. ஒன்று மேற்கத்தியர்கள் அறிவியல், தொழில்நுட்பம் பொருளாதாரம் ஆகியற்றில் மிக மிக மிக உயர்ந்தவர்கள் என்பது. மற்றொன்று மேற்கத்தியர்கள் கலாச்சாரம், பண்பாடு, குடும்ப ஒழுக்கம் ஆகியற்றில் மிக மிக குறைந்தவர்கள் என்பது. வெள்ளைக்காரிதானே, அவளுக்கு உடம்பு தெரியத் தெரிய உடை உடுத்திக் கொள்ளத்தான் தெரியும்; அவர்களுக்கெல்லாம் கணவன் குடும்பம் என்ற பக்தி பண்பாடு எல்லாம் சுத்தமாக இருக்காது, என்று மேம்போக்காக பேசுபவர்கள் பலர் நம்மிடையே உண்டு. இப்படி பிறரை தாழ்வாக சுட்டும் நமது விரல்கள் நமது பண்பாட்டில் உள்ள ஓட்டைகளை சுட்டிக் காட்ட எழுகின்றனவா?

மிகத் துரிதமாக வாழ்க்கைத்தரம் உயர்ந்து கொண்டிருக்கும் இந்த கால கட்டத்திலும் நம்மிடையே எத்தனையோ தாழ்வான குணங்கள் மனதில் பதிந்திருக்கின்றன, மாற்றம் அடையாமலேயே! ஜாதி என்ற பெயரில் மக்களை பிரித்து வைத்து சொல்லாலும் செயலாலும் துன்பப்படுத்தும் நிலை இன்று மாறி விட்டதா? ஆண் பெண் என்று பேதம் பிரித்து வைத்து ஆலயத்திலும், சடங்குகளிலும் கலாச்சார நிகழ்வுகளில் பெண்களுக்கு இழைக்கப்படும் துன்பங்கள் குறைந்து விட்டனவா? திருமணம் செய்து கொண்ட பெண்களில் பலர் சுயமாக, சுதந்திரமாக இன்பகரமான வாழ்க்கையை வாழ முடிகிறதா? சுய முடிவு எடுக்கும் சுதந்திரம் இருக்கின்றதா? இந்தக் கேள்விகளெல்லாம் பலர் பல நேரங்களில் கேட்ட கேள்விகள் தான். இவற்றையெல்லாம் படிக்கிறோம், கேட்கிறோம் ஆனால் வாழ்க்கையில் நமக்கென்று வரும் போது எப்படி செயல்படுகிறோம் என்பது தான் கேள்வி.

மலேசியாவில் இருக்கும் என் தோழி ஒருத்தியோடு சில நாட்களுக்கு முன்னர் பேசிக் கொண்டிருந்தேன். 6 வருடக் காதல் இப்போது இனிக்கவில்லை. கசக்க ஆரம்பித்துவருகிறது என்று புலம்பினாள். தற்கொலை செய்து கொள்ளலாம் போல இருக்கின்றது என்று அழுதாள். இவளது காதல் நிலவரம் இப்போதுத஡ன் எனக்குத் தெரிய வந்தது. அதுவும் நானே வற்புறுத்திக் கேட்ட பிறகுதான் என்னிடம் சொல்ல அவளுக்கு தைரியம் வந்தது. எனக்கு மிகுந்த வருத்தம். "இப்படி நெருக்கமாக பழகும் என்னிடமே இத்தனை நாள் இந்த பிரச்சனையை மறைத்து உனக்குள்ளேயே வருந்திக்கொண்டிருந்தாயே. உன்னிடம் என்னுடைய எல்லா விஷயங்களையும் ஒளிவு மறைவில்லாமல் பகிர்ந்து கொண்டிருக்கின்றேனே. அதில் என்னுடைய சலனங்களும் சபலங்களும் கூட அடங்குமே. இப்படியிருக்க நீ மட்டும் ஏன் என்னிடம் மறைத்து மறைத்து இப்படி ஏமாற்றுகிறாய் என்று மனதில் பட்டதை கேட்டு விட்டேன். அதற்கு அவள் தந்த பதில் இதுதான். "நீ இப்போது மலேசியக்காரி இல்லை. நீ வெளியூர்காரி. உன்னுடைய மனதில் தோன்றும் எண்ணங்களை நீ சுலபமாக வெளியிட முடியும். இதனால் உனக்கு உன் சுற்றுப் புறத்தில் உள்ளவர்களால் உனக்கு பாதிப்பு ஏற்பட்டாது. ஏனென்றால் அவர்களுக்கு உன்னுடைய சொந்த விஷயம் என்பது உன்னுடைய தனிப்பட்ட விஷயம். உன் மனமும் இந்த வாழ்க்கை முறைக்கு ஏற்றார்போல அப்படி பக்குவப்பட்டு விட்டது. உன்னால் தைரியமாக பல விஷயங்களைச் சொல்ல முடியும். ஆனால் என் நிலமை அப்படியல்ல. என்னைச் சுற்றி உள்ளவர்கள் என்னுடைய தனிப்பட்ட வாழ்க்கையை மிக மிக கவனமாக பார்த்து வருகின்றார்கள். இதில் சின்ன தவறு ஏற்பட்டாலும் அதனால் என்னுடைய மானமே போய்விடும். நான் மறைத்து மறைத்து தான் வாழ முடியும். இல்லாவிட்டால் இந்த சமூகத்தில் என்னுடைய பெயர் கெட்டுவிடும். காமம் சார்ந்த விஷயம் என்பது மக்களுக்கு பேசி அலசுவதற்கு சுவையான ஒரு விஷயம். அதிலும் மற்ற பெண்களைப் பற்றி பேசுவதென்றால் ஆண் பெண் இருபாலருக்குமே அல்வா சாப்பிடுவது மாதிரி" என்று சொன்னாள். இப்படி சொல்லும் இவள் காதலிப்பது திருமணமாகி 3 குழந்தைகள் உள்ள மனைவியுடன் குடும்பம் நடத்திக் கொண்டிருக்கும் ஒருவரை.

முதலில் உருகி உருகி காதலித்த இந்த திருமணமானவருக்கு இப்போது தான், தான் செய்வது தவறு என்று புரிய ஆரம்பித்திருக்கிறதாம். அதனால் இந்த உறவை படிப்படியாக முறித்துக் கொள்ளலாமே என ஆலோசனை கூறியிருக்கிறார். இவரை நம்பி, வந்த வரனையெல்லாம் தடுத்துவிட்ட இந்த நாற்பதை எட்டும் பெண் இப்போது தலையில் இடி விழுந்த மாதிரியான அதிர்ச்சியில் இருக்கிறாள். அவருக்கும் உனக்கும் தெரிந்த நண்பர்களிடம் கூறி பேசிப் பார் என்றேன். "வெளியே சொல்லமுடியாது சுபா. அவரை யாரும் குறை சொல்ல மாட்டார்கள். என்னுடைய பெயர் தான் கெட்டுப் போகும். சேலையில் முள் விழுந்தாலும், முள்ளில் சேலை விழுந்தாலும் சேலைக்குத்தான் பாதிப்பு. அப்படிப்பட்ட சமுதாயத்தில் தான் நான் வாழ்கிறேன்" என்றாள் என் தோழி.

என்ன நியாயம் இது? ஏன் இந்த பாகுபாடு. உண்மையிலேயே நமது சமுதாயம் இந்த பாகுபாட்டை ஆதரிக்கின்றது என்றால் இது ஒரு குறையுள்ள சமுதாயம் தான். பண்பாட்டில் நாம் உயர்ந்தவர்கள் என்று பேசுகின்றோம். எப்போது இம்மாதிரியான மனித பாகுபாடு, ஜாதி பாகுபாடு, ஏற்றத்தாழ்வு எல்லாம் நமது மக்கள் சிந்தனையிலிருந்து ஒழிகின்றதோ அப்பாதுதான் நாம் பண்பாட்டில் உயர்ந்தவர்களாக நம்மை கருதமுடியும். நமது மனதில் உள்ள அழுக்கான சிந்தனைகளை வெளியே காட்டாமல் வெற்றிகரமாக மறைத்து வைத்துக் கொண்டு, மற்றவர்கள் வாழ்க்கையில் நிகழ்கின்ற சிறிய சிறிய பிரச்சனைகளையும் பேசி பேசி அவர்களைத் துன்பப்படுத்துவதுதான் பெரும்பாலும் நிகழ்ந்து வருகின்றது. இதையெல்லாம் யோசிக்கும் போது என் தோழிக்காக மனம் வருந்தாமல் இருக்க முடியவில்லை!

பீஸா போட்டி

2005-02-21T10:54:00.000-08:00

சனிக்கிழமை உள்ளூர் ஜெர்மானிய தொலைக்காட்சி சேனல் ZDF -ல் ஒலியேறிய Wetten Dass நிகழ்ச்சியில் சுவாரசியமான ஒரு நிகழ்ச்சியை பார்க்க நேரிட்டது. இது மக்களிடையே புதைந்துள்ள வித்தியாசமான திறமைகளை வெளிக்காட்டும் ஒரு நிகழ்ச்சி.

இதில் கலந்து கொள்ள 4 குழுக்கள்/தனிபர் வந்திருந்தனர். அதில் ஒன்று என்னை மிகவும் ஆச்சரியப்படுத்தியது.

2 நண்பர்கள். இவர்களுடைய திறமை என்னவென்றால் எந்த விதமான ரெடி மேட் பீஸா (Pizza) வாக இருந்தாலும் கண்களை மூடிக் கொண்டே அந்த பீஸாவின் பெயரை சொல்லிவிடுவதுதான். இந்த இருவரும் பல்கலைக்கழகத்தில் படித்துக் கொண்டிருக்கும் காலத்தில் மிக அதிகமாக பீஸாவையே முக்கிய உணவாக எடுத்துக் கொள்ள வேண்டிய நிலையிருந்ததால் அவர்களுக்கு உள்ளூரில் கிடைக்கக்கூடிய எல்லா brand பீஸாவும் அத்துப்படி. "எந்த பீஸாவாக இருந்தாலும் கொடுங்கள். கண்களை மூடிக் கொண்டு அது என்ன பீஸா என்று சொல்லி விடுவோம்" என்று சவால் விட்டுக் கொண்டு வந்திருந்தனர்.

இவர்களுக்கு நான்கு வாய்ப்புக்கள் தான் வழங்கப்படும். இந்த நான்கிலும் சரியான பீஸாவை பெயரைச் சொன்னால் அடுத்த கட்ட சோதனைக்குச் சென்று பிரமாதமான பரிசுகளைத் தட்டிச் செல்ல முடியும்

இவர்களை சோதிப்பதற்காக ஜெர்மனியில் கிடைக்கக்கூடிய ஏறக்குறைய 200 விதமான பீஸாக்களை வரவழைத்து அதனை பெரிய குளிர்சாதனப் பெட்டியில் வைத்து விட்டனர். இது கண்ணாடியால் ஆன குளிர்சாதனப் பெட்டி. நிகழ்ச்சியைப் பார்த்துக் கொண்டிருக்கும் பார்வையாளர்களுக்கும் தெரியும் வகையில் பீஸாக்களை இந்த கண்ணாடி குளிர்சாதனப் பெட்டியில் வைத்து விட்டனர். இதில் இத்தாலியன், ஆசியன், கொரியன், அமெரிக்கன் பீஸாக்களும் அடங்கும். இப்போது மிகப் பிரபலமாக உள்ளூர் அங்காடிகளில் கிடைக்கக்கூடிய Big Pizza வகைகளும் அடங்கும்.

இரண்டு நண்பர்களையும் கண்களைக் கட்டி ஒருவருக்கு முன் ஒருவரை அமர வைத்து விட்டனர். கண்கள் நன்றாக மறைக்கப்பட்டிருப்பது உறுதி செய்யப்பட்டபின் சோதனை ஆரம்பமானது. இந்த பீஸா குவியலிலிருந்து ஒன்றை எடுத்து அதன் அட்டைகளை உருவி விட்டு ஒருவர் கையில் வைக்க, அதனை விரல்களால் தொட்டுப் பார்த்தே அதில், காளான் அல்லது மிலகாய், அல்லது டூனா, காய்கறிகள் இருக்கிறது என்று சொல்லிக் கொண்டே 4 பீஸாக்களையும் நண்பர்கள் கண்டு பிடித்து விட்டனர். ஒவ்வொரு பீஸாவையும் நிகழ்ச்சி நடத்துனர் இவர்கள் கையில் கொடுக்கும் போது எனக்கு சந்தேகம் தான். எப்படி இவர்கள் சரியாக இதன் brandஐ கண்டுபிடிக்கப் போகின்றார்கள் என்று. ஒவ்வொரு சோதனைகளையும் இரண்டு நிமிடங்களுக்குள் செய்து முடித்து வெற்றி பெற்றனர் இந்த நண்பர்கள். ஏந்த வகை பீஸா என்று கூட சுலபமாக சொல்லிவிட முடியும். ஆனால் அது எந்த brand என்று கண்டு பிடிப்பது அவ்வலவு சுலபமான காரியம் இல்லையே. சீஸ் பீஸாவிலேயே 30 வகை இங்கு கிடைக்கின்றன. அதேபோலத்தான் டூனா பீஸாக்களிலும் 20 / 30 வகைகள். இப்படியிருக்க இவர்களால் இப்படி பிரித்து இனம் கண்டு பிடிக்க முடிந்ததைப் பார்த்து என்னால் வியக்காமல் இருக்க முடியவில்லை. இதுவரை பார்த்திராத, மிக மிக ஆச்சரியப்பட வைத்த சுவாரசியமான போட்டி இது.

வந்தது பிரச்சனை!

2005-02-19T04:31:00.000-08:00

கடந்த ஒரு வருடமாக நான் ஸ்டுட்கார்ட் நகரத்திலுள்ள விநாயகர் ஆலயத்தில் வீணை வாசிக்கக் கற்றுக் கொண்டிருக்கின்றேன். ஆசிரியர் யாழ்ப்பாணத்திலிருந்து வந்த இசை தம்பதியர். கணவர் வயலின் கற்றுக் கொடுக்க மனைவி வீணையும் வாய்ப்பாடும் சொல்லித் தருகின்றார். இதுவரை வகுப்பு மிக நன்றாக நடந்து கொண்டுதானிருந்தது. ஏறக்குறைய 30 மாணவர்கள் படித்துக் கொண்டிருந்தனர். கடந்த வாரம் வகுப்புக்குச் சென்ற போது ஆசிரியர் தம்பதிகள் வகுப்புக்களை நிறுத்தப்போவதாக சொன்ன போது அதிர்ச்சியடையாமல் இருக்க முடியவில்லை. காரணம் இது தான்.

முதலில் ஸ்டுட்கார்ட் நகரில் ஒரு விநாயகர் ஆலயம் இருந்தது. நிர்வாகத்தில் ஏற்பட்ட பூசலில் இந்த ஆலயம் இரண்டாகப் பிரிந்து மூலவிக்ரகத்தை எடுத்துக் கொண்டு சென்று விட்டனர் ஒரு குழுவினர். அதன் பிறகு தொடக்கத்திலிருந்து இந்த ஆலயத்தை ஆரம்பித்து நடத்தி வருபவர்கள் இந்தியாவிலிருந்து சுவாமி சிலைகளை வரவழைத்து, ஒரு கட்டிடத்தின் 2ம் தளத்தில் இந்தக் கோயிலை ஆரம்பித்து நடத்தி வருகின்றனர். மூலவிக்ரகத்தை எடுத்துச் சென்ற மற்றொரு குழுவினர் இந்த கோயில் இருக்கும் இடத்திலிருந்து 15 கிமீ தூரத்திலேயே இன்னொரு ஆலயத்தை அமைத்து அதனை பராமரித்து வருகின்றனர். இரண்டு ஆலயங்களுக்கும் ஒரே பெயர். ஒரு ஆலயத்திற்குச் செல்பவர்கள் மற்ற ஆலயத்திற்குச் செல்லக்கூடாது என்பது மாதிரியான எழுதா சட்டம் வேறு. ஆக ஒரு ஆலயத்தில் இசை வகுப்பு நடப்பதால் மற்ற கோயிலுக்குச் செல்பவர்கள் இந்த இசை வகுப்பில் கலந்து கொள்ளமுடியாத நிலை. படிப்படியாக வந்து கொண்டிருந்த 30 மாணவர்களில் பலர் நின்று விடவே இப்போது 10 மாணவர்கள் மட்டுமே ஆசிரியர் குடும்பத்திற்கு மிஞ்சியிருக்கின்றனர்.
இந்த வகுப்புக்களின் வழி தான் அவருக்கு மாத வருமானமே. இப்படிப் பட்ட நிலையில் இவர்கள் என்ன செய்ய முடியும்?

ஜெர்மனியில் பொதுவாக மூலைக்கு மூலை Volkshochschule எனப்படும் கல்விக் கூடங்கள் இருக்கின்றன. பொதுவாக இங்கு ஜெர்மானிய, ஆங்கில, ப்ரெஞ்சு போன்ற மொழிகளோடு மற்ற ஏனைய இசைக் கருவிகள் வாசித்தல், சமையல், தையல் கலை, கைவினைப் பொருட்கள் செய்யும் கலை போன்றவற்றிற்கான வகுப்புக்களும் நடக்கின்றன. ஆக எங்கள் இசை ஆசிரியரிடம் இந்த Volkshochschule மாதிரியான பள்ளிகளில் பதிந்து கொண்டு வகுப்புக்களை நடத்த ஆரம்பிக்க வேண்டியது தானே. தமிழர்கள் மட்டுமன்றி மற்ற இனத்தவரும் சேர்ந்து படித்து தெரிந்து கொள்ள பயனுள்ளதாக இருக்குமே என்று சொல்லிப் பார்த்தேன். அதற்கு அவர் கூறிய பதில் வேதனைக்குறியது.

இப்போது 30EUR ஒரு மாணவருக்குக் கட்டணம் விதிக்கிறோம். அதையே அங்கே செய்ய முடியாது. ஏனென்ற஡ல் குறைந்த பட்சம் 50EUR கட்டணம் வசூலிக்க வேண்டும். மற்ற இனத்தவர் நடத்தும் வகுப்புக்களின் சராசரி கட்டணம் இப்படித்தான் இருக்கின்றது. அதோடு இந்த வகுப்புக்களை நடத்த இடம் தருவதால் பள்ளி நிர்வாகத்தினருக்கும் குறைந்த பட்சத் தொகையாக (ஏறக்குறைய 100 அல்லது 200 EUR ) தரவேண்டியிருக்கும். 50க்கு கட்டணத்தை உயர்த்திவிட்டால் இப்போது வருகின்ற தமிழ் மாணவர்கள் கூட அப்போது வரமாட்டார்கள். 50 EUR என்பது மிகப்பெரிய தொகையாகிவிடும். வகுப்புக்களைத் திறமையாக சிறப்பாக நடத்த Volkshochschule பள்ளிகளில் நடத்துவது தான் சிறந்தது. ஆனால் இது எங்களுக்கு ஒரு விஷப்பரீட்சையாக முடிந்து விட்டால் எங்களுக்குத்தான் பிரச்சனை" என்று சொல்லி வருந்தினார்.

ஆக இரண்டு பிரச்சனைகள் இங்கு முன் நிற்கின்றன.
1. பிளவு பட்டுக் கிடக்கும் ஸ்டுட்கார்ட் தமிழ் மக்களால் பரிதாபமாக இந்த இசை வகுப்பு பாதியிலேயே நிற்க வேண்டிய நிலை வந்து விட்டதே என்பது.
2. தெய்வீக அனுபவத்தை ஈட்டித் தரும் இசையைக் கற்றுக் கொள்ள பணத்தை ஒரு காரணமாகக் காட்டி வகுப்புக்களுக்கு வராமல் நின்று விடுவதா என்பது.

நல்ல பண்புகளையும் நல்லனவற்றையும் தூரத்தள்ளி வைத்து வெறுப்பை வளர்த்துக் கொள்வதால் யாருக்குப் பயன்? தொடர்ந்து கொண்டிருக்கும் இந்த விதண்டாவாதப் போக்கினால் யாருக்கும் நண்மை ஏற்பட்டதாக எனக்குத் தெரியவில்லை. இழப்புக்கள் தான் அதிகரிக்கின்றன!

ஜெர்மனிக்கு வருகை தரவிருக்கும் VIP

2005-02-17T01:52:00.000-08:00

1989ல் ஹெல்முட் கோல் அவர்கள் சேன்சலராக இருந்த பொழுது, இப்போதைய அமெரிக்க அதிபரின் தந்தை புஷ் ஜெர்மனிக்கு சிறப்பு விஜயம் செய்திருந்தார். அப்போது அவருக்கு ஜெர்மானிய மக்களிடமிருந்து மிகப் பெரிய வரவேற்பு கிடைத்தது. ஆனால் வருகின்ற 23ம் தேதி ஜெர்மனிக்கு வருகை தரவிருக்கும் புஷ் எப்படிப்பட்ட வரவேற்பை பொதுமக்களி
டமிருந்து பெற்றுக் கொள்ளப்போகிறார் என்பது இப்போது ஒரு புதிராகத்தான் இருக்கின்றது. BBCயின் ஒரு ஆய்வில் 77% ஜெர்மானிய மக்களின் சிந்தனையில் அமெரிக்க அதிபர் புஷ் மீண்டும் அதிபராகத் தேர்ந்தெடுக்கப்பட்ட நிகழ்வு ஒரு அபாயகரமான ஒன்று என்று அவர்கள் நினைப்பதாக சில வாரங்களுக்கு முன்னர் படித்ததாக ஞாபகம்.

இப்போதைய சூழ்நிலையில் பொதுவாக ஜெர்மானிய மக்களுக்கு அமெரிக்க அதிபர் புஷ் மக்களின் மனம் கவர்ந்த ஒருவரல்ல. ஈராக் போர் ஆரம்பித்த காலம் தொட்டு இந்த மனப்போக்கு பெரிதாக வளர்ந்து வந்திருக்கின்றது. பொதுமக்கள் மட்டுமன்றி அரசாங்கத் தலைவர்களும் புஷ்ஷுக்கு எதிர்ப்பான தங்கள் அபிப்ராயங்களையே முன் வைத்து செயல்பட்டனர், அச்சமயத்தில். போர் ஆரம்பித்த பின்னர் சிலமுறை இரண்டு நாடுகளின் அரசியல் தூதுவர்களிடையே பல சமாதான தூது போகும் நிகழ்வுகள் நடந்தன. கடந்த ஆண்டு ஜெர்மானிய வெளியுறவு அமைச்சர் பிஷர் அமெரிக்கா சென்று வந்தததும் இந்த முக்கிய நோக்கத்தோடுதான். ஆனாலும் பெரிதாக எந்த பலனும் கிடைத்தபாடில்லை. இதற்கிடையே ஜெர்மனியின் மிகப் பிரபலமான ஒரு எதிர்கட்சியின் தலைவியான அங்கேலா, புஷ்ஹுக்கு சாதகமாக பல வேளைகளில் தனது அபிப்ராயங்களை வெளியிட்டிருக்கின்றார். மிக வித்தியாசமாக சிந்திக்கக் கூடிய அங்கேலா இப்படி புஷ்ஷுக்குச் சாதகமாகப் பேசுவதை அவருடைய ஆதரவாளர்களில் சிலர் கூட எதிர்த்திருக்கின்றனர். கடந்த 2 வாரங்களுக்கு முன்னர் நடைபெற்ற பனிப்பேய் விரட்டும் வைபவமான ரோஸன் மோண்டாக் வீதி உலா வைபவத்தின் போது புஷ்ஷையும் அங்கேலாவையும் கேலி பேசும் ராட்ஷச பொம்மைகளையும் ஊர்வலத்தில் சேர்த்திருந்தனர்.

இது ஒரு பக்கம் இருக்கட்டும். இப்போது ஜெர்மனிக்கு ஒரு நாள் வருகை மேற்கொள்ளவிருக்கும் புஷ்ஷைப் பாதுகாப்பாக ஊருக்கு அனுப்பி வைக்கவேண்டுமே என்பதில் தான் பாதுகாப்பு அதிகாரிகள் குறியாக இருக்கின்றார்கள். தொலைக்காட்சி
செய்தியில், ஒரு அதிகாரி குறிப்பிடும் போது, "கிளிண்டண், கோர்பாஷொவ், போப், ரீகன், ஷீராக் என் பல முக்கியஸ்தர்களை வரவேற்றிருக்கின்றோம். ஆனால் இப்போது புஷ்ஷை பாதுகாப்போடு வரவேற்பது தான் எங்களுக்கு வந்திருக்கும் மிகப் பெரிய சவால்" என்று குறிப்பிடுகின்றார்.

23ம் தேதி ப்ராங்பெர்ட்டின் ஒரு பகுதி நெடுஞ்சாலை புஷ் வருகைக்காக மூடப்படவிருக்கின்றது. மிக அழகிய நகரமான மைன்ஸ் நகரைக் கடந்து ரைன் நதிக்கரை ஓரத்தில் இருக்கும் குர்பூர்ஸ்லிஷஸ் அரண்மனையில் புஷ் அரசியல் பிரமுகர்
களை சந்திப்பதற்கு ஏற்பாடுகள் நடக்கின்றன.

அருகாமையில் உள்ள சில பள்ளிகளுக்கும் அன்று விடுமுறையாம். இப்படி ஏகப்பட்ட ஏற்பாடுகள்.

தேசிய காற்பந்து விளையாட்டு ஊழல்

2005-02-01T09:32:00.000-08:00

தமிழகத்தில் எப்படி கொலை செய்திகள் தற்பொழுது தொலைகாட்சிகளை ஆக்கிரமித்துக் கொண்டிருக்கின்றனவோ அதே போல உள்நாட்டு ஜெர்மானிய தொலைகாட்சி செய்தி நிறுவனங்களுக்கு அல்வா சாப்பிடுவது போல அமைந்து விட்டது தற்போதைய காற்பந்தாட்ட ஊழல் விவகாரம். காற்பந்து விளையாட்டு என்பது ஜெர்மானியர்களுக்கு மிக முக்கியமான ஒரு விஷயம். அதிலும் கடந்த 2 வாரங்களுக்கு முன் ஆரம்பிக்கப்பட்ட தேசிய காற்பந்தாட்ட போட்டி (Bundesliga) என்பது எல்லா தரப்பு மக்களிடையேயும் பெருத்த வரவேற்பை ஏற்படுத்தும் ஒரு முக்கிய நிகழ்வு. அடுத்த ஆண்டு உலகப் பந்தயத்தை ஏற்று நடத்தவிருக்கும் ஜெர்மனி தனது இளம் காற்பந்து வீரர்களையும் மக்களுக்கு இந்த போட்டியின் வழி அறிமுகப்படுத்துகின்றது என்றே சொல்லலாம். தமிழகத்தில் ரஜினிகாந்த் விஜய் போன்றவர்களுக்கு இருப்பது போன்ற வரவேற்பு இங்கு ஓலிவர் கான், மிஷயல் பாலாக், குரானி போன்றவர்களுக்கு இருக்கின்றது என்றால் எந்த அளவுக்கு மக்கள் இந்த விளையாட்டின் மேல் பற்று வைத்திருக்கின்றார்கள் என்று தெரிந்து கொள்ளலாம்.

இந்த நிலையில் தற்போது வெளியாகி பரபரப்பாகி இருக்கும் விஷயம் இந்த தேசிய காற்பந்து விளையாட்டில் மறைமுகமாக நடந்து கொண்டிருக்கும் ஊழல் விஷயம். கடந்த வார ஆரம்பத்தில் பெரும் அளவில் லஞ்சம் வாங்கிய விளையாட்டு வீரர்கள், மற்றும் ரெப்ரி ஆகியோரின் பெயர்களை காவல்துறை வெளியிட்டது. இவர்களில் குற்றம் நிரூபிக்கப்பட்ட அனைவரும் தகுந்த தண்டனையை அனுபவிக்க ஆரம்பித்திருக்கின்றனர்.

இந்த காற்பந்து ஊழலை துருவி ஆராய்ந்து வரும் காவல்துறையினர், இதில் ஐரோப்பிய அளவில் மாபியா தொடர்புடைய ஊழல் திட்டங்கள் இருக்கும் என்று நம்புகின்றனர். பெரும் அளவில் பணத்தை வாரிக் குவிக்கக்கூடிய காற்பந்து விளையாட்டில் இம்மாதிரியான அநாகரிகமான விஷயங்கள் எப்படியோ புகுந்து விடுகின்றன. ஜெர்மனியைப் பொறுத்தவரை இம்மாதிரியான விஷயம் நடப்பது இது இரண்டாவது முறை. 34 வருடங்களுக்கு முன்னர் இதே போன்ற பந்தயம் நிர்மானிக்கும் ஊழல் ஜெர்மனியை கலக்கியது. புகழ்பெற்ற பீலபெல்ட் நகர குழு அப்போது இந்த "நல்ல" செயலைச் செய்து பெறும் புகழ் பெற்றது. இப்போது பாடர்போன் குழு.

இந்த நிலைத் தொடர்ந்தால் காற்பந்தாட்ட வீரர்கள் மேல் பொது மக்களுக்கு அவநம்பிக்கை ஏற்படும் என்பது உண்மை. அதிலும் அடுத்த ஆண்டு உலகக் காற்பந்தாட்ட விளையாட்டு நடக்க இருக்கும் வேளையில் உலகம் முழுதும் ஜெர்மனியை நோக்க ஆர்ம்பிக்கும் போது ஜெர்மானிய காற்பந்து விளையாட்டு வீரர்கள் கட்டுப்பாட்டை மேற்கொண்டு நல்ல பெயரை தக்கவைத்துக் கொள்ள முயற்சி செய்ய வேண்டியது மிக அவசியம்.

புதிய அனுபவம்

2005-01-30T01:11:00.000-08:00

இது வரை ஒரு உணவகத்தில் வேலை செய்த அனுபவம் என்பது எனக்கு இல்லை. அந்த குறையும் நேற்று நிவர்த்தியாகிவிட்டது. எனது அலுவலக நண்பன் பொழுதுபோக்கிற்காக ஒரு இசைக்குழுவில் இருக்கின்றான். அருமையாக கித்தார் வாசிப்பவன். எனக்கும் இசையில் விருப்பம் இருப்பது தெரிந்த அவன் அவனுடைய இசை நிகழ்ச்சி ஒன்றிற்கு என்னை அழைத்திருந்தான். நிகழ்ச்சி நடைபெறும் இடம் ஒரு இரவு உணவு விடுதி. ஜெர்மானிய பாரம்பரிய அம்சங்களோடு, அதாவது பியர், பியர், பியர் என விதம் விதமான பானங்களையும் ஜெர்மானிய பாரம்பரிய உணவு விரும்பி சாப்பிடுவதற்காகவும் மக்கள் வருகின்ற ஒரு இடம் என்று அங்கு சென்ற பிறகு தான் தெரிந்து கொண்டேன்.

நிகழ்ச்சி ஆரம்பிப்பதற்கு 1 மணி நேரத்திற்கு முன்னதாகவே சென்று விட்டேன். நண்பனின் இசைக்குழு உறுப்பினர்களில் சிலர் எனக்கு முன்னரே அறிமுகமானவர்கள் தான். அவர்களில் இங்கிலாந்துகாரர்கள் இருவர். இங்கேயே வேலை காரணமாக தங்கி வாழ்பவர்கள். இவர்களோடு உரையாடிக் கொண்டிருக்கும் போது குழுவின் மேனேஜர் பாவ்ல் என்னிடம் வந்து ஒரு உதவி வேண்டும் என்று கேட்டார். நிகழ்ச்சிக்கான கட்டணத்தை வசூலிக்கும் பெண் திடீரென்று வர முடியாத காரணத்தால் அவர்களுக்கு உதவி தேவைப் படவே அவர்களிலிருந்து வித்தியாசமாக இருக்கும் என்னிடம் உதவி கேட்டு வந்து விட்டனர். எனக்கு மனதிற்குள் கொஞ்சம் பயம் என்றாலும், சரி பார்ப்போமே என்று ஒத்துக் கொண்டுவிட்டேன். இசைக் குழுவினர் அனைவருக்கும் நான் ஒத்துக் கொண்டதில் மகிழ்ச்சி.

வேலை ரொம்ப சுலபம். டிக்கட்டுக்கான பணத்தை வாங்கிவிட்டு புத்தகத்தில் கோட்டிட்டுக் குறித்துக் கொள்ள வேண்டும். பணம் கொடுத்தவர்களின் கையில் ஒரு ஸ்டிக்கரை ஒட்டி விட வேண்டும். இவ்வளவு தான்.

கொஞ்சம் கொஞ்சமாக கூட்டம் வர ஆரம்பிக்க வேலையைத் தொடங்கி விட்டேன். உணவகம் முழுதும் மக்கள் கூட்டம். நல்ல வருமானம் இசைக் குழுவினருக்கும். வேலையை பார்த்துக் கொண்டிருக்கும் போதே காபி, தண்ணீர், French Fries, Potato Puree, Salad என எனக்கான உணவு மேசைக்கு வந்து கொண்டே இருந்தது. Jazz இசையை ரசித்துக் கொண்டும் உணவை சுவைத்துக் கொண்டும் வேலையைப் பார்ப்பது சுவாரசியமாக இருந்தது. இப்படி உட்கார வைத்து சாப்பாடு போடுகின்றார்களே என்று நினைத்த போது இந்த வருடம் பினாங்கு தைப்பூசத்தில் கலந்து கொள்ளவில்லையே என்ற கவலையும் நீங்கியது. (எங்கள் ஊர் தைப்பூசத்தில் தண்ணீர் மலைக் கோவில் முருகனுக்கு காவடி எடுப்பது மாத்திரம் பிரபலம் அல்ல. அங்கு கட்டியிருக்கும் தண்ணீர் பந்தல்களில் மக்களை வரவேற்று உபசரித்து உணவு வழங்குவார்களே அது தான் ரொம்ப ரொம்ப பிரபலம்)

Electrical Guitar Exhibition in Mannheim, Germany

2004-01-10T10:56:00.000-08:00

நீண்ட நாட்களுக்குப் பிறகு இப்பகுதியின் வாசகர்களாகிய உங்களை மறுபடியும் சந்திப்பதில் மகிழ்ச்சி. வசந்த காலம் முடிந்து கோடை காலத்தை வரவேற்றுக் காத்துக் கொண்டிருக்கும் பல ஐரோப்பிய நாடுகளில் ஜெர்மனியும் ஒன்று. நமது ஆசிய நாடுகளில் சமய திருவிழாக்கள் எப்படி பிரபலமாக இருக்கின்றனவோ அதே போல ஜெர்மனியிலும் பல சாலையோர திருவிழாக்கள் நடைபெற ஆரம்பித்து விட்டன. வெயில் கொளுத்தும் இந்தக் கோடை காலத்தை ஐரோப்பிய மக்கள் நன்றாகவே பயன்படுத்திக் கொள்ள எடுக்கும் முயற்சி ஆச்சரியப்பட வைக்கின்றது. சாலையோர விழாக்கள் சனிக்கிழமை மற்றும் ஞாயிற்றுக் கிழமைகளில் இங்கு மிகப் பிரபலம். இதனைப் பற்றி மேலும் பல செய்திகளை பிறகு தருகின்றேன்.

ஸ்டுட்கார்ட் நகருக்கு வடமேற்கில் ஏறக்குறைய 130 KM தூரத்தில் இருக்கும் ஒரு நகரம் மான்ஹைம். இங்குள்ள "Landesmuseum fuer Technik und Arbeit" (தொழில்துறை மற்றும் தொழில்நுட்பம்) கண்காட்சி மையத்தில் மின்சாரத்தில் இயங்கும் கித்தார்-களின் கண்காட்சி ஒன்று ஏற்பாடு செய்யப்பட்டிருந்தது. தனிப்பட்ட முறையில் எனக்கு கித்தார்களின் மீது மோகம் இல்லையென்றாலும் நண்பர்களின் அழைப்பின் பேரில் நாமும் கலந்து கொள்ளலாமே என்று முடிவு செய்து இந்த கண்காட்சி நிலையத்துக்குப் புறப்பட்டோ ம். ஏறக்குறைய கடந்த 4 மாதங்களாக தொடர்ந்து நடைபெற்று வரும் இந்த கண்காட்சி வருகின்ற ஜூன் மாதம் 6ம் திகதியோடு முடிவடைந்து விடும்.

தொழில்நுட்ப வளர்ச்சி சம்பந்தப்பட்ட பல வரலாற்று சின்னங்களும் இயந்திரங்களும் இருக்கும் இந்த கண்காட்சி மையத்தின் நுழைவாசலில் மிகப்பெரிய பறக்கும் அசுரனின் சிலை ஒன்று வைக்கப்பட்டிருக்கின்றது. நமது இதிகாசங்களில் ஒன்றான இராமாயணத்தில் வருகின்ற அனுமார் ஞாபகம் தான் முதலில் எனக்கு இந்த சிலையைப் பார்த்ததும் தோன்றியது.

கண்காட்சி அரங்கத்தில் பல வர்ணங்களிலான கித்தார்கள் காட்சிக்கு வைக்கப்பட்டிருந்தன. இதுவரை நான் பார்த்திராத அளவுகளில், வடிவங்களில், வகைகளில் ஏராளமான கித்தார்கள். பொதுவாக எல்லா கண்காட்சி மையங்களில் இருப்பது போலவே இங்கும், மின்சாரத்தில் இயங்கும் கித்தாரின் பின்னனி, பல தரப்பட பழம் கித்தார்கள், அதனை உலகுக்குப் பிரபலப்படுத்திய நபர்களைப் பற்றிய விபரங்கள் என பலதரப்பட்ட வரலாற்று சம்பந்தப்பட்ட விஷயங்கள் விபரமாக விளக்கப்பட்டிருந்தன. ஜெர்ம்னியில் கித்தாரின் மோகம் ஏறக்குறைய 1955 முதல் 1959 களில்தான் தொடங்க ஆரம்பித்திருக்கின்றது. பழமை சித்தாந்தத்தைப் போக்கி புதுமை சிந்தனையை உருவாக்க ஏற்பட்ட பல முயற்சிகளில் இசை மற்றும் வாத்தியக் கருவிகளின் பங்கும் உண்டு என்று சொன்னால் நிச்சயமாக மறுக்கமுடியாது. இந்த காலகட்டத்தில் ஜெர்மனியின் முக்கிய நகரங்களில் பற்பல மேடை நிகழ்ச்சிகள் நடந்திருக்கின்றன. இவ்வகை மேடை நிகழ்ச்சிகளின் போது அதில் மூழ்கிப்போகும் இளைஞர்கள் பலர், வன்முறைகளில் ஈடுபட்டு இறந்த நிகழ்ச்சிகளைப் படமாக்கி ஒரு பகுதியில் திரையிட்டுக் கொண்டிருந்தனர். இது சற்று வித்தியசமாகத்தான் தோன்றியது. 60களிலும் 70களில் ஒவ்வொரு வருடமும் நடைபெற்ற ஒவ்வொரு மேடை நிகழ்ச்சிகளிலும் 200க்கும் குறையாத பாதிக்கப்பட்டவர்களின் எண்னிக்கையை பட்டியலிட்டு இந்த குறும்படம் காட்டுகின்றது.

இந்த கண்காட்சியில் சிறப்பு அம்சமாக கித்தார்களை உருவாக்கும் முறையையும் காட்டுகின்றனர். சாதாரண மரப்பலகையாக இருக்கும் ஒன்று ஒரு சிற்பியின் கையில் இழைக்கப்பட்டு அது இனிமையான இசையினை உருவாகும் கித்தாராக உருவெடுக்கும் நிகழ்வை பார்த்து மகிழ முடிகின்றது. கித்தார் பிரியர்களுக்கு இது மிகவும் பயனுள்ள ஒரு அம்சமாகத்தான் இருக்கும். கித்தார்களின் மேல் மோகம் கொண்ட இசைப் பிரியர்கள் இந்த விடுமுறை காலத்தில் ஜெர்மனி வர திட்டமிட்டிருந்தால் மான்ஹைம் நகரில் இருக்கும் இந்த கண்காட்சி மையத்திற்கும் வரத்தவராதீர்கள். இந்த நிகழ்வைப் பற்றி மேலும் பல விபரங்கள் அறிந்து கொள்ள விரும்பினால் கீழ்காணும் வலைத்தளத்திற்குச் சென்று வாசிக்கலாம்.

http://www.stromgitarren.de/English/indexe.htm

Turkey & EU

2004-01-06T11:03:00.000-08:00

ஜெர்மனியில் ஜெர்மானியர்களுக்கு அடுத்தபடியாக மிகப் பெரிய எண்ணிக்கையில் இருப்பவர்கள் துருக்கியர்கள்தான். இந்த நாட்டில் எந்த மூலையிலும் Doner Kebab கடைகள் இருக்கும். துருக்கியை அடுத்து ஜெர்மனிதான் அவர்களுக்கு அடுத்த தாய்நாடு என்று சொல்லுமளவுக்கு இங்கு துருக்கியர்கள் வாழ்கின்றார்கள். ஏறக்குறைய 30 ஆண்டுகளுக்கு முன்னர் உடல் உழைப்பு வேலைகளுக்காக இங்கு அழைத்து வரப்பட்ட துருக்கியர்கள் படிப்படியாக இங்கேயே தங்கி குடியுரிமையும் பெற்றுக்கொண்டு வாழ்கின்றனர். பெரும்பாலும் உணவுக்கடைகள், அங்காடிக் கடைகள், துணிக்கடைகள், உடல் உழைப்புத் துறைகள் என்று இருந்தவர்கள் இப்போது பலவாறாக அனைத்து தொழில்துறையிலும்
இறங்கிவிட்டனர். ஆனாலும் கணினித்துறையைப் பொருத்தவரை எனது அனுபவத்தில் விரல் விட்டு எண்ணக்கூடிய தொகையில் தான் துருக்கியர்கள் நுழைத்திருக்கின்றனர்.

ஐரோப்பிய ஒன்றியத்தில் துருக்கி இன்னமும் சேரவில்லை. துருக்கி இணைவதைப் பற்றி பலவாறான கருத்துக்கள் தொடர்ந்து இருந்து வருகின்றன. குறிப்பாக சைப்ரஸ் நாட்டில் நடந்து வரும் அரசியல் குழப்பங்களுக்கு நேரடியாகவும் மறைமுகமாகவும் துருக்கியும் ஒரு காரணமாக இருப்பது ஒரு தவறான மதிப்பையே இதுவரை துருக்கிக்கு வழங்கி வந்தது. இருப்பினும் இந்த நிலையில் மாற்றங்கள் நிகழ்வதற்கான சாத்தியங்கள் இப்போது படிப்படியாக தெரிய ஆரம்பிக்கின்றன. ஜெர்மனிக்குத் தற்சமயம் வருகை புரிந்திருக்கும் துருக்கிய அதிபர் Recep Tayyip Erdogan அதற்கான வழிகளை மேற்கொள்ள ஆரம்பித்திருக்கின்றார்.

துருக்கிய நாட்டினருக்குப் பல தரப்பட்ட வகைகளில் ஜெர்மனியிலிருந்து உதவிகள், தொடர்ந்து கிடைத்துக் கொண்டிருப்பதை யாரும் மறுக்க முடியாது. கடந்த ஆண்டு தென்கொரியாவில் நடந்த சாக்கர் விளையாட்டில் துருக்கிய நாட்டைப் பிரதிநிதித்து விளையாடிய விளையாட்டாளர்களில் சிலர் ஜெர்மனியில் பயிற்சி பெற்றவர்கள் தாம். இஸ்தான்புல், அன்கரா, அண்டாலியா போன்ற முக்கிய நகரங்களில் ஜெர்மானிய சுற்றுப்பயணிகளை நம்பியே பல சுற்றுலா நிறுவனங்கள் வாழ்ந்து கொண்டிருக்கின்றன. துருக்கியின் மிக உயர்ந்த செல்வமாகக் கருதப்படும் கம்பளங்களும் மிக அதிகமாக ஜெர்மனியில் விற்கப்படுகின்றன. இப்படிப் பல தரப்பட்ட வகையில் இருதரப்பட்ட நாடுகளுக்கான தொடர்புகள் இருந்து வருகின்றன.

70 மில்லியன் மக்கள் வாழும் துருக்கியிலும் இப்போது பொருளாதார நெருக்கடியின் பாதிப்பு இருந்து கொண்டுதான் இருக்கின்றது. ஐரோப்பிய ஒன்றியத்தில் இணைவதன் வழி வெளி நாடுகளுக்கு, அதிலும் குறிப்பாக ஜெர்மனிக்கு வேலைத்தேடிச் செல்லக் கூடிய வாய்ப்பு மேலும் சிறப்பாக அமையும் என இவர்கள் நம்பிக் கொண்டிருக்கின்றனர். பொருளாதார வல்லரசாக இருந்த ஜெர்மனியிலேயே 3 மில்லியன் மக்கள் வேலையில்லாமல் இருக்கும் இந்த நிலையில் இது ஒரு கனவாக மட்டுமே இருக்க முடியும் என்றுதான் நினைக்கத் தோன்றுகின்றது.

Cannibal ..??

2004-01-03T11:07:00.000-08:00

உணவு சாத்விகமாக இருக்க வேண்டும்; அப்போதுதான் மனமும் பக்குவப்படமுடியும் என்ற பாரம்பரியத்தில் வருகின்ற நமக்கு அதிர்ச்சி அளிக்கும் நிகழ்வுகள் அவ்வப்போது நடந்து கொண்டுதானிருக்கின்றன. ஜெர்மனியில் மனிதர்களைச் சாப்பிடும் ஒருவரை காவல்துறை கைது செய்திருக்கின்றனர். அவரது பெயர் 'Armin Meiwes'. காவலர்களிடம் மாட்டிக்கொண்ட பின்னர் தனது தவறுகளை ஒத்துக் கொண்டிருக்கின்றார் இந்த மனிதர்.

ஏறக்குறைய 30 விழுக்காட்டு ஜெர்மன் மக்கள் சைவ உணவு விரும்பிகளாக இருக்கின்ற இந்த காலத்தில் 'இடி அமினின்' வழியைக் கடைப்பிடிக்கும் இந்த வகை மனிதர்களைப் பற்றி என்ன நினைக்க முடியும்?

இந்த மனிதர் தனது உணவாக்கிக் கொண்ட மனிதர்களை இண்டெர்நெட் மூலமாகத்தான் வலை விசிப் பிடித்திருக்கின்றார். காசல் நகரில் வாழும் இவர் பெர்லின் நகர மனிதர் ஒருவரைச் சாப்பிட்டதற்காகப் பிடிபட்டிருக்கின்றார்.

சக மனிதர்களிடம் கொஞ்சம் அதிகமாகவே ஜாக்கிரதையாக இருக்க வேண்டிய காலம் வந்துகொண்டிருக்கின்றது என்பதற்கான அடையாளங்களா இவை?
இந்த செய்தியைப் பற்றி மேலும் அறிய http://www.dw-world.de/english/0,3367,1432_A_1078601_1_A,00.html !

Silvester in Berlin

2004-01-01T11:08:00.000-08:00

புது வருட கொண்டாட்டங்கள் உலகம் முழுவதும் பேசப்டுகின்ற நேரம் இது. ஜெர்ம்னியின் எல்லா மூலைகளிலும் 31 டிசம்பர் முடிந்து 1 ஜனவரி தொடங்கும் நேரத்திற்காக பெரியவர்கள்ம் இளைஞர்கள், குழந்தைகள் எல்லோரும் கைகளில் பட்டாசுக் குவியல்களை வைத்துக் கொண்டு
காத்திருப்பர்.சரியாக 12:00 மணிக்கு தொடங்கும் இந்த பட்டாசு வான வேடிக்கை நிகழ்ச்சி 1 மணி நேரம் கூட நீடிப்பதுண்டு. கடந்த ஆண்டு பணி கொட்டி சாலையெல்லாம் நிரம்பியிருந்த போதும் விடாமல் பட்டாசுகளை வெடித்து மகிழ்ந்தது எனக்கும் மறக்க முடியாத ஒரு அனுபவம்.

ஜெர்ம்னியின் எல்லா இடங்களிலும் இம்மாதிரியான கோலகல கொண்டாட்டங்கள் நிகழ்ந்து கொண்டிருந்தாலும் தலைநகரான பெர்லினில் நடை பெறும் மிகப்பெரிய கேளிக்கை விருந்து நிகழ்ச்சி உலகப் பிரசித்தி பெற்ற ஒன்றாக இப்போது மாறிக் கொண்டிருக்கின்றது. இது ஒரு புதிய மாற்றம். 1995 முதல் தான் பெர்லினில் மிகப் பெரிய அளவில் புத்தாண்டு வரவேற்பு நிகழ்ச்சிகள் ஆரம்பிக்கப்பட்டன. 2000 ஆண்டு தொடக்கம் மிகப் பெரிய அளவில் பெரிய வாணவேடிக்கை நிகழ்ச்சியோடு கொண்டாடப்பட்டபோது பெர்லினும் இவ்வகை நிகழ்ச்சிகளுக்கு புகழ் பெற்ற ஒரு இடமாக உலக அரங்கில் பேசப்பட்டது. இது தொடர்ந்து இந்த ஆண்டும் நிகழ்ந்துள்ளது.

ஏறக்குறைய 1 மில்லியன் மக்கள் கூடியிருக்க இந்த ஆண்டு கொண்டாட்டம் நிகழ்ந்துள்ளது. வான வேடிக்கை நிகழ்ச்சியோடு சாலையோரக் கடைகளில் விருந்து நிகழ்ச்சிகளில் கலந்து கொள்வது, கலைநிகழ்ச்சிகள் என மிகப் பிரபலமாக நடந்திருக்கின்றது இவ்வாண்டு கொண்டாட்டம்.

Brandenburg Gate வாசலில் 12 நிமிடங்களுக்கு இடைவிடாது நிகழ்ந்திருக்கின்றது புத்தாண்டு வரவேற்பு. இந்த வான வேடிக்கை நிகழ்ச்சியை நேரில் பார்ப்பவர்கள் ஒரு வகையில் கொடுத்துவைத்தவர்கள் தான். இதன் அழகை வார்த்தைகளால் சொல்ல முடியாது. இருண்ட வானத்தில் விதம் விதமான வர்ண ஜாலங்களை விதம் விதமான வடிவங்களை காட்டும் வகையில் இடைவிடாது அமைத்திருப்பர். இப்போது ஐரோப்பாவில் 4 இடங்களில் புத்தாண்டு கொண்டாட்டங்கள் பிரபலமானவையாக கருதப்படுகின்றன. பாரிஸ், பெர்லின், லண்டன் அதோடு ரோம். இந்த பெரிய நகரங்களில் புத்தாண்டு கொண்டாட்டங்களில் கலந்து கொள்வதற்காகவே சுற்றுலா வரும் வெளிநாட்டவரும் இப்போது அதிகரித்து வருகின்றனர்.

EU Presidency

2003-12-31T11:12:00.000-08:00

இந்த 2003ல் இத்தாலி ஜெர்மனி இரண்டு நாடுகளுக்குமிடையிலான உறவில் விரிசல் ஏற்பட்டிருப்பது ஐரோப்பிய நாடுகளிடையே கவலையளிக்கும் ஒரு விஷயமாகி இருக்கின்றது.

இத்தாலியின் சில்வியோ பெர்லுச்கோனி, இன்று ஐரோப்பிய ஒன்றியத்தின் தலைமைத்துவத்திலிருந்து விலகுகின்றார். மற்ற முந்தைய தலைவர்களோடு ஒப்பிடுகையில் இவரை பலரால் வெகு நாட்களுக்கு நிச்சயமாக மறக்க முடியாது; இந்த புகழ் அவரது திறமையான (??) வழி நடத்தலுக்காக
அல்ல; மாறாக அவரது தலைமைத்துவத்தின் போது அவரது பேச்சு ஜெர்மானியர்களைப் பாதித்த அளவிற்கு இதுவரை வேறு எப்போதும் நடந்ததில்லை.

தனிப்பட்ட முறையில், செல்வந்தரான பெர்லுச்கோனி, இத்தாலியின் பல முக்கிய தொலகாட்சி நிறுவனங்களை தனது கையில் வைத்திருப்பவர். power of media எந்த அளவிற்கு ஒருவரது செல்வாக்கை உயர்த்தி வைக்கும் என்பதில் இவரும் ஒரு நல்ல உதாரணம் என்று தாராளமாகச்
சொல்லலாம். தமிழகத்திலும் இந்த நிலைதானே இருக்கின்றது. அரசியல்வாதிகள் கைகளில் வானொலி தொலைகாட்சி நிலையங்கள் மாட்டிக் கொள்ளும் போது சுய விளம்பரம் செய்வதற்கு வேறு யாரையும் நாட வேண்டிய அவசியம் ஏற்படுவதில்லையே!

EU Parliment நடந்து கொண்டிருக்கும் போது பெர்லுச்கோனி ஜெர்மனியின் மார்ட்டின் சூல்ஸ் என்ற அரசியல்வாதியை நாஸி அங்கத்துவராக வைத்து பேசிய வார்த்தைகளை ஜெர்மானியப் பத்திரிக்கைகள் இன்றைக்கும் விளம்பரப்படுத்திக் கொண்டே இருக்கின்றன.

"Mr. Schulz, I know there is in Italy a man producing a film on the Nazi concentration camps, I'd like to suggest you for the role of guard. You'd be perfect." மார்ட்டின் பெர்லுச்கோனியைக் கடுமையாக விமர்சனம் செய்தமைக்காக இந்த தனிப்பட்ட தாக்குதலை பொது மேடையில் முன்வைத்தார் பெர்லுச்கோனி. இவர்கள் இருவருமே பின்னர் தங்கள் அத்துமீறிய வார்த்தைகளுக்காக மன்னிப்புக் கேட்டுக் கொண்டாலும் பத்திரிக்கைகள் இதனை சும்மா விட்டு விடவில்லை. மனித உறிமை மீறல், தனிப்பட்ட தாக்குதல், அடிமை மனப்பான்மை என வர்ணித்து பெர்லுச்கோனியை இன்றளவும் புகழ்பாடிக் கொண்டே தான் இருக்கின்றன.

அதற்குப் பிறகு, இத்தாலிக்குச் செல்லும் ஜெர்மானிய சுற்றுப் பயணிகளை விமர்சித்தும் ஒரு பேச்சு வளர அதைக் கண்டு ஜெர்மானிய அதிபர் தனது இத்தாலிய உல்லாசப்பயணத்தை ரத்து செய்ததும் மற்றொரு கதை. (எனது முந்தை செப்டம்பர் மாத பதிவுகளில் இதனைக் காணலாம்.)

பெர்லுச்கோனி, அவரது தலைமைத்துவத்துவத்தின் போது எந்த புதிய முயற்சியையும் செய்யவில்லை என்பது மற்ற அங்கத்துவ நாடுகளின் தலைவர்களின் பேச்சாகி போயிருக்கின்ற இந்த காலகட்டத்திலும், தான் மிக அதிகமாகவே சாதித்து விட்டதாக பெருமை பேசிக்
கொண்டிருக்கின்றார் பெர்லுச்கோனி. அடுத்த தலைவர் எந்த அளவிற்கு ஐரோப்பிய ஒன்றியத்தின் பெருமையை வளர்க்கப்போகின்றார் என்பதை பொறுத்திருந்து தான் பார்க்க முடியும்.

Children under poverty

2003-12-30T12:13:00.000-08:00

ஜெர்மனியின் வறுமை நிலை நிர்மாணிப்பு சங்கம் வெளியிட்டிருக்கும் இவ்வாண்டிற்கான அறிக்கையின் படி இந்த நாட்டில் வறுமையில் வாழும் குழந்தைகளின் எண்ணிக்கை வருகின்ற இரண்டு ஆண்டுகளில் 1.5 மில்லியனாக உயரும் எனத்தெரிகின்றது. தலைநகரமான பெர்லினில் மட்டும் 100,000 குழந்தைகள் வறுமை நிலையிலேயே வாழ்கின்றனர் என்கின்றது இந்த அறிக்கை.

ஜெர்மனியைப் பொறுத்தவரை வறுமை நிலை எனப்படுவது யார் ஒருவர் சராசரி வறுமானத்திற்கு 50 விழுக்காடு குறைவாக வாழ்கின்றார்களோ அவர்களையே குறிக்கும். இந்த கணக்கெடுப்பின் படி, single parent என்று சொல்லப்படும் தாய் அல்லது தந்தை ஒருவரோடு வாழும் குழந்தைகள் தான் இந்த எண்ணிக்கையில் ஒரு பாதியினர். மற்ற ஒரு பாதி 4 குழந்தைகளுக்கும் மேம்பட்ட குழந்தைகளை வைத்திருக்கும் பெற்றோர்களின் குழந்தைகள்.

ஜெர்மனியில் இப்போது நிலவி வரும் வேலையில்லா பிரச்சனை இந்த நிலைக்கு ஒரு காரணமாக இருந்தாலும், பெருகி வரும் இளம் வயது தாய்மார்களின் எண்ணிக்கையும், திருமணம் செய்து கொள்ளாமல் தனியாகவே குழந்தை பெற்று வளர்க்கும் பெண்களின் எண்ணிக்கையின் வளர்ச்சியுமே இந்த நிலைக்கு காரணம் என்று தாராளமாகச் சொல்ல முடியும். கல்லூரிப் படிப்பை எட்டுவதற்கு முன்னரே குழந்தை பெற்றுக் கொள்ளும் பெண்கள் இங்கு இருக்கவே செய்கின்றனர்.

குழந்தைகள் பராமரிப்பு என்பது ஜெர்மனியைப் பொறுத்தவரை மிகவும் பொருளாதார ரீதியாக சிரமமான ஒன்றே. இங்கு பிறக்கின்ற ஒவ்வொரு குழந்தைக்கும் அரசாங்கம் மாதச் செலவிற்கு ஒரு குறிப்பிட்ட தொகையைச் செலவுத் தொகையாக ஒவ்வொரு பெற்றோருக்கும் வழங்குகின்றது.

அப்பா அம்மா இருவருமே இருந்தாலும் சரி, அப்பா இல்லாமல் அம்மா மட்டுமே பராமரிக்கும் குழந்தையாக இருந்தாலும் சரி இந்தத் தொகை வழங்கப்படுகின்றது. ஆனாலும் குழந்தையைப் பார்த்துக் கொள்வது, குழந்தைக்களுக்கான உணவுப்பொருட்கள், விளையாட்டுப் பொருட்கள் ஆகிய அன்றாட செலவுகளை சமாளிப்பதற்கு இந்தத் தொகை நிச்சயமாகப் போதாது. அதோடு குழந்தைக்கான மருத்துவ இன்சூரன்ஸ் வேறு இருக்கின்றது.

குழந்தை பெற்ற பெண்கள் உடனே வேலைக்குச் செல்ல முடிவதுமில்லை. குழந்தையைப் பார்த்துக் கொள்வதற்கு இங்கு பாட்டி தாத்தா என்று பெரிய குடும்பங்களும் இருப்பதில்லை. ஒவ்வொருவரும் அவரவர் தனிப்பட்ட வாழ்க்கையைப் பார்த்துக் கொள்வதையே விரும்புவதால் குழந்தை பெற்ற
பெண்கள் வீட்டில் இருந்து தங்கள் குழந்தை வளரும் வரை பார்த்துக் கொள்வது அவசியமாகின்றது. அல்லது முழு நேர வேலையை அரை நாள் வேலையாக மாற்றிக் கொண்டு வேலையைத் தொடர வேண்டியிருக்கின்றது.

கடந்த ஆண்டுகளில் தனியாக குழந்தையைப் பார்த்துக் கொள்ளும் தாய்மார்களுக்கு சலுகைகள் கிடைத்து வந்தன. சென்ற ஆண்டு முதல் இந்த சலுகைகளும் நிறுத்தப்பட்டன. இப்போது வருகின்ற ஆண்டுகளில் மேலும் பல சலுகைகள் குறைக்கப்படவிருப்பதால் தனியாக குழந்தைகளை வளர்க்கும் தாய்மார்களுக்கு பிரச்சனைகள் அதிகரிக்கப் போவது தவிர்க்கப்பட முடியாத ஒன்றுதான்.

Dowry - a growing social phenomenon

2003-12-22T12:12:00.000-08:00

சில நாட்களுக்கு முன்னர் போப்லிங்கன் நகரில் வசிக்கும் இலங்கைத் தமிழ் நண்பர் ஒருவரின் இல்லத்திற்குச் சென்றிருந்தேன். பல பொது விஷயங்களைப் பற்றி பேசிக் கொண்டிருந்தோம். எங்கள் பேச்சு ஐரோப்பாவில் வாழ்கின்ற இலங்கைத் தமிழர்களிடையே இருந்து வரும் திருமண வரதட்சணைப் பற்றியும் ஆரம்பித்தது.

நான் 1996-ல் 2 வார காலம் இலங்கைப் பயணம் சென்றிருந்த போது, அங்கு உள்நாட்டிலிருந்து வெளியாகும் தினசரிப் பத்திரிக்கையைப் படிக்கும்போது வரன் தேடுவோரின் பட்டியல் மற்றும் அவர்களின் எதிர்பார்ப்புகள் போன்றவற்றைப் பற்றி வெளிவந்திருந்த விளம்பரங்களைப் பார்த்ததைப் பற்றி அவர்களிடம் விவரித்தேன். ஒரு மருத்துவராக வேலை செய்யும் பெண்ணுக்கு மாப்பிள்ளைத் தேடும் பெற்றோர் பெண்ணோடு சேர்த்து லட்சக் கணக்கில் வரதட்சணை மற்றும் ஒரு முழு வீடு போன்றவற்றையும் சேர்த்துத் தருவதாக குறிப்பிட்டிருந்தது என் ஞாபகத்தில் இன்றும் மறையாமல் இருந்தது. அதைப் பற்றி சொல்லிக் கொண்டிருக்கும் போது ஐரோப்பாவிற்கு வந்த பின்னர் வரடதட்சணை என்பது எந்த அளவிற்கு மேலும் வளர்ந்திருக்கின்றது என்று நண்பர்கள் சொன்னதைக் கேட்ட போது அதிர்ச்சியாக இருந்தது.

சில மாதங்களுக்கு முன்னர் ஜெர்மனியில் வசிக்கும் ஒரு பெண்ணிற்கு லண்டனில் இருக்கும் மாப்பிள்ளைக்கும் திருமணம் நடத்தியிருக்கின்றார்கள். அதற்கு பெண் வீட்டர் சார்பாக 100 பவுன் நகை மற்றும் ஏறக்குறைய 1 லட்சம் இங்கிலாந்து பவுனும் (ரொக்கம்) கொடுத்திருக்கின்றார்கள். பெண் ஒரு புத்தகக் கடையில் விற்பனையாளராக வேலை செய்கின்றாள். மாப்பிள்ளை லண்டனில் ஒரு கடையில் வேலை செய்கின்றார். என்ன நடந்ததோ தெரியவில்லை. திருமணம் நடந்து ஒரு மாதம் முடிவதற்குள் அந்தப் பெண் சேர்ந்திருக்கப் பிடிக்காமல் ஜெர்மனிக்குப் பிடிவாதமாகத் திரும்பிவிட்டாள். முதலில் பெற்றோர்கள் இதற்குச் சம்மதிக்கவில்லையாம். பின்னர் வேறு வழிய்ல்லாமல் பெண்ணை திரும்ப அழைத்துக் கொண்டார்களாம்.

இவ்வளவு வரதட்சனை கொடுத்தும் கூட நிம்மதியற்ற திருமணமாகவே இது முடிந்திருக்கின்றது. இதைபோல பல கதைகள் இங்கே நடந்து கொண்டுதான் இருக்கின்றன. கல்வியும் வாழ்க்கை தரமும் உயர்ந்து வரும் போது மனித நேயமும் பண்பும் வளர வேண்டும் என நாம் எதிர்ப்பார்ப்பது இயற்கை. ஆனால் இங்கு நிலைமை சற்று வித்தியாசமாகவே மாறிக்கொண்டிருக்கின்றது. அதிகமாக பணம் சம்பாதிக்கும் வாய்ப்பு அமைகின்ற போது 'அதிகமாக எங்களால் வரதட்சனை கொடுக்க முடியும்' என்று பெண்ணைப் பெற்றவர்கள் நினைப்பதும், 'ஐரோப்பாவில் தானே பெண் இருக்கின்றாள். அதிகமாகவே வரதட்சணை கொடுக்கட்டுமே' என்று மாப்பிள்ளை வீட்டாரும் நினைக்கும் மனப்போக்கு வளர்ந்து கொண்டு வருகின்றது. இங்கேயே வளர்ந்து படித்து வரும் தமிழ் இளைஞர்கள் இதைப் பற்றி சிந்திக்க ஆரம்பித்து விட்டார்கள் என்பதை மறுக்க முடியாது. சில மாதங்களுக்கு முன்னர் நான் பேசிக்கொண்டிந்த 16 வயது தமிழ் பெண் ஒருத்தி இந்த மனப்போக்கை பற்றி தனது பெற்றோர் முன்னிலையிலேயே குறை கூறி பேசிய போது அவளுடைய சிந்தனை வளர்ச்சியைப் பார்த்து மகிழ்ந்தேன். இளம் தலைமுறையினர் தாம் நமது சமுதாயத்தில் மேலும் படர்ந்துள்ள விலங்குகளைப் போக்க முடியும் என்பதை இந்தப் பெண் போன்றவர்களைப் பார்க்கும் போது உணர்ந்து சந்தோஷப்பட முடிகின்றது.

Cologne

2003-12-09T12:09:00.000-08:00

கெல்ன் ஜெர்மனியின் பழம் பெரும் நகரங்களில் ஒன்று. ஜெர்மனியின் மத்திய பகுதியில் இருக்கும் இந்த நகரம் ஜெர்மனியின் மிக அழகிய நகரங்களில் ஒன்று என்றும் தாராளமாகச் சொல்லலாம். Cologne என்னும் இந்தப் பெயர் ரோமானியப் பேரரசர் Claudius -ஸின் மனைவியின் ஞாபகமாக வைக்கப்பட்டது. இவரது காலம் 50 A.D. கெல்ன் நகரின் எல்லா இடங்களிலும் ரோமானியர்களின் ஆட்சியை ஞாபகப்படுத்தும் வகையில் பல நினைவுச் சின்னங்களைப் பார்க்க முடியும்.

கெல்ன் நகருக்குச் சிறப்பினைத் தருவது கெல்ன் டோம் தான். மிகப் பிரமாண்டமான இந்த தேவாலயத்தின் கலை அழகை சொல்வதற்கு வார்த்தைகள் கிடையாது. கடந்த முறை நான் அங்கு சென்றிருந்த போது தேவாலயத்தின் ஒரு பகுதி திருத்தி அமைக்கப்பட்டுக் கொண்டிருந்ததது. தேவாலயத்தைச் சுற்றிப் பார்த்து விட்டு சில நிமிடங்கள் தியானம் செய்து விட்டு வெளியே நடந்தது மறக்கமுடியாத இனிமையான நினைவுகள். சாலையில் நடந்து வந்து கொண்டிருக்கும் போது, சர்வ சாதாரணமாக ஒரு இளைஞன் ஓடி வந்து 1 EUR தரமுடியுமா என் என்னைத் தடுத்து நிறுத்திக் கேட்டான். நான்றாக உடை அணிந்திருந்த அவனுக்கு ஏறக்குறைய 25 வயதிருக்கும். "பியர் வாங்க வேண்டும்; பணம் தருகிறாயா" என கொஞ்சமும் தயக்கம் இல்லாமல் அவன் என்னைக் கேட்டது உண்மையிலேயே திகைக்க வைத்தது.

இந்த நகருக்கு ரோமானியர்கள் தான் கிருஸ்துவ மதத்தை கொண்டுவந்தனர். அவர்களது தாக்கத்தால் தான் இங்கு பல தேவாலயங்கள் கட்டப்பட்டன. 12ம் நூற்றாண்டிலிருந்து கெல்ன் நகரத்திற்கு Sancta (புனித நகரம்) எனும் தகுதி வழங்கப்பட்டது. உலகிலேயே 4 நகரங்களுக்குத்தான் இந்த சிறப்புண்டு; அவை ரோம், ஜெருஸலம், பைஸண்டியம் மற்றும் கெல்ன் ஆகியவையே.

கெல்ன் நகரத்தின் மற்றொரு சிறப்பு ரைன் நதி. ரைன் நதியை இரண்டு கரைகளிலும் இணைக்கும் பல பாலங்களை இங்கு காண முடியும். ரைன் நதியில் படகு சவாரி செய்வதும் இனிமையான ஒரு அனுபவம் தான். ஜெர்மனிக்கு வருபவர்கள் கண்டிப்பாக பார்த்து மகிழ வேண்டிய ஒரு நகரம் கெல்ன் என்றால் அது மிகையாகாது.

இதற்கெல்லாம் மேலாக தமிழர்களாகிய நமக்கு சந்தோஷத்தைத் தரும் மற்றொரு விஷயம் என்னவென்றால் இங்கு இருக்கும் கெல்ன் பல்கலைக்கழகத்தில் உள்ள தமிழ் துறை. உலகின் இரண்டாவது பெரிய தமிழ் நூல்களின் எண்ணிக்கையைக் கொண்ட தமிழ் துறையாக இது இருந்து வருகின்றது என்றால் ஆச்சரியம் தானே!

பெர்லின்

2003-12-07T12:08:00.000-08:00

ஜெர்மனியின் மிக முக்கிய நகரங்களில் பெர்லினும் ஒன்று. இந்நாட்டின் தலைநகரமாக இருப்பது மட்டுமன்றி கலாச்சார மையமாகவும் திகழ்வதுதான் பெர்லின் நகரின் தனிச்சிறப்பு என்று சொல்ல வேண்டும்.

முன்னர் கிழக்கு-மேற்கு பெர்லின் என இரண்டாகப் பிரிக்கப்பட்டிருந்த பெர்லின் இப்போது ஒரு தனி நகரமாக இருந்து வருகின்றது. பெர்லின் சாலைகளில் நடக்கும் போது மற்ற நகரங்களில் இல்லாத அளவிற்கு பல இன மக்களை சர்வ சாதாரணமாக இங்கு காணமுடியும் என்பது முற்றிலும் உண்மை. கிழக்கு ஐரோப்பிய நாடுகளுக்கு ஜெர்மனியின் வாசலாக இருப்பது பெர்லின் தான். பல நாடுகளிலிருந்து அகதிகளாக ஜெர்மனிக்குள் நுழைபவர்கள் பெர்லினைத்தான் மையமாக தேர்ந்தெடுக்கின்றனர் என்பது அதிகாரப்பூர்வமாகக் காவல்துறை வெளியிட்டிருக்கும் ஒரு செய்தி.

ஸ்டுட்கார்ட் நகரில் எனது அலுவலகத்தில் என்னோடு வேலை செய்து கொண்டிருந்த எனது இனிய நண்பன் ஸ்வென், ஸ்டுட்கார்ட் நகரின் அவசர வாழ்க்கை பிடிக்காமல் வேலையை உதறி விட்டு வாழ்க்கையை இனிமையாக கழிக்க வேண்டும் என முடிவெடுத்து பெர்லினுக்குச் சென்று விட்டான். பெர்லின் சாலைகளில் இருக்கும் தெருவோரக் கடைகளில் இயற்கையயும் வாழ்க்கையையும் ரசித்துக் கொண்டு பியர் சாப்பிட்டு வாழ்க்கையை சுகமாகக் கழிப்பதாக (நிரந்தர வேலையில்லாவிட்டாலும்) அவ்வப்போது அவன் எனக்கு தகவல் அனுப்புவதுண்டு.

ஜெர்மனி முழுக்க இருக்கும் மக்கள் தொகையில் பெர்லினில் தான் மிக அதிகமானோர் வேலையில்லாமல் இருப்பதாக கணக்கெடுப்புக்கள் கூறுகின்றன. அதில் இன்னொரு அதிர்ச்சி தரும் செய்தி என்னவென்றால் ஜெர்மனியின் இந்த புகழ் பெற்ற நகரம் இப்போது மாநிலத்தின் (பெர்லின்) செலவுகளை எதிர் கொள்ள முடியாமல் திண்டாடுகின்றது என்ற செய்திதான். பெர்லினிலுள்ள ஒரு புகழ் பெற்ற தொல்பொருட்காட்சி நிலையம் அதற்கான பாதுகாப்புச் செலவுகளைப் பெற முடியாததால் இப்போது மூடப்பட்டுள்ளது. சில மாதங்களுக்கு முன்னர் இந்த மாநிலத்தின் முதல்வர் மத்திய அரசாங்கம் தங்கள் மாநிலத்திற்கு நிதி உதவி செய்ய வேண்டும் என்று அறை கூவல் விடுத்திருந்தார். இதுதான் இன்றைய பெர்லினின் நிலமை.

ஜெர்மனி பொருளாதார மறு சீரமைப்பு செய்வதில் மிகத்தீவிரமாக இறங்கியுள்ளது. இதன் பலனாக இப்போது பல புதிய தொழில் வாய்ப்புக்கள் மலர ஆரம்பித்து சில நடுத்தர வகை நிறுவனங்கள் இலாபம் ஈட்ட ஆரம்பித்திருப்பதாக நேற்றைய வர்த்தக செய்தியில் கேள்விப்பட்டேன். பல மாதங்களுக்குப் பிறகு கிடைத்திருக்கும் ஒரு நல்ல செய்தி. இந்த நிலை தொடரவேண்டும்!

Job Bank!

2003-12-02T12:07:00.000-08:00

நேற்று, டிசம்பர் 1 அன்று அதிகாரப்பூர்வமாக ஜெர்மனியின் வேலையில்லாதவர்கள் தங்களின் பெயர்களைப் பதிவு செய்து கொள்வதற்கும், தங்கள் இல்லத்திலிருந்தவாறே உள்நாட்டில் வேலை தேடுவதற்குமாக பிரத்தியேகமாக வலைப்பக்கம் ஒன்றினை ஜெர்மனி அரசாங்கம் ஆரம்பித்து வைத்தது. உள்நாட்டில் உள்ள 3 மில்லியன் வேலை தேடும் மக்களுக்குப் பலனளிக்கும் வகையில் இந்த ஏற்பாடு செய்யப்பட்டுள்ளது. ஏகப்பட்ட கெடுபிடிகள்; பிரச்சனைகள்; ஏற்பாட்டு நடவடிக்கைகள்; இதனை நேரடியாக கண்டும் உணர்ந்தும் அனுபவித்துக் கொண்டிருக்கும் எனக்கும் எந்த வகையில் தொடர்ந்து இந்த வலைப்பக்கம் செயல்படப்போகின்றது என்பதில் ஒரு ஆர்வம் இருக்கின்றது. சில தனியார்
நிறுவனங்களோடு சேர்ந்து எங்கள் நிறுவனமும் இதில் கணிசமான சேவையை நேரடியாக வழங்குவதால் தான் எனக்கும் கொஞ்சம் கூடுதல் ஆர்வம்.

பலமுறை பல்வேறு வகையான சோதனைகளைக் கணினிகளுக்கு வழங்கி சோதித்துப் பார்த்து விட்ட பிறகும் முதல் நாளன்றே ஏகப்பட்ட பிரச்சனைகள் பிறக்கத் தொடங்கி விட்டன. வேலையில்லாதவர்களுக்குப் பல நாள் காத்திருந்த ஆர்வம். வலைப்பக்கம் வந்து விட்டது என்று உள்நாட்டு செய்தி நிறுவனங்கள், பத்திரிக்கைகள் அனைத்தும் செய்திகளை வாரி வழங்கிக் கொண்டிருக்கும் போது பொது மக்கள் இந்த வலைப்பக்கத்திற்குச் செல்லாமல் இருப்பார்களா? எத்தனை நாட்கள் இந்த வசதிக்காக காத்திருந்திருப்பார்கள்?

முன்பெல்லாம் வேலை தேடுபவர்கள் ஒரு குறிப்பிட்ட நிலையத்திற்குச் சென்று அங்கு தங்கள் பெயர்களைப் பதிந்து கொண்டு அதன் பின்னர் அங்கேயே பிரத்தியேகமாக அமைக்கப்பட்டிருக்கும் ஒரு சில கணினிகளைக் கொண்டு தகவல் வங்கியில் வேலைகளைத் தேடுவர். இதற்கென்று தனியாக நேரமும் கொடுக்கப்பட்டிருக்கும். ஆனால் ஜெர்மனியில் வேலை தேடுபவர்களுக்கு இனிமேல் இந்த தொல்லையே இல்லை. உலகின் எந்த பகுதியில் இருந்தாலும் ஜெர்மனியில் வேலை தேடுவதற்கான வசதி இப்போது உருவாக்கப்பட்டு விட்டது.

மாலையாவதற்குள் வலைப்பக்கத்திற்கு சேவை வழங்கும் web server அதிகமான பயனீட்டைத் தாங்க முடியாமல் திக்கித் திணர ஆரம்பித்து விட்டது. மில்லியன் கணக்கில் மக்கள் வலைப்பக்கத்திற்குள் சென்று தங்கள் பெயரை பதிய முயலும் போது பாவம் அந்தக் கணினி; அதனால் என்ன செய்ய முடியும். இதைப் பலரும் சத்தியமாக எதிர்பார்க்க வில்லை. ஆனாலும் அதிவேக கணினி; பல புதிய தொழில் நுட்பங்களை தன்னுள்ளே கொண்ட கணினி. ஓரளவு சமாளிக்கவே செய்தது. அலுவலகத்தில் இன்று இது தான் எங்களுக்குப் பேச்சாகிப் போனது. எதிர்பார்த்ததை விட ஒரே நாளில் தகவல் வங்கி மிக மிக மிக பெரிதாக வளர்ந்து விட்டது ஒரே நாளில்.

ஜெர்மனியில் வேலையில்லா நிலை நாளுக்கு நாள் மோசமாகிக் கொண்டே தான் வருகின்றது. இந்த இணையத் தொடர்பினை வழங்கும் கணினி சேவை எந்த அளவிற்கு இந்த நிலையை எதிர்கொள்ள முடியும் என்பதை காலம் தான் சொல்ல முடியும்.!

Job discrimination!

2003-11-27T12:04:00.000-08:00

மக்களை தொழில் அடிப்படையில் வேறுபடுத்தி சிலரை தாழ்வாக மதிப்பிடுவதும் சிலரை உயர்ந்து மதிப்பிடுவதும் நமது ஆசிய நடைமுறையில் வழக்கமாகிப் போய்விட்ட ஒன்று. வீட்டில் வேலை செய்யும் பெண்ணையோ, கார் ஓட்டும் டிரைவரையோ சமமாக நாற்காலியில் உட்கார வைத்து பேசக்கூடத் தெரியாத மனிதாபிமானமற்ற சமுதாயமாக நமது சமுதாயம் இருக்கின்றது. யாராவது ஒருவரை தாழ்மைப் படுத்தியும், வேலை வாங்கியும் மகிழ்ச்சி அடையும் பழக்கம் நம் ஆசிய பண்பாட்டில் ஊறிப் போய்விட்டது.

ஜெர்மனியில் ஒரு நடுத்தர வர்க்கக் குடும்பமாக இருந்தாலும் சரி, வசதியான பணக்காரக் குடும்பமாக இருந்தாலும் சரி, வீட்டின் அனைத்து காரியத்தையுமே வீட்டில் உள்ளவர்கள் தான் செய்ய வேண்டும். வீட்டிற்குப் புதிதாகக் குடிபோகும் போது நாமே சுயமாக வீட்டிற்கு வர்ணம் பூச வேண்டும். தரைக்கு நாமே சுயமாக கம்பளம் ஒட்ட வேண்டும். அது தவிர மின்சாரக் கோளாறாக இருந்தாலும் தொலைபேசி கோளாறாக இருந்தாலும் சரி, அனைத்தையுமே நாமே சுயமாகச் செய்ய வேண்டும்.

இதையெல்லாம் செய்வதற்கே ஆள் இல்லையா எனக்கேட்கலாம். ஆட்கள் இருக்கின்றார்கள். ஆனால் இம்மாதிரியான உடல் உழைப்பு வேலைகளுக்குக் கொடுக்கப்படும் சம்பளம் என்பது மிக மிக அதிகம். உதாரணத்திற்கு, வீட்டிற்கு வர்ணம் பூசும் ஒருவருக்கு ஒரு பொறியியளாளருக்குக் கிடைக்கும் சம்பளத்தை விடவும் அதிகமான சம்பளம் கிடைக்கும். ஒரு டெக்னீஷியன் மெர்ஸ்டிஸ் பென்ஸ் கார் வாங்கும் அளவிற்கு சம்பாதிக்கும் நிலை இங்கு உள்ளது. இது நம்பமுடியாத கதையல்ல; உண்மை.

எல்லாவிதமான தொழிலுமே, மதிக்கத்தக்க ஒன்றுதான் என்ற நிலை இங்கு அன்றாட வாழ்க்கையில் கடைபிடிக்கப்படுகின்ற ஒன்று என்பது முற்றிலும் உண்மை. சமையலறையில் வேலை செய்யும் ஒரு பெண் அனைத்து சுதந்திரங்களோடும் பாகுபாடின்றியும் ஒரு பொறியியளாளரோடு ஒரு விருந்தில் கலந்து கொள்ள முடியும். தொழில் அடிப்படையில் பிரித்து வைத்து கௌரவக் குரைச்சலாக எடைபோடுவது இல்லை. மனிதனை மனிதனாக மட்டுமே பார்க்கும் எண்ணம் என்பது மிக முக்கியமான அம்சம். நமது ஆசிய வாழ்க்கை முறையில் இது இன்றளவும் ஏட்டிலே தான் இருக்கின்றதே தவிர நடைமுறைப்படுத்தப்படவேயில்லை என்பதுதான் கசப்பான உண்மை.

Privacy

2003-11-23T12:03:00.000-08:00

கூட்டுக் குடும்பம் தேவையா; தனிக்குடித்தனம் தேவையா என்ற பட்டி மன்ற ஆராய்ச்சிகள் இன்னமும் நமது சமுதாயத்தில் ஒரு கேள்வியாகவே இருந்து கொண்டிருக்கின்ற இந்த காலகட்டத்தில் இந்த மாதிரியான கேள்விக்கு இடமே இல்லாத ஜெர்மானியர்களின் வாழ்க்கை முறையைப் பற்றி உங்களிடம் பகிர்ந்து கொள்வது அவசியம் என நினைக்கின்றேன்.

ஏறக்குறைய 19 அல்லது 20 வயது அடையும் ஜெர்மானிய இளைஞர்கள் திருமணம் என்ற ஒரு நிலை வருவதற்கு முன்னரே தனிக்குடித்தனம் செல்ல ஆரம்பித்து விடுகின்றனர். ஜெர்மனியில் பல இடங்களில் 1 அறை கொண்ட அடுக்கு மாடி வீடுகள் அதிகமாகவே இருக்கின்றன. இங்கு வந்த புதிதில் இது எனக்கு ஒரு கேள்வியாகவே இருந்தது. (மலேசியாவில் 2 அறைக்கும் மேம்பட்ட வீடுகள் தான் கட்டப்படும்) பிறகு தான் தெரிந்து கொண்டேன் இந்த கேள்விக்கான பதிலை!

பல்கலைக் கழகத்திற்குச் செல்லும் போதே குழந்தைகள் பெற்றோர்களை விட்டுப் பிரிந்து தனியாக வீடு தேடிக்கொண்டு சென்று விடுகின்றனர். தனிப்பட்ட சுதந்திரம் என்பது மிக அவசியம் என்பதை அவர்கள் கட்டாயமாகக் கடைபிடிக்கின்றனர். குழந்தைகள் தங்களை விட்டுப்பிரிந்து தனியாக வீடுபார்த்துக் கொண்டு செல்வதைப் பற்றி பெற்றோர்கள் எந்தக் கவலையும் கொள்வதில்லை. மாறாக அதனை விரும்பி வரவேற்கின்றனர். இது சர்வ சாதாரணமாக ஏற்றுக் கொள்ளப்பட்ட ஒரு வாழ்க்கை முறையாகிவிட்டது. படிக்கின்ற காலம் தொட்டே ஒருவர் தனது சுய தேவைகளைத் தானே பூர்த்தி செய்து கொள்ளும் அளவிற்கு பக்குவப்படுவது தேவை என இவர்கள் நினைக்கின்றனர். இதை நினைத்து எந்த பெற்றோரும் பச்சாதாபப்படுவதில்லை; வருத்தப்படுவதுமில்லை. குழந்தைகளின் தனிப்பட்ட வளர்ச்சியைக் கண்டு சந்தோஷப்படுபவர்களாகவே பெற்றோர்கள் இருக்கின்றனர்.

ஜெர்மானியர்களைப் பொறுத்த வரையில் ஒரு 25 வயது இளைஞனோ அல்லது யுவதியோ இன்னமும் பெற்றோர்களோடு ஒரே வீட்டில் தங்கியிருக்கின்றார்கள் என்றால் அது ஒரு வகையில் அவமானமாகவே கருதப்படுகின்றது. அப்படிக் கேள்விப்பட நேர்ந்தால் அதனை ஒரு ஹாஸ்யமாக்கி சொல்லிச் சொல்லிச் சிரிப்பார்கள்.

தனியாக இருக்கும் போதே இவர்கள் தனிக்குடித்தனம் போய்விடுகின்ற நிலையில் எங்கே மனைவி வந்துதான் தனிக்குடித்தனம் அமைக்க வேண்டும் என்ற நிலை வரப்போகின்றது???

பார்வை

2003-11-21T12:02:00.000-08:00

ஆசியர்களுக்கும் ஜெர்மானியர்களுக்கும் நிறைய வேற்றுமைகள் இருக்கின்றன. பொதுவாக வெள்ளையர்களைப் பற்றிய தவறான பல கருத்துக்கள் நமது மனங்களில் ஊறிப் போய் இருக்கின்றது. இவர்களோடு பழகும் போதுதான் அவர்களும் கலாச்சாரத்திலும் பண்பாட்டிலும் நம்மைப் போல பல வகையில் உயர்ந்தவர்களே என்பதைத் தெரிந்து கொள்ள முடிகின்றது.

அபிப்ராயங்கள் என்பது யாராவது ஒருவர் சொல்லக் கேட்டோ அல்லது ஏற்கனவே இருக்கின்ற கருத்தினை அடிப்படையாகக் கொண்டோ வருவது எனும் போது அதில் நூற்றுக்கு நூறு உண்மை இருப்பதில்லை. உதாரணத்திற்கு ஒன்று சொல்கிறேன். நான் ஜெர்மனி வருவதற்கு முன்னர், லண்டனில் சில ஆண்டுகள் தங்கியிருந்து திரும்பிய நண்பர் ஒருவர், "வெள்ளையர்களுக்குத் தேவாலயங்களுக்குச் சென்று வழிபடுவதில் ஆர்வம் இல்லை. இப்போதெல்லாம் தேவாலயங்கள் மற்ற மதத்தினரால் வாங்கப்பட்டு அவை வேறு சமயத்தினரின் வழிபடு இடமாக மாறி இருக்கின்றது" என்று கூறினார். அந்தக் கருத்து மனதில் பல நாட்கள் எனக்கு இருந்தது. ஜெர்மனி வந்து இங்குள்ள மக்கள் எந்த அளவுக்கு கிறிஸ்தவ மதத்தில் ஈடுபாடு கொண்டுள்ளனர் என்பதை நேராகப் பார்க்கும் போதுதான் அந்தக் கூற்றில் இருக்கும் பிழை தெரிய வந்தது. லண்டனுக்கு அந்தக் செய்தி உண்மையானதாக இருக்கலாம்; ஆனால் ஜெர்மனியைப் பொறுத்தவரையில் இதில் உண்மை இல்லை.

ஆக ஒரு செய்தியைக் கேட்கும் போது அதனை எல்லோருக்கும் பொதுவாக பயன்படுத்தி விட முடியாது. ஜெர்மனி முழுதுமே ஜெர்மன் மொழியைத் தான் பேசுகின்றனர். ஆனாலும் பகுதிக்குப் பகுதி மொழியில் வித்தியாசங்கள் இருக்கின்றன. உதாரணத்திற்கு ஜெர்மனியின் வடக்குப் பகுதியில் 'ஹோஹ் டோ ய்ச்' பேசுகின்றனர். பவேரியா பகுதிக்கு வந்தால் பவேரிய கலவையாக ஜெர்மன் மொழி வருகின்றது. ஷ்வாபியன் பகுதி, அதாவது நான் இருக்கும் பகுதியில் ஷ்வேபியன் ஜெர்மன் பேசுகின்றனர்; தமிழகத்தில், கொங்கு தமிழ், ஐயங்கார் தமிழ், செட்டி நாட்டுத் தமிழ் என்று இருப்பது போல. ஆக நாட்டிற்குள்ளேயே பேசப்படும் ஒரு மொழியிலேயே இம்மாதிரியான வேறுபாடுகள் இருக்கும் போது ஒரு கருத்தை பொதுக் கருத்தாக வைக்க முடியுமா?

ஜெர்மானியர்களோடு பழகும் நல்ல வாய்ப்பு எனக்கு அமைந்திருப்பதால் அவர்களின் வாழ்க்கை முறையைப் பற்றி அதிகமாகவே தெரிந்து கொள்ள முடிகின்றது. அந்த வேறுபாடுகளை உங்களோடு பகிர்ந்து கொள்ளத்தான் வேண்டும் என நினைக்கின்றேன். அவற்றை ஒவ்வொன்றாக அடுத்தடுத்த குறிப்புக்களில் உங்களோடு பகிர்ந்து கொள்வேன்.

Potato

2003-11-20T11:56:00.000-08:00

போப்லிங்கன் நகரத்தின் அழகை மேம்படுத்துவதில் காய்கறித் தோட்டங்களையும் சேர்த்துக் கொள்ள வேண்டும். இந்தக் குளிர் காலத்திலும் உருளைக் கிழங்குகள் பயிரடிப்பட்டு வருகின்றன. குளிர்காலத்திலும் உருளைக் கிழங்குச் செடிகள் அழகழகாய் வளர்ந்திருப்பது கண்ணுக்கு அதிக குளிர்ச்சி.

ஜெர்மானியர்களின் உணவுகளில் மிக முக்கிய பங்கு வகிப்பது உருளைகிழங்கு. உருளைக் கிழங்குகளை அடிப்படையாக வைத்தே முக்கியமான உணவு வகைகள் தயாரிக்கப்படுகின்றன. முழு உருளைக் கிழங்குகளை அவித்து அதனைக் கொஞ்சம் நெய்விட்டு வருத்து சாப்பிடுவது இவர்களுக்கு மிக மிகப் பிடித்தமான ஒன்று. அவித்த உருளைக்கிழங்கைப் பிசைந்து மாவாக்கி அதில் நெய்யும் பாலும் விட்டு கலந்து அதனை மற்ற உணவுகளோடு சேர்த்து சாப்பிடுவது இன்னொரு வகை. இப்படி பலவகைகளைச் சொல்லிக்கொண்டே போகலாம்.

சென்ற வருடத்தோடு ஒப்பிடுகையில் இந்த வருடம் விளைச்சலுக்கு உகந்த வருடமாகவே படுகின்றது. சென்ற வருடம் பெருத்த மழையினால் ஏற்பட்ட வெள்ளம் அதனால் ஏற்பட்ட சேதங்கள் ஆகியவை நாட்டின் மொத்த காய்கறி விளைச்சளையும் பேரளவுக்குப் பாதித்திருந்தன. ஆனால் இந்த வருடம் இந்த சிரமம் இல்லை. பார்க்கின்ற இடமெல்லாம் இந்த ~5 டிகிரி (பகலில்) குளிரிலும் உருளைக் கிழங்கு போன்ற காய்வகைகள் பயிடப்படுகின்றன என்பது ஒரு செய்திதானே.

நானும் உருளைக்கிழங்கு செடியை வளர்த்துப் பார்ப்போமே என குளிர்சாதனப்பெட்டியில் இருந்த முளைத்த இரண்டு உருளைக் கிழங்குகளைஒரு தொட்டியில் நட்டு வைத்துப் பார்த்தேன். செடி உயரமாக வளர்ந்து இலை நிறம் மாறும் போதுதான் உருளைக்கிழங்குகள் வளர்ந்திருக்கும் என நண்பர்கள் சொல்லியிருந்ததால், எப்போது இலையின் நிறம் மாறும் எனக் காத்திருந்தேன். மூன்று மாதங்களுக்குப் பிறகு ஓரளவு இலைகள் பெரிதாகி மஞ்சள் நிறம் தென்படவும் ஆர்வம் பொறுக்காமல் செடியைப் பிடிங்கிப் பார்த்தேன். குட்டி குட்டியாக வட்ட வடிவத்தில் ஐந்தாறு உருளைக் கிழங்குகள். நட்டு வைத்து வளர்த்ததில் பலன் கிடைக்காமல் இல்லை!

Tamil vs. English

2003-11-06T11:21:00.000-08:00

அலுவலகத்தில் நேற்று காலையில் நடந்த ஒரு சம்பவம். புதிதாக எங்கள் குழுவில் இளம் ஜெர்மானியப் பெண் ஒருத்தி வேலையில் சேர்ந்திருக்கின்றாள். காலையில் வந்ததும் அவளுடைய உதவியாளர் இல்லாததைக் கண்டதும் என்னிடம் சில தகவல்களைப் பெற்றுக் கொள்ளலாமே என்று என்னிடம் வந்து பேச்சுக் கொடுத்தாள்.

ஜெர்மானியர்களே 99.9% விழுக்காடு வேலை செய்யும் இந்த நிறுவனத்தில் நான் ஒரு ஆசியன் இருந்த போதும் எந்த தயக்கமுமுன்றி எனக்குப் புரியுமா புரியாதா என்ற சிறு கவலையுமின்றி மிகச் சகஜமாக ஜெர்மானிய மொழியிலேயே பேசிக் கொண்டிருந்தாள். இவள் மட்டும் இப்படியில்லை. நான் பார்க்கும் ஏறக்குறைய அனைத்து ஜெர்மானியர்களுமே வேறு இனத்தைவர்களைப் பார்த்தால் கூட தங்கள் மொழியில் தான் பேசுகின்றனர். ஜெர்மனிக்கு வந்து விட்டால் ஜெர்மானியர் அல்லாத பிறரும் ஜெர்மன் மொழியில் தான் பேசவேண்டும்; பேசுவார்கள் என அவர்கள் எதிர்பார்க்கின்ரனர். தங்களுக்கும் தங்கள் மொழியின் மேல் பற்று; அதே பற்றை மற்றவர்களும் கொண்டிருக்க வேண்டும் என்றும் நினைக்கின்றனர்; அதுவும் எந்த தயக்கமுமின்றி நினைக்கின்றனர்.

நம்மை நாமே குறைத்துச் சொல்வதாக நினைக்க வேண்டாம். இதே நிலையில் ஒரு தமிழரை வைத்துக் கொள்வோம். தமிழ் மொழிக்கு தமிழர்கள் கொடுக்கும் மரியாதையை நான் சொல்லித் தெரியவேண்டியதில்லை. பிற மொழியில் அதிலும் குறிப்பாக ஆங்கிலத்தில் பேசுவதுதான் நாகரிகம் என்ற மாயையில் தான் பெரும்பாலோர் இருக்கின்றனர்.

இரண்டு ஆண்டுகளுக்கு முன்னர் ஒரு நண்பரை சந்திக்க அவர் வீட்டிற்குச் சென்றிருந்தேன். தமிழகத்திலிருந்து ஜெர்மனிக்கு வந்து குடியேறிவிட்ட ஒரு குடும்பம். பேச்சு வாக்கில் குழந்தையின் பள்ளிக்கூடத்தில் நடந்த ஒரு விஷயத்தைப் பற்றிய பேச்சு வந்தது. தமிழ் குழந்தையாக இருப்பதால் பள்ளியில் குழந்தையின் தாய்மொழியைப் பற்றிய விபரத்தைக் கேட்டிருக்கின்றனர். ஜெர்மானிய மொழி தாய்மொழியில்லை அல்லவா? குறிப்பேட்டில் தமிழ் என்றுதானே எழுதப்படவேண்டும். ஆனால் அந்த தாயார் குழந்தையிடம் உனது தாய்மொழி ஆங்கிலம்; அதனால் ஆங்கிலம் என்றே எழுது என்றார்.

என்னை அதிர்ச்சிக்குள்ளாக்கியது இந்தச் செய்தி. தனது தாய்மொழியைப் பற்றி எழுதக் கூட கூச்சப்படும் சமுதாயத்தினர் நம்மிடையே இருக்கத்தான் செய்கிறது. தமிழ் எனது மொழி என்று சொல்லிக் கொள்வதில் மன வருத்தம் அடையும் கூட்டத்தினர் இவர்கள். ஆங்கிலம் தான் எங்கள் மொழி என்று சொல்லிக் கொள்ளும் இவர்களைப் போன்றவர்கள் தங்கள் முகத்தையும் நிறத்தையும் ஒரு முறைக்குப் பலமுறை கண்ணாடியில் பார்த்துக் கொள்ள வேண்டும் என்றே நினைக்கின்றேன். அதிலும் குறிப்பாக ஐரோப்பாவில் இருந்து கொண்டு தாய்மொழி பற்று வளரவில்லை என்றால் இம்மாதிரியானவர்கள் ஐரோப்பாவில் இருந்தும் நமது இனத்திற்கு மொழிக்கும் சற்றும் பயனில்லை.

Autumn

2003-11-04T11:19:00.000-08:00

நாளுக்கு நாள் குளிர் அதிகரித்துக் கொண்டிருக்கின்றது. இலையுதிர்காலம் முடிந்து குளிர்காலம் நெருங்கிக் கொண்டிருப்பதன் அறிகுறிகளைக் காணமுடிகின்றது.

இயற்கையின் சீரான ஓட்டத்தை இந்த நான்கு காலங்களான குளிர்காலம், வசந்த காலம், இலையுதிர்காலம், கோடைகாலம் இவை நான்கும் எந்த மாறுதலும் இன்றி ஒழுங்காக வந்து கொண்டிருப்பதைக் கொண்டே உணர முடிகின்றது.

இயற்கையின் அதிசயத்தில் இதுவும் ஒன்று தானே. மரங்களெல்லாம் தீப்பிடித்து எறிவது போன்ற தோரணையில் வர்ணங்களெல்லாம் மாறி மஞ்சளாகவும், இளஞ்சிவப்பாகவும், கருஞ்சிவப்பாகவும் மரங்களில் காட்சியளிக்கின்றன. இந்த இலைகளெல்லாம் மரங்களிலிருந்தும் கிளைகளிலிருந்தும் விழுவதற்கு ஏதுவாக ஏறக்குறைய தினமும் மழையும் பெய்கிறது. இன்னும் இரண்டு வாரங்களில் இலைகளில்லா மரங்களின் கிளைகள் மட்டும் தான் கண்களுக்குத் தென்படும்.

அடுத்த ஏப்ரல் வரை மரங்களின் பச்சை இலைக்காகக் காத்திருக்க வேண்டும். பகல் நேரமும் குறைந்து கொண்டே வருகின்றது. இப்போதெல்லாம் காலை 8 மணிக்குத்தான் பகலின் வெளிச்சத்தைப் பார்க்க முடிகின்றது மாலை 6 மணிக்கெல்லாம் மாலை இருள் சூழ்ந்து விடுகின்றது.

இன்னும் கொஞ்ச நாளில் 5 மணிக்கெல்லாம் இருள் வந்துவிடும். வெளிச்சத்தையே பார்க்க முடியாமல் அலுவலகத்திலேயே பொழுதைக் கழிக்கும் நாட்களில் ஒரு நாள் முடிந்தது என்ற பிரக்ஞையே இல்லாமல் போய்விடுகின்ற நிலையும் எனக்குச் சென்ற வருடங்களில் ஏற்பட்டதுண்டு. காலம் வேகமாக ஓடிக் கொண்டிருக்கின்றது. இயற்கையும் யாருக்காகவும் தனது நியதியிலிருந்து மாறாமல் தனது கடமைகளைச் செய்து கொண்டே இருக்கின்றது!

Vegetarian food

2003-11-02T11:17:00.000-08:00

விடுமுறைக்கு மலேசியா திரும்பும் போதெல்லாம் நண்பர்கள் சிலர் கேலியாக என்னிடம் கேட்பதுண்டு. அசைவமாக மாறிவிட்டாயா என்று. "ஜெர்மனியில் என்ன சைவ உணவு உனக்குக் கிடைக்கப்போகின்றது? உணவு ஒரு பெரிய பிரச்சனை தானே," என்று நினைத்து என்னை கேள்வி மேல் கேள்வியாக கேட்பர். நான் ஜெர்மனிக்கு வருவதற்கு முன்னரும் இதைப் பற்றி யோசித்திருக்கின்றேன். முழுதாக ஐரோப்பிய உணவு என்பது எப்படியிருக்கும் என்ற ஒரு சிந்தனை இல்லாமலேயே வந்து இறங்கி விட்டாலும், இங்கு வந்த நாளிலிருந்து எனக்கு உணவைப் பொருத்தவரை எந்த பிரச்சனையும் இருந்ததில்லை.

நாள் செல்லச் செல்லத்தான் ஜெர்மனியில் பலர் சைவமாக இருக்கின்றனர் என்ற விஷயத்தையே தெரிந்து கொண்டேன். சைவமாக இருப்பவர்கள் எல்லாம் இலங்கையிலிருந்து இங்கு வந்திருக்கும் சைவர்கள் அல்ல. மாறாக, இங்கேயே பிறந்து வளர்ந்து கொண்டிருக்கும் ஜெர்மானிய இளைஞர்கள் தான் என்பது தான் நான் தெரிந்து கொண்ட உண்மை. நான் பழகும் பல இலங்கைத் தமிழர்களில் பரம்பரை பரம்பரையாக இலங்கையில் சைவ சமயத்தையும் சைவ உணவு பழக்கத்தையும் கடைபிடித்து வந்தவர்கள் கூட இங்கு வந்த பின்னர் அசைவ உணவுக்காரர்களாக மாறி விட்டிருக்கின்றனர் என்பது தெரிய வந்தது. (எந்த உணவு வகை விருப்பமோ அதை அவரவர் தேர்ந்தெடுத்துக் கொள்வதில் தவறில்லை. ஒரு குறிப்புக்காகத் தான் இதனை எழுதுகிறேன்)

சைவ உணவு சாப்பிடும் ஜெர்மானியர்களில் சிலர் மிகக் கடுமையான சைவத்தைக் கடைபிடிக்கின்றனர். அவர்களில் vegan என்ற சைவ உணவு பழக்கம் உடையவர்கள் இறைச்சி மீன் இவற்றோடு பால் வகைகளையும் கூட தவிர்த்து விடுகின்றனர். இதனால், சீஸ், சாக்லெட் போன்றவற்றையும் கூட தவிர்க்கின்றனர். வெறும் காய்கறி, கிழங்கு தானிய வகைகளை பால் சேர்க்காமலேயே இவர்கள் சாப்பிடுகின்றனர்.

என்னைப் பொறுத்தவரை ஜெர்மனியில் சைவ உணவுக்காக நான் சிரமப்பட்டதே கிடையாது. எனது அலுவலகத்திலே இருக்கின்ற 3 உணவு விடுதிகளிலும் கட்டாயமாக ஒரு சைவ உணவு மெனு இருக்கும். வெறும் சாலட் மட்டுமல்ல; விதம் விதமான பாஸ்டா, ஆசிய உணவு வகை, பீஸா, விதம் விதமான உருளைக்கிழங்கு மெனு வகைகள் என சைவ உணவு மெனு தினமும் அசத்தும் வகையில் அமைந்திருக்கின்றது. (அதற்காக இட்லி, தோசை, வடை எல்லாம் கிடைக்குமா எனக் கேட்காதீர்கள் ) அதோடு எனது அலுவலகத்தில் வேலை செய்யும் நண்பர்களில் பலர் சைவ உணவுகளை விரும்பியே வாங்கிச் சாப்பிடுகின்றனர்.

சைவ உணவுப் பழக்கம் என்பது ஒரு மதமோ அல்லது ஜாதியோ சம்பந்தப்பட்ட விஷயமல்ல. அது ஒரு வகை உணவுப் பழக்கம். சைவ உணவினால் உடலுக்கு நண்மையே என்னும் கருத்து அறிவியல் பூர்வமாக நாளுக்கு நாள் உலக மக்களிடையே பரவி வருகின்றது. நல்லது என்று தெரியும் போது அதனை அனைவரும் முடிந்த
அளவு கடைபிடிப்பதில் தவறில்லையே

Child Prostituition

2003-10-30T13:18:00.000-08:00

ஜெர்மனி செக் ஆகிய நாடுகளின் எல்லையில் விரிவாக வளர்ந்து வரும் விபச்சாரம் பற்றிய செய்திகள் சென்ற செவ்வாய் அன்று செய்திகளில் வெளியாகியது. பலரையும் அதிர்ச்சிக்குள்ளாக்கியிருக்கின்றது இந்தச் செய்தி. பொதுவாகவே பலர் ப்ராக் (செக் நாட்டின் தலைநகரம்) செல்ல விரும்புவர். ப்ராக் மற்றும் செக் எல்லையில் பொருட்கள் மலிவாகக் கிடைக்கும். இதற்காக பல ஜெர்மானியர்கள் இங்கு செல்வதுண்டு. ஆனால் விபச்சாரத்திற்காகவும் ஜெர்மானியர்கள் இங்கு செல்கின்றனர் என்ற செய்தி கொஞ்சம் அதிர்ச்சியைத் தான் உருவாக்கியிருக்கின்றது.

மிகச் சிறிய, 8 வயதிற்கும் கீழான செக் குழந்தைகள் இந்த அவல நிலைக்குத் தங்கள் குடும்பத்தினராலேயே தள்ளப்படுகின்றனர். பெரும்பாலும் இந்தக் குழந்தைகளைப், பெற்றோர் அல்லது உறவினர் எல்லைப்புர சாலைகளில் வருகின்ற ஜெர்மானியர்களின் கார்களில் ஏற்றி விட்டுவிடுகின்றனராம். இந்தக் குழந்தைகளுக்கு 5 - 25 EUR வரை கொடுத்து விட்டு தங்கள் காரியம் முடிந்தவுடன் தப்பித்து விடிகின்றனர். இங்கேயும் இப்படிப்பட்ட அவல நிலையா என நினைக்கும் போது வேதனையாகத் தான் இருக்கின்றது.

ஜெர்மானிய செய்தி நிறுவனம் ஒன்று, கார்களில் வருபவர்களில் பெரும்பாலோர், பவேரியா மற்றும் சாக்ஸெனி பகுதிகளிலிருந்து வருகின்றனர் என்று ஜெர்மானிய வாகன எண்குறிப்பின் அடிப்படையில் சமூக நல ஊழியர்கள் கண்டு பிடித்திருப்பதாகத் தெரிவிக்கின்றது. மேலும், இந்தக் குழந்தைகள் பரவலாகக் கிழக்கு ஐரோப்பாவின் ஏழை நாடுகலிலிருந்து இங்கு அழைத்து வரப்படுவதாகவும் தெரிகின்றது.

UNICEF நிறுவனத்திற்காக சமூக சேவகி கேத்ரீன் இந்த அவலத்தைப் பற்றிய ஒரு அறிக்கையை எழுதி சமர்ப்பித்திருக்கின்றார். இந்த அறிக்கையின் அடைப்படையில் இப்போழுது செய்திகள் வெளிவரத் தொடங்கியிருக்கின்றன. ஆனாலும் இந்த செய்தியை செக் நாடு மறுத்திருக்கின்றது.

எட்டு வயதே நிரம்பிய குழந்தைகள் சுயமாக தாங்களே பேரம் பேசி விபச்சாரத்தில் ஈடுபடுகின்றார்களாம். வருமை மனித நேயத்தை எப்படியெல்லாம் கொல்கின்றது என்பதற்கு இதுவே ஒரு உதாரணம்.

New Blog - Malaysia in Focus

2003-10-28T13:17:00.000-08:00

நண்பர்களே,

மலேசிய நாட்டில் வாழும் தமிழர்கள், தமிழ் மொழியின் நிலை மற்றும் கலாச்சாரம், வாழ்க்கை முறை போன்ற பல தகவல்களைத் தொகுக்கும் வகையில் சிறப்பு வலைப்பூ ஒன்றினை அமைத்திருக்கின்றேன். இந்த வலைப்பூவை வாசித்து உங்கள் கருத்துக்களை எழுதுங்கள்.

URL: http://subaillam.blogdrive.com

அன்புடன் - சுபா

%Insurance%

2003-10-27T13:15:00.000-08:00

சேன்சலர் ஷ்ரூடரின் Agenda 2010 திட்டமானது அமுலுக்கு வர வாய்ப்பே இல்லை என கங்கணம் கட்டிக் கொண்டு சண்டைப் போட்டுக் கொண்டிருந்த அனைவரையும் அமைதியடையச் செய்ய வைக்கும் வகையில் இந்த திட்டத்தின் ஒரு அங்கமான சுகாதார திட்டத்தின் மறு சீரமைப்பு ஏற்றுக் கொள்ளப்பட்டு உறுதி செய்யப்பட்டு விட்டது. கடந்த வெள்ளியன்று முழுமையாக இந்த திட்டம் ஏற்றுக் கொள்ளப்பட்டு விட்ட இந்த நிகழ்வு ஜெர்மனியின் சாதாரண மக்களிடையே பெரும் ஆச்சரியத்தை ஏற்படுத்தியிருக்கின்றது.

இந்த திட்டம் அமுலாக்கம் செய்யப்படும் போது, தற்பொழுது 14.3 சதவிகிதமாக இருக்கும் பொது இன்சூரன்ஸ் கட்டணம் 13.6 சதவிகிதமாகக் அடுத்த ஆண்டில் குறைக்கப்பட்டு பின்னர் 2006ம் வாக்கில் 12.15 சதவிகிதமாகக் குறைக்கப்படும். இதன் வழி ஏறக்குறைய 20 பில்லியன் EUR சேமிக்கப்படும் என அரசாங்கம் நம்புகின்றது. ஆனாலும் இந்த திட்டத்தின் வழி சில சிரமங்களும் பொது மக்களுக்கு உண்டு என்பதை மறுக்க முடியாது. முன்பு மருத்துவமனை செலவு முழுவதுமே இன்சூரன்ஸ் நிறுவனங்களின் தலையில் விழுந்து விடும். ஆனால் இந்த திட்டம் வரும் போது, ஒரு சிறு பங்கினை நோயாளிகளும் ஏற்றுக் கொள்ளப்பட் வேண்டிய நிலை ஏற்படும்.

ஜெர்மனியில் ஒவ்வொரு நபரும் கட்டாயமாக சுகாதார இன்சூரன்ஸ் வைத்திருக்க வேண்டும். இந்த இன்சூரன்ஸின் அடிப்படையில் தான் மருத்துவ சேவைகள் வழங்கப்படுகின்றன. இன்சூரன்ஸ் இல்லாத பட்சத்தில் யாரும் மருத்துவ சேவையைப் பெறமுடியாது. பற்பல சங்கடங்களை அனுபவித்த பின்னர் ஆயிரக்கணக்கில் செலவு செய்து தான் மருத்துவ சேவைகளைப் பெற முடியும். இந்த நிலையை நன்றாகப் பயன்படுத்திக் கொள்ளும் இன்சூரன்ஸ் நிறுவனங்கள் மக்களிடம் பணத்தைக் கறந்து விடுகின்றனர். ஒவ்வொரு மாதமும் சம்பளத்தில் ஒரு கனிசமான தொகையை இன்சூரன்ஸுக்காக அழ வேண்டியது நிர்பந்தமாகி விட்டது. என்ன செய்வது??

New entries in EU!

2003-10-26T13:14:00.000-08:00

ஐரோப்பிய நாடுகளில் அவ்வளவாகப் பிரசித்தி பெறாத நாடுகளில் ஒன்றாக சில ஆண்டுகளுக்கு முன் வரை பெல்ஜியம் இருந்து வந்தது. European Union செயலகமாக அது தேர்ந்தெடுக்கப்பட்டு, பிரமாண்டமான பார்லிமண்ட் கட்டப்பட்டு, அதன் பின்னர் பற்பல அனைத்துலக அரசியல் திருப்புமுனை மாநாடுகள் நடத்தப்பட்டு வருவதால் இப்போது ஐரோப்பாவின் மிகப் பிரசித்தி பெற்ற நகரமாக Brussels உருவாகிவிட்டது.

சென்ற ஆண்டின் இறுதியில் டென்மார்க்கில் நடந்த ஒரு மாநாட்டில் இதுவரை இந்த ஐரோப்பிய ஒன்றியத்தில் சேராமல் இருக்கும் மேலும் 10 நாடுகளையும் உள்ளினைக்கும் வகையில் அவைகளுக்கும் அழைப்பு அனுப்பப்பட்டது. இவற்றுள் பழைய கிழக்கு ஐரோப்பிய சோவியத் ஆட்சி நாடுகளும் அடங்கும். பொதுவாகவே ஏழை நாடுகளாக முத்திரை குத்தப்பட்டுள்ள கிழக்கு ஐரோப்பிய நாடுகள், மேற்கு ஐரோப்பிய பணக்கார நாடுகளின் 'பந்தா' நிறைந்த குழுவில் சேர்வதற்கான ஒரு அழைப்பு என்று சில பத்திரிக்கையாளர்களும் இதை வர்ணித்தனர். இந்த திட்டத்தின் வழி ஐரோப்பிய ஒன்றியத்தின் பரப்பானது அதன் எல்லையை வடக்கில் ரஷ்யா, மற்றும் கிழக்கில் உக்ரேன், தெற்கில் அரபு நாடுகள் வரை விரிவாக்கும் என எதிர்பார்க்கப்படுகின்றது. தேர்ந்தெடுக்கப்பட்டு அழைப்பு விடுக்கப்பட்ட இந்த பத்து நாடுகள் எஸ்தோனியா, லாத்வியா, லிதுவானியா, ஸ்லோவேனியா, ஸ்லோவாக்கியா, போலந்து, செக், ஸைப்ரஸ், ஹங்கேரி, மற்றும் மால்டா ஆகியவையே.

ஐரோப்பிய ஒன்றியத்தில் இணைவதன் வழி இந்த 10 நாடுகளும் பல்வகையான பொருளாதார முன்னேற்றத்தைக் காணமுடியும் என்பது உறுதி என்றாலும், அதில் இணைவதற்கான முன்னேற்பாடுகள் இவர்களுக்குப் பற்பல தலைவலியைத் தோற்றுவித்திருக்கின்றது என்றே சொல்லவேண்டும். பொதுவாக இந்தக் கிழக்கு ஐரோப்பிய நாடுகளின் கல்வித் தரம், சமுதாய மேம்பாடு, மற்றும் சுகாதார வசதிகள் போன்றவற்றில் இந்த நாடுகள் கட்டாயமாக கவனம் செலுத்த வேண்டியது அவசியமாகின்றது. இந்த பத்து நாடுகளுமே மேற்கு ஐரோப்பிய நாடுகள் ஆக்கிரமித்துக் கொண்டிருக்கும் ஐரோப்பிய ஒன்றியத்தில் அங்கத்தினர் ஆவதற்கான முயற்சிகளில் மிகத் தீவிரமாக ஈடுபட்டு என்பதை மறுக்கவே முடியாது. அதிலும் குறிப்பாக போலந்து அரசாங்கமும், அந்நாட்டு மக்களும் பல வகையில் தமது வாழ்க்கைத் தரத்தில் முன்னேற்றதை ஏற்றுக் கொண்டு விட்டனர்.

ஸைப்ரஸ், ஐரோப்பிய ஒன்றியத்தில் இணைவதற்குத் தயாராகத் தான் இருக்கின்றது. ஆனால் உள்நாட்டு பூசலின் காரணமாக சிறு தொய்வு ஏற்பட்டிருக்கின்றது இப்போது. இப்படி ஒவ்வொரு நாடும் ஒவ்வொரு பிரச்சனைகளோடு அவஸ்தைப் பட்டுக் கொண்டிருந்தாலும் வெகு விரைவில் ஐரோப்பிய ஒன்றியம் அதன் உறுப்பினர் நாடுகளின் எண்ணிக்கையை உயர்த்திக் கொள்ளும் என்பதில் கொஞ்சமும் மாற்றமில்லை.

தீபாவளி 2003

2003-10-25T13:11:00.000-07:00

தீபாவளியை மலேசியாவில் கொண்டாடும் விதமே வேறு; இங்கு ஜெர்மனியில் கொண்டாடும் விதமும் வேறு. மலேசியாவில் தீபாவளி என்பது இந்தியர்களின் மிக முக்கிய பண்டிகை என்பதால் அதற்கு அரசாங்க விடுமுறை உண்டு. 1 மாதத்திற்கு முன்னரே ஆயத்த வேலைகளில் எல்லாரும் ஈடுபட்டு விடுவோம். புதிய உடை வாங்குவது, விதம் விதமான பலகாரங்கள் செய்வது, வீட்டு அலங்காரப் பொருட்கள் வாங்குவது என்பதெல்லாம் மிகவும் மகிழ்ச்சியளிக்கக் கூடிய வேலைகள். தீபாவளியன்று சீனர்கள் மலாய்க்காரர்கள் என, இன மத வேறு பாடின்றி அனைவரும் சந்தோஷமாக உண்டு களிக்கும் நாள் அது. ஆனால் இங்கு வேறுவிதம்.

அலுவல் நிமித்தமாக Basel(Swiss) செல்ல வேண்டிய கட்டாயம். தீபாவளி நாளான வெள்ளிக் கிழமை மதியம் தான் வீடு வந்து சேர்ந்தேன். முதல் நாள் நான் இருக்கும் போப்லிங்கன் நகரில் கடுமையான பணி பெய்திருக்கின்றது. என் வீட்டின் கூறைகள் மற்றும் கார் மேலெல்லாம் பணி கொடிக் கிடந்தது. இந்த 5 வருடங்களில் இதுதான் எனக்கு முதல் "பணி தீபாவளி".

மாலையில் Stuttgart விநாயகர் ஆலயத்தில் கலாச்சார நிகழ்ச்சிக்கான ஒரு ஏற்பாடு செய்திருந்தோம். ஆக எனது அலுவலகத்தில் புதிதாக ஓராண்டு பயிற்சிக்காக சேர்ந்திருக்கும் ஜமால் என்ற நண்பரையும் அழைத்துக் கொண்டு ஆலயத்திற்குப் புறப்பட்டேன். (குறிப்பு: இலங்கைத் தமிழர்கள் தீபாவளியை விமரிசையாகக் கொண்டாடுவதில்லை. அவர்களுக்குப் பொங்கல் தான் மிகச் சிறப்பான பண்டிகை) கலை நிகழ்ச்சியில் ஒரு கர்நாடக சங்கீத கச்சேரியும் பரத நாட்டிய நிகழ்வும் ஏற்பாடு செய்யப்பட்டிருந்தன.

கணினி துறையைச் சேர்ந்த பல தமிழ் நாட்டு இளைஞர்கள் இப்போது 1 அல்லது 2 வருட சிறப்பு அழைப்பின் பேரில் Bosch, Daimler போன்ற நிறுவனங்களுக்கு வருகின்றனர். இவர்களில் கர்நாடக இசையைப் பயின்றவர்களும் இருக்கின்றனர் என்பதால் இவர்களில் ஒருவரான திரு ரவி என்பவரை இந்த நிகழ்வைச் செய்து
தருமாறு கேட்டிருந்தோம். ரவி, 18 வருட சங்கீத அனுபவம் கொண்ட ஒரு இளைஞர். மிக அழகாக தமிழ் கீர்த்தனைகளைப் பாடினார். விநாயகனே வினை தீர்ப்பவனே என ஆரம்பித்து வைத்தார். இடையில் கல்யாண வசந்தாவில் ஒரு கன்னட விருத்தத்தையும் சேர்த்துக் கொண்டார். On demand, மேலும் குறையொன்றுமில்லை, சாந்தி நிலவ வேண்டும், சம்போ ஷிவ சம்போ போன்ற தமிழ் கீர்த்தனைகளையும் பாடி அனைவரையும் மகிழ்வித்தார்.

ஜெர்மனியில் கர்நாடக சங்கீத நிகழ்வுகள் நடப்பது மிக மிக அரிது. வருடத்திற்கு 3 அல்லது நான்கு கச்சேரிகள் இந்த நாட்டின் ஏதாவது ஒரு மூலையில் நடந்து கொண்டிருக்கும். அவ்வளவுதான். ஆக இப்படி ஒரு வாய்ப்பு கிடைத்தது ஒரு வகையில் அதிர்ஷ்டம் தானே.

அதற்குப் பிறகு நடராஜ பதத்திற்கு சிறுவன் பிரசவன் அபிநயம் பிடித்து ஆடினான். சிறப்பாக இருந்தது அவனது நாட்டியம்.

மற்றொரு விஷேஷம் என்னவென்றால் இந்த தீபாவளி பூஜைக்கு ஆலயத்திற்கு இந்துக்கள் மட்டுமன்றி ஜெர்மானியர்களும், சிங்களத்தவர்களும், முஸ்லிம் தமிழ் நண்பர்களும் வந்திருந்ததுதான். பல்லின ஒற்றுமையைக் காட்டும் பண்டிகையாகவே இது மாறி இருந்தது. பல நாட்கள் சந்திக்காத நண்பர்களையெல்லாம் சந்தித்ததில் மனமெல்லாம் மகிழ்ச்சி பொங்க இல்லம் திரும்பும் போது மணி 12:30 ஆகிவிட்டிருந்தது.!

பனி தொடக்கம்..

2003-10-21T13:09:00.000-07:00

சில நாட்களாக காலையில் எழுந்ததும் முதல் வேலையாக எனது அறையின் ஜன்னல் வழியாக வெளியே நிற்கும் எனது காரைப் பார்ப்பதுதான் எனது வேலையாகிப் போய்விட்டது. கார் காணாமல் போய்விடுமே என்ற பயம் ஒன்றுமில்லை. மாறாக கண்ணாடி முழுதும் பணியால் இருகிப் போயிருக்கின்றதா என்று பார்ப்பதற்க்காகத்தான். இன்றும் அப்படித்தான்; எழுந்ததும் ஓடிவந்து ஜன்னல் வழியாகப் பார்த்தால் ஒரே ஆச்சரியம். பனிமழை பெய்து கொண்டிருந்தது. இந்த winter -ன் முதல் பனிமழை இன்று ஆரம்பித்து விட்டது. மலைப்பாங்கான இடங்களில் ஏற்கனவே பனிமழை ஆரம்பித்து விட்டாலும் போப்லிங்கனில் இன்று தான் முதல் முறையாக கடந்த 6 மாதங்களுக்குப் பிறகு மீண்டும் பணியைப் பார்க்கின்றேன்.

தமிழ் சினிமா படங்களில் பனிமழையில் கதாநாயகனும் நாயகியும் ஓடியாடி விளையாடுவதைப் பார்த்து பனியென்றால் சுகமாக இருக்கும் என்று தப்புக் கனக்குப் போட்டிருந்தவர்களில் நானும் அடங்குவேன். இந்த மாயையெல்லாம் ஜெர்மனிக்கு வந்த சில மாதங்களிலேயே மறைந்து போய்விட்டன. பனியில் snow man
செய்து விளையாடுவதும் snow ball செய்து விளையாடுவதும் மகிழ்ச்சியான ஒன்றுதான். ஆனால் பனிக்காலத்தில் பனியினால் ஏற்படும் சிரமங்களை எண்ணிப்பார்க்கும் போது ஒரு வகையில் பயமாகத்தான் இருக்கின்றது.

நான் ஜெர்மனிக்கு வந்து 2 வாரங்கள் தான் இருக்கும். பல்கலைக்கழகத்தில் வகுப்புக்கள் ஆரம்பித்து விட்டன. அப்போது ஜனவரி மாதம். கடும் பனி பெய்யும் நேரம். அந்த நேரத்தில் நான் கீல் நகரில் இருந்தேன். அங்கு பொதுவாகவே நல்ல பனி பெய்யும். முதல் நாள் வெள்ளிக்கிழமை வகுப்பிற்குச் சென்றிருந்த போது பனி இல்லை. அதனால் பல்கலைக் கழகத்தின் மற்றொரு Campus இருக்குமிடத்திற்கு map வைத்துக் கொண்டு சுலபமாகச் சென்று சேர்ந்து விட்டேன். அடுத்த சில நாட்களில் பனி பெய்ய ஆரம்பித்து தரையெல்லாம் பனியால் மூடிக்கிடந்தது. வகுப்புக்குக் கிளம்பிய நான், முதல் நான் வெற்றிகரமாக வகுப்பிற்குச் சென்று விட்ட தைரியத்தில் எனது campus நோக்கி நடக்க ஆரம்பித்தேன். முதல் நான் சென்றபொழுது அடையாளத்திற்காக சில இடங்களை (landmark) ஞாபகம் வைத்திருந்தேன். அதன் அடிப்படையில் தேடிக் கொண்டு நடக்க ஆரம்பித்தேன்.

டக்கின்றேன்.... நடக்கின்றேன்.... நடந்து கொண்டே இருக்கின்றேனே தவிர பல்கலைக்கழக campus வரவேயில்லை. பனி மூடிவிட்டதால் பல சாலைகள் அடையாளமே தெரியவில்லை. எல்லா இடங்களும் மாறிப்போய் காட்சி அளிக்கின்றன. வெகுதூரம் நடந்திருப்பேன். கண்டிப்பாக வழியை விட்டிருப்பேன் என்று தெரிந்ததும் சாலையில் நடந்து கொண்டிருந்தவர்களை அனுகி ஆங்கிலத்தில் கேட்டால் அவர்களுக்கு சுத்தமாக ஆங்கிலமே தெரியவில்லை. மனதைத் தளரவிடாமல் நடந்து கொண்டே இருந்தாலும் கொஞ்சம் கொஞ்சமாக பயம் வர ஆரம்பித்து விட்டது. கண்களில் கண்ணீர் வர துடைத்துக் கொண்டே மேலும் நடந்து கொண்டேயிருந்தேன். மேலும் சிலரை அனுகிக் கேட்கலாம் என தைரியத்தை வரவழைத்துக் கொண்டு ஒரு இளைஞனிடம் கேட்டேன். என்னிடம் அந்த campus வரைபடமும் இருந்ததால் அதையும் காட்டி அவனிடம் ஆங்கிலத்தில் கேட்க ஓரளவு அவனுக்குத் தெரிந்த ஆங்கிலத்தில் பஸ் எடுத்துச் செல்லுமாறு கூறினான். அதுமட்டுமலாமல் என்னோடு சிறிது நேரம் இருந்து, சரியான பஸ்ஸில் என்னை ஏற்றிவிட்டு , ஓட்டுநரிடம் என்னை குறிப்பிட்ட campus இருக்கும் இடத்தில் இறக்கி விடுமாறும் கேட்டுக் கொண்டான். உதவும் உள்ளம் படைத்தவர்கள் உலகம் முழுவதும் இருக்கத்தான் செய்கின்றார்கள்..இல்லையா!

இந்தப் பனியால் இந்த மாதிரி சிரமங்கள் மட்டுமல்ல.. மேலும் பல இருக்கின்றன..!

Germany's Economy and Structural reform!

2003-10-19T13:06:00.000-07:00

ஜெர்மனியின் தற்போதைய பொருளாதாரப் பிரச்சனைகள் வளர்ந்து கொண்டே போகின்றனவே அன்றி குறைந்தபாடில்லை. வேலையில்லாதவர்களின் எண்ணிக்கை வளர்ந்து கொண்டே செல்கின்றது; குழந்தைகள் பிறப்பு சதவிகிதம் மிகக் குறைந்து வருகின்றது; இவையெல்லாம் நாட்டின் சேன்சலர் கெர்ஹாட் ஷ்ரூடருக்குத் தொடர்ந்து இருந்து வரும் தலைவலிகள். இவற்றோடு குறைந்த வருவாய் தரும் வேலைகள் மற்ரும் சம்பள உயர்வின்மை போன்ற பல காரணங்கள் அரசாங்கம் தற்போது எதிர்நோக்கும் பிரச்சனைகளின் பட்டியலில் சேர்ந்து கொண்டிருக்கின்றன. இவையெல்லாம் சேர்த்து Euro zone-னின் மிகக் குறைந்த வளர்ச்சியைக் காட்டும் நாடாக தற்போது ஜெர்மனியை ஆக்கியுள்ளன.

இந்தப் பிரச்சனையை எதிர்கொள்வதற்கான ஒரு உபாயமாக ஸ்ரூடர் 'Agenda 2010' என்ற ஒரு திட்டத்தை வெளியிட்டிருந்தார். இதன் அடிப்படையில் சில குறிப்புக்களை நான் எனது ஜூலை மாத வலைக்குறிப்புக்களில் அலசியிருந்தேன். இந்த புதிய திட்டத்தின் வழி தற்போது இயங்கி வரும் சமூக இலவச சேவைகள், மற்றும் அளவுக்கு மீறிய சலுகைகள் போன்றவற்றை கட்டுப்படுத்த முயற்சிகள் எடுக்கப்பட்டு வருகின்றனதீவை, இந்த இலையுதிர்காலத்தில் பார்லிமெண்டில் விவாதிக்கப்பட உள்ளதாகவும் செய்தி அறிக்கைகள் கூறுகின்றன.

பொதுமக்கள், இந்த திட்டத்தின் வழி ஜெர்மனியின் தற்போதைய அரசாங்கம்
அமுல்படுத்தவிருக்கும் மாற்றங்களுக்காக காத்திருக்கின்றனர். புதுவருடத்தில் இந்த திட்டங்கள் அமுல்படுத்தப்பட உள்ளதாகவும் தகவல்கள் கிடைக்கின்றன. இதன் வழி ஜெர்மனியின் பொருளாதரம் மிகத் துரித வளர்ச்சியைக் காண முடியும் என்ற நம்பிக்கை அரசாங்கத்திற்கு இருக்கின்றது.

அரசாங்கம் எடுத்திருக்கும் புதிய திட்டங்களைப் பற்றிய விபரங்களை நாளைத் தருகிறேன்..

Germany reunification day!

2003-10-03T12:15:00.000-07:00

இன்று ஜெர்மனியில் விடுமுறை. கிழக்கு ஜெர்மனியும் மேற்கு ஜெர்மனியும் 1991ம் ஆண்டு அக்டோ பர் 3ம் தேதி ஒன்றாக இணைந்ததை நினைவு கூறி மகிழும் நாள் இது. ஜெர்மனி முழுதுமாக இந்த விடுமுறை நாள் அளிக்கப்படுகின்றது.

ஜெர்மானியர்களில் அதிலும் கிழக்கு ஜெர்மனியைச் சேர்ந்தவர்களுக்கு ஒரு வகையில் இது விடுதலை கிடைத்த ஒரு நாள் என்றே சொல்ல வேண்டும். ஜெர்மானியர்களைப் பிரித்திருந்த பெர்லின் சுவர் இந்த நாளில் இடிக்கப்பட்டது. இரண்டு ஜெர்மனியும் ஒன்றிணைந்ததனால் கிழக்கு ஜெர்மனியில் இருந்த மக்கள் பலரால் மேற்கு ஜெர்மனிக்கு சுலபமாக வர முடிந்தது. இங்குள்ள வேலை வாய்ப்பு, உயர்ந்த வாழ்க்கைத் தரம் ஆகியவற்றோடு சுதந்திரக் காற்றையும் சுவாசிக்க முடிந்தது.

இன்றளவும் இந்த இரண்டு ஜெர்மனிக்கும் உள்ள வேறு பாட்டினை ஓரளவு காணமுடியும். மக்களின் சிந்தனை ஓட்டம் வாழ்க்கை முறை ஆகியவற்றில் இந்த இரண்டு ஜெர்மனியிலும் இருந்து வருகின்ற மக்களிடம் குறிப்பிடத்தக்க வித்தியாசங்களைக் காணமுடியும். கல்வி தொழில் எனப் பல பொருளாதார அடிப்படையிலான காரணங்களை முன் வைத்து இவர்கள் இப்போது கலந்து விட்டாலும், சிந்தனையில் இருக்கின்ற வேறு பாட்டினை வைத்துப் பார்க்கும் போது இவர்கள் பெரும்பாலும் தங்களை தனித்துக் கொள்ள அதாவது கிழக்கு ஜெர்மனியைச் சேர்ந்தவர்கள், அல்லது மேற்கு ஜெர்மனியைச் சேர்ந்தவர்கள் என்று கூறிக் கொண்டு பெருமைப் படத்தான் செய்கின்றனர்.

ப்ளம்ஸ்

2003-07-22T14:03:00.000-07:00

இளம் வயதில் எங்கள் வீட்டுக்கு அருகில் (பினாங்கில்) சிறிய காட்டுப்பகுதி ஒன்று இருந்தது. அங்கே முந்திரி மரங்களும் புளிய மரங்களும் அங்கொன்றும் இங்கொன்றுமாக இருக்கும். நான் எனது பள்ளி நண்பர்களோடு அங்கு விளையாடச் செல்வதுண்டு. எனது நண்பர்களில் சிலர் நன்றாக மரம் ஏறுவார்கள். எனக்கும் ஆசைதான்; ஆனால் முயற்சி செய்து செய்து கீழே விழுவதால் அந்த முயற்சியை சுத்தமாக கைவிட்டு விட்டேன். ஆனால் நண்பர்கள் மரம் ஏறி பழங்கள் பறித்துப் போட அதை ரசித்துச் சாப்பிட்டு மகிழ்ந்தது மிக சுவாரசியாமான ஒரு விஷயம்.

நேற்று எனது நண்பி ஒருவருடன் நான் வசிக்கும் போப்லிங்கன் நகரத்து ஏறிக்கரைக்கு வேலை முடிந்து காற்று வாங்கச் சென்றிருந்தேன். பேசிக்கொண்டே வந்து குழந்தைகள் விளையாடும் இடத்திற்கு வந்து அமர்ந்தோம். அவளது குழந்தைகளை விளையாட விட்டு விட்டு பேசிக் கொண்டிருக்கையில் ஒரு 40 வயத்கு மதிக்கத்தக்க குர்டிஸ் இனத்துப் பெண்மணி ஒருத்தி எங்களை கொஞ்சம் பயம் கலந்த பார்வையோடு பார்த்து சிரித்தார். மீண்டும் மீண்டும் அவர் அப்படி மிரட்சியோடு எங்களைப் பார்ப்பதும் பக்கத்தில் இருக்கும் மரங்களைப் பார்ப்பதுமாக இருப்பதைக் கவனித்த எனக்கு ஏதோ ஒன்று அங்கு நடக்கின்றது என்று தோன்றியது. உற்று கவனிக்க, அங்கிருக்கும் ப்ளம்ஸ் மரத்தின் மேல் யாரோ ஒருவர் ஏறி பழங்கள் பறித்துக் கொண்டிருப்பது தெரிந்தது. மரத்தைக் குலுக்க குலுக்க நிறைய ப்ளம்ஸ் பழங்கள் அங்கொன்றும் இங்கொன்றுமாக விழுவதைக் காண முடிந்தது. நீண்ட நாட்களுக்குப் பிறகு இப்படிப்பட்ட ஒரு காட்சி. அதுவும் ஜெர்மனி வந்து சேர்ந்த இந்த நான்கு ஆண்டுகளில் இப்போதுதான் முதல் முறையாக இப்படி ஒரு நிகழ்ச்சியைப் பார்க்க முடிந்தது.

ஒரு பொது இடத்தில் இருக்கின்ற பழ மரங்களிலிருந்து ஜெர்மானிய மக்கள் பழங்களைப் பறித்து இதுவரை நான் பார்த்ததில்லை. மரங்களில் உள்ள அப்பழங்கள் அப்படியே வீணாகித் தரைம் போது மரத்தின் மேல் இருந்த அந்தச் சிறுவன் கீழிறங்குவது தெரிந்தது. நன்றாக பார்த்தால் அது ஒரு பெண். அதுவும் 30 அல்லது 35 வயது மதிக்கத்தக்க பெண். இதைப் பார்த்த எனக்கு ஒரே ஆச்சரியம். எவ்வளவு தைரியமாக ஒரு பொது இடத்தில், மரத்தில் ஏறி இவள் பழம் பறித்துப் போடுகின்றாளே என்று! கீழே இறங்கிய உடனே இரண்டு பெண்மனிகளுமாகச் சேர்ந்து எல்லா பழங்களையும் ஒரு துணிப்பைக்குள் அவசர அவசரமாக எடுத்து திணிக்க ஆரம்பித்து விட்டனர்.

உடனே எனது தோழியிடம் இதைப்பற்றி கேட்க அவள் இது அவ்வப்போது சகஜமாக இங்கு நடக்கும் விஷயம் தான் என்றாள். மேலும், இந்த இடம் பொது மக்களுக்காக உள்ள ஒன்று என்றாலும் மாலை ஆறு மணிக்கு மேல் இங்கு ஜெர்மானியர்கள் வருவதில்லை. அவர்கள் பொதுவாக மதிய வேளைகளில் தான் இங்கு வருவர். 6 மணிக்கு மேல் இங்கு அதிகமாக துருக்கிய இனத்தவரும் குர்டிஸ் இனத்தவரும் தான் நிறைந்திருப்பர். அதனால் இவர்களுக்க்கு அவ்வளவாக பயம் இருப்பதில்லை என்றாள். இதுவும் ஒரு ஆச்சரியமான ஒரு தகவலாகவே எனக்குப் பட்டது. பொதுவாக ஜெர்மனியில் பார்க்கும் போது இனவேறுபாடு என்ற ஒன்று இருப்பதைக் காண முடிவதில்லை. ஆனாலும் மறைமுகமாக பல இடங்களின் மக்களின் தனித்துவம் வேறுபட்டு வெளிப்படுவதைக் காணத்தான் முடிகின்றது.

வருமானம் (வரி)

2003-07-22T14:02:00.000-07:00

உலக பொருளாதார நிலையில் மந்தம் என்பது தொடர்ந்தவாறே இருக்கின்றது. இந்த நிலையில் ஐரோப்பிய நாடுகளில் ஒன்றாகிய ஜெர்மனியின் பொருளாதாரம் மிக மிக மோசமாகிக் கொண்டிருப்பது தற்போதைய உண்மை. ஐரோப்பிய உறுப்பிய நாடுகளிலேயே பணக்கார நாடுகளில் ஒன்றான ஜெர்மனி கடந்த ஆண்டின் மிகக் குறைந்த பொருளதார வளர்ச்சியை கண்டிருப்பது இங்குள்ள அரசியல் நிலையை அதிகமாகவே பாதிக்கத் தான் செய்துள்ளது..!

பல திட்டங்கள் பல மாற்றங்கள் என்று அமைச்சர்கள் பேசிக் கொண்டிருக்கின்றனர். அதில் மிக மிக சந்தோஷமான ஒரு அறிவிப்பு என்று இப்பொழுது இந்த நாட்டில் பல மூலைகளிலும் மக்கள் பேச ஆரம்பித்திருக்கும் விஷயம் வருமான வரியைப் பற்றியதைத்தான். ஐரோப்பிய நாடுகளில் பெரும்பாலும் வருமான வரி என்பது எறக்குறை 50% என்பது அனைவரும் அறிந்தது. ஐரோப்பாவில் சம்பளம் அதிகம் என்றாலும் இந்த மிகக் கூடிய வருமான வரியைக் கட்டி கையில் மிஞ்சுவது வருமானத்தில் பாதியே. DM-லிருந்து EURO மாற்றம் வந்ததிலிருந்து (2001) விலை வாசி உயர்ந்து வருவதையும் மக்கள் உணர்த்தவர்களாகவே இருக்கின்றனர். இந்த நிலையில் ஒரு தனி நபர் வரிமான வரியை 46% லிருந்து 10% அதாவது 36%க்கு குறைக்கும் முடிவைப்பற்றியும் அதனை 2004 ஆரம்பத்திலிருந்து அமுலுக்குக் கொண்டுவருவதைப்பற்றியும் அரசாங்கமும் அதிபர் ஷ்ரூடரும் பேச ஆரம்பித்திருப்பது சந்தோஷமான விஷயமாகத் தான் இருக்கின்றது.

இது உண்மையிலேயே சாத்தியப்படுமா; சொல்வதைப்போல அடுத்த வருட ஆரம்பத்தில் அமுலுக்கு வருமா? என்ற சந்தேத்தை விட மற்றோரு சந்தேகம் மக்கள் மனதில். ஜெர்மானிய நண்பர்கள் பலரும், அதுவும் திருமணம் ஆகி குழந்தைகள் உள்ளவர்கள் இந்த மாற்றத்தைக் கேள்விப்பட்டு அவ்வளவாக திருப்தி அடைந்ததாகத் தெரியவில்லை. காரணம் என்னவென்றால், குடும்பம் குழந்தைகள் உள்ளவர்கள் தற்போது ஏறக்குறைய 18% - 27% வரையிலான வருமான வரியைத்தான் செலுத்துகின்றனர். ஆகவே இந்த மாற்றம் ஓரளவே இவர்களுக்கு உதவ முடியும். ஆனால் வருமான வரி குறைகின்ற அதே வேளையில் பொருட்களின் விலையோடு கூடுகின்ற VAT (Value added Tax) நிச்சயம் உயரும் என்பது இவர்களின் கணிப்பு. அதிலும் முக்கியமாக எண்ணெய் விலை அதிகரிப்பதை யாரும் தடுக்க முடியாது எனபதையும் மறுப்பதற்கில்லை. ஆக மக்களின் பொருளாதாரத்தைச் சீர்செய்ய அரசாங்கம் எடுக்கின்ற முயற்சிகள் மற்ற பின் விளைவுகளையும் சேர்த்துக் கொண்டே வருவதைத் தான் பார்க்க முடிகின்றது.